சமீபத்திய செய்தி

கொவிட் நோய்த் தொற்று பிரச்சினைக்கு தீர்வு தடுப்பூசி : அரசாங்கம் அதற்குத் தயார்

: ஞாயிற்றுக்கிழமை, 25 ஏப்ரல் 2021

சுகாதார வழிகாட்டல்களை பின்பற்றுவது மக்களின் பொறுப்பு – ஜனாதிபதி

தெரிவிப்பு.

கொவிட் 19 நோய்த் தொற்றுப் பிரச்சினைக்கு இறுதித் தீர்வு தடுப்பூசி மட்டுமேயாகும். மக்களுக்கு தடுப்பூசியை பெற்றுக்கொடுப்பதற்காக தயாரிக்கப்பட்டுள்ள நிகழ்ச்சித்திட்டமொன்று அரசாங்கத்திடம் உள்ளது. இந்த சவாலை சிறப்பாக வெற்றிகொள்வதற்கு கொவிட் நோய்த் தொற்று பரவிய முதல் சுற்றின்போது செய்ததைப் போன்று சுகாதார அதிகாரிகள் பரிந்துரைத்துள்ள அனைத்து சட்டதிட்டங்கள், வழிகாட்டல்களை மக்கள் முழுமையாக பின்பற்ற வேண்டுமென்று ஜனாதிபதி கோட்டாபய ராஜபக்ஷ அவர்கள் தெரிவித்துள்ளார்.

உலக சுகாதார தாபனம் தற்போது அங்கீகரித்துள்ள மற்றும் எதிர்காலத்தில் அங்கீகாரம் வழங்க உள்ள கொவிட் ஒழிப்பு தடுப்பூசிகளில் நான்கு தடுப்பூசிகளை இலங்கைக்கு கொண்டு வருவதற்கு அரசாங்கம் ஏற்பாடுகளை செய்துள்ளது. முதலில் கொண்டுவரப்பட்ட அஸ்ட்ராசெனக்கா தடுப்பூசி 925,242 பேருக்கு இதுவரையில் வழங்கப்பட்டுள்ளது. இத்தடுப்பூசியின் இரண்டாவது கட்டம் மே மாதம் முதலாம் வாரத்தில் வழங்கப்படவுள்ளது. முன்னணி சுகாதார அதிகாரிகள், கொவிட் ஒழிப்பு நடவடிக்கையில் ஈடுபட்டுள்ள முப்படையினர் மற்றும் பொலிஸ் அதிகாரிகள் உள்ளிட்ட 356,000 பேருக்கு இரண்டாவது கட்டம் வழங்கப்படும். எஞ்சிய தேவையை நிறைவேற்றிக்கொள்வதற்கு அஸ்ட்ராசெனக்கா தடுப்பூசி உற்பத்தி செய்யும் உலகில் உள்ள ஏனைய நிறுவனங்களுடன் அரசாங்கம் தற்போது கலந்துரையாடல்களை மேற்கொண்டு வருகின்றது.

ரஷ்யாவில் உற்பத்தி செய்யப்பட்ட ஸ்புட்னிக் தடுப்பூசி 200,000 ஏப்ரல் மாதம் இறுதியிலும் 400,000 தடுப்பூசிகள் மே மாதத்திலும், 800,000 தடுப்பூசிகள் ஜூன் மாதத்திலும் 1,200,000 தடுப்பூசிகள் ஜூலை மாதத்திலும் கொண்டு வரப்படும். 13 மில்லியன் ஸ்புட்னிக் தடுப்பூசிகளை கொண்டு வருவதற்கு அமைச்சரவை அனுமதியளித்துள்ளது.

அன்பளிப்பாக சீனாவிடம் இருந்து கிடைக்கப்பெற்றுள்ள 600,000 செனோபாம் தடுப்பூசிகள் எதிர்வரும் சில வாரங்களில் உலக சுகாதார தாபனத்தின் அனுமதி கிடைக்கப்பெற்றதும் நாட்டு மக்களுக்கு வழங்க திட்டமிடப்பட்டுள்ளது.

இதற்கு மேலதிகமாக அரச ஔடத கூட்டுத்தாபனம் பைசர் தடுப்பூசியை கொண்டு வருவதற்கு தேவையான ஆரம்ப உடன்படிக்கைகளில் தற்போது கைத்சாத்திட்டுள்ளதுடன், அவற்றை மிக விரைவில் கொண்டு வருவதற்கு அரசாங்கம் நடவடிக்கை எடுத்து வருகின்றது.

கொவிட் 19 நோய்த் தொற்றுப் பரவலை ஒழிப்பதில் முக்கிய இடம் வகிப்பது மக்கள் சுகாதார வழிகாட்டல்களை பின்பற்றுவதாகும் என உலக சுகாதார தாபனத்தின் தலைவர் நேற்று ஜெனிவாவில் மீண்டும் வலியுறுத்தியுள்ளார். உரிய முறையில் முகக் கவசங்களை அணிவது, சவர்க்காரம் அல்லது தொற்று நீக்கிகளை பயன்படுத்தி அடிக்கடி கைகளை கழுவுதல், சமூக இடைவெளியைப் பேணுதல், தேவையற்ற பயணங்கள் மற்றும் விழாக்கள் போன்றவற்றில் இருந்து தவிர்ந்து இருப்பது இவற்றில் முக்கியமானதாகும்.

சுகாதார வழிகாட்டல்களை பின்பற்றுவது, ஒழுக்கப்பண்பாடான சமூக நடத்தைகள், வைரஸ் தொற்றை தடுப்பதற்கு சிறந்த தீர்வாகும் என்பது அநேக நாடுகளிலிருந்து பெற்றுக்கொள்ள முடியுமான அனுபவமாகும்.

கொவிட் 19 பிரச்சினைக்கு தீர்வாக சிலகாலம் நாட்டை மூடி வைக்க வேண்டுமென சிலர் எண்ணுகின்றனர். ஆரம்ப காலகட்டங்களில் அத்தகைய நடைமுறையின் மூலம் திருப்தியான பெறுபேறு கிடைக்கப்பெற்றபோதும் நீண்டகாலத்தில் அது மக்களின் இயல்பு வாழ்க்கைக்கும் பொருளாதாரத்திற்கும் பாரிய பாதிப்பை ஏற்படுத்தும். பொருளாதார செயற்பாடுகளை முற்றாக முடக்கிவிடக்கூடிய வகையில் ஊரடங்கு சட்டத்தை பிறப்பிப்பது இலங்கை போன்ற அபிவிருத்தி அடைந்துவரும் நாடுகளுக்கு செய்ய முடியாது. எமது நாட்டின் வருமானம் ஈட்டும் பெரும்பான்மையானவர்கள் ஒழுங்குபடுத்தப்படாத வாழ்வாதார வழிகளில் தங்கியுள்ளனர்.

எனவே அரசாங்கம் தனது பணிகளை மேற்கொண்டு வருவதுடன், மக்களும் நாட்டினதும் தம்முடையதும் நலனைக் கருத்திற்கொண்டு தமது பொறுப்புக்களையும் கடமைகளையும் மேற்கொள்ள வேண்டுமென்று ஜனாதிபதி அவர்கள் தெரிவித்துள்ளார்.

இரசாயன உரங்களை இறக்குமதி செய்வது முற்றாக நிறுத்தப்படும்

: வெள்ளிக்கிழமை, 23 ஏப்ரல் 2021

இரசாயன உரங்களை இறக்குமதி செய்வது முற்றாக நிறுத்தப்படும் ...

அதிக விளைச்சலை பார்க்கிலும் உயிர்கள் எனக்கு மிகவும் பெறுமதியானது - ஜனாதிபதி

இரசாயன உரங்களை இறக்குமதி செய்வது மிக விரைவில் முற்றாக நிறுத்தப்படும் என்று ஜனாதிபதி கோட்டாபய ராஜபக்ஷ அவர்கள் தெரிவித்தார்.

இரசாயன உரங்களைப் பயன்படுத்துவதன் மூலம் அதிக விளைச்சலை பெற முடியும். குளங்கள், கால்வாய்கள் மற்றும் நிலத்தடி நீர் மாசுபடுவதால் உயிர்களுக்கு ஏற்படும் சேதத்தை அந்த இலாபத்தால் ஈடுசெய்ய முடியாது. இரசாயன உரங்களின் தாக்கம் சிறுநீரக நோய் உட்பட பல தொற்றா நோய்களுக்கு வழிவகுத்துள்ளது என்று சுகாதார அதிகாரிகள் சுட்டிக்காட்டுகின்றனர். சிகிச்சைக்காக செலவாகும் தொகை மற்றும் உயிர்களுக்கு ஏற்படும் தாக்கம் அதிகம். ஆரோக்கியமான மற்றும் உற்பத்தித்திறன் வாய்ந்த பிரஜையை உருவாக்குவதற்கு, நச்சு அல்லாத உணவுக்கான மக்களின் உரிமையை அரசாங்கம் உத்தரவாதம் செய்ய வேண்டும். இந்த நோக்கத்திற்காக நாட்டின் விவசாயத்துறையில் சேதன உரங்களைப் பயன்படுத்துவதற்கு பழக்கப்படுத்த வேண்டும் என்று ஜனாதிபதி அவர்கள் தெரிவித்தார்.

நேற்று பிற்பகல் (22) கோட்டையில் உள்ள ஜனாதிபதி மாளிகையில் இடம்பெற்ற அரச கூட்டுத்தாபனங்கள் மற்றும் சட்டவாக்க சபைகளின் தலைவர்களுடனான சந்திப்பின் போதே ஜனாதிபதி அவர்கள் இதனை தெரிவித்தார்.

நாட்டில் சேதன உர உற்பத்தியை அதிகரிக்க அனைத்து தரப்பினரும் கவனம் செலுத்த வேண்டும். உர மானியத்திற்கு பதிலாக சேதன உரத்தை பெற்றுக்கொடுக்க திட்டமிடுவதாக ஜனாதிபதி அவர்கள் தெரிவித்தார். உர இறக்குமதிக்காக ஆண்டுதோறும் செலவிடப்படும் 400 மில்லியன் டொலர்கள் மக்களின் வாழ்க்கையை மேம்படுத்துவதற்கு பயன்படுத்தப்பட முடியும் என்று ஜனாதிபதி அவர்கள் சுட்டிக்காட்டினார்.

தன்னை அதிகாரத்திற்கு தெரிவு செய்ததன் மூலம் மக்கள் கொள்கை சார்ந்த மாற்றத்தை எதிர்பார்த்தனர். நாட்டிற்காக அந்த எதிர்பார்ப்புகளை நிறைவேற்ற அனைவரின் ஆதரவும் தேவை என்று ஜனாதிபதி அவர்கள் கூறினார்.

எத்தனோல் இறக்குமதி முழுமையாக நிறுத்தப்பட்டதன் மூலம் இலங்கை சீனி நிறுவனம் ரூ. 1100 மில்லியனை இலாபமாக பெற்றுள்ளது. சுமார் 20 ஆண்டுகளாக சாதாரண மற்றும் ஒப்பந்த அடிப்படையில் பணியாற்றி வரும் சுமார் 2500 பேருக்கு நிரந்தர நியமனம் வழங்கவும் பதவி உயர்வு மற்றும் போனஸ் ஆகியவற்றைப் பெறவும் முடிந்தது என்று இலங்கை சீனி நிறுவனத்தின் தலைவர் தெரிவித்தார்.

ஜனாதிபதி அவர்கள் முன்னெடுத்து வரும் நிகழ்ச்சித் திட்டத்தால் நட்டத்தில் இயங்கிய பல நிறுவனங்களை இலாபகரமான நிறுவனங்களாக மாற்ற முடிந்தது என்று தலைவர்கள் சுட்டிக்காட்டினர்.

நிறுவனங்கள் அடைய வேண்டிய இலக்குகள் தொடர்பில் “சுபீட்சத்தின் நோக்கு” கொள்கை திட்டத்தில் தெளிவாகக் கூறுப்பட்டுள்ளது. அமைச்சரவை, இராஜாங்க அமைச்சுகளுக்கு தொடர்புடைய நிறுவனங்கள் மற்றும் அடைய வேண்டிய முன்னேற்றம் ஆகியவை பற்றி தெளிவாகக் கூறப்பட்டுள்ளன. கூட்டுப் பொறுப்புடன் பணியாற்றி மக்கள் விரும்பும் கொள்கை மாற்றத்தை அடைய அர்ப்பணிப்புடன் செயற்படுமாறு ஜனாதிபதி அவர்கள் தலைவர்களிடம் கூறினார்.

ஜனாதிபதியின் செயலாளர் பி.பி. ஜயசுந்தர, ஜனாதிபதியின் தலைமை ஆலோசகர் லலித் வீரதுங்க, நிதி அமைச்சின் செயலாளர் எஸ்.ஆர். ஆட்டிகல ஆகியோரும் இந்த நிகழ்வில் கலந்து கொண்டனர்.

ஜனாதிபதி ஊடகப் பிரிவு

2021.04.05 அன்று இடம்பெற்ற அமைச்சரவைக் கூட்டத்தில் எட்டப்பட்ட தீர்மானங்கள்

: புதன்கிழமை, 07 ஏப்ரல் 2021

2021.04.05 அன்று இடம்பெற்ற அமைச்சரவைக் கூட்டத்தில் எட்டப்பட்ட தீர்மானங்கள் பின்வருமாறு:

(அரசாங்க தகவல் திணைக்களத்தின் பிரச்சார பிரிவினால் சிங்கள மொழியிலான அமைச்சரவை தீர்மான ஆவணம் தமிழ் மொழியில் மொழிபெயர்க்கப்பட்டுள்ளது.)

01. தேசிய சுவடிகள் கூடத்தில் டிஜிட்டல் காப்பகத்தை உருவாக்கல்

1640 தொடக்கம் ஒல்லாந்தர் மற்றும் ஆங்கிலேயர் ஆட்சிக் காலத்தில் மற்றும் சுதந்திரத்தின் பின்னர் மிகவும் பெறுமதியான ஆவணங்கள் மற்றும் 19 ஆம் நூற்றாண்டு தொடக்கம் இலங்கையில் வெளியிடப்பட்ட பத்திரிகைகள் உள்ளிட்ட அனைத்து வெளியீடுகளதும் சட்ட ரீதியான காப்புக்கள் தேசிய சுவடிகள் கூடத்தில் பாதுகாத்து வைக்கப்பட்டுள்ளன. இங்கு நாளாந்தம் அதிகளவான ஆவணங்கள் சேர்ந்த வண்ணம் இருப்பதுடன், அதற்காக டிஜிட்டல் வெளியீடுகள் மற்றும் ஆவணங்கள், வானொலி மற்றும் தொலைக்காட்சி ஒலிஇஒளிபரப்புக்கள், இணையத்தளங்கள் மற்றும் மின்னஞ்சல் போன்றன உள்ளடங்கும். அதற்கமைய குறித்த டிஜிட்டல் ஆவணங்களின் நம்பகத்தன்மை மற்றும் போலியற்றத்தன்மையை உறுதிப்படுத்தும் வகையில் டிஜிட்டல் காப்பு தொடர்பான சர்வதேச தரநியமங்களை பின்பற்றி டிஜிட்டல் காப்பகத்தை அமைப்பதற்காக புத்தசாசன, மதங்கள் மற்றும் கலாச்சார விவகார அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

02. மட்டக்களப்பு, வவுனியா மற்றும் யாழ்ப்பாணம் போன்ற இடங்களில் விசேட பொருளாதார மத்திய நிலையங்களை திறந்து வைத்தல்

விவசாயிகளின் உற்பத்திகளை நேரடியாக சந்தைப்படுத்துவதற்கும், போட்டித்தன்மை மூலம் மிகவும் வினைத்திறனான விலைப் பொறிமுறையை நடைமுறைப்படுத்துவதற்கும் இயலுமான வகையில் விசேட பொருளாதார மத்திய நிலையங்கள் ஆரம்பிக்கப்பட்டுள்ளதுடன், அவ்வாறான 15 பொருளாதார மத்திய நிலையங்கள் நாடளாவிய ரீதியில் இயங்கி வருகின்றது. அதற்கமைய மட்டக்களப்பு மற்றும் வவுனியா விசேட பொருளாதார மத்திய நிலையங்களின் கட்டுமானப் பணிகள் பூர்த்தியடைந்துள்ளதுடன், யாழ்ப்பாண விசேட பொருளாதார மத்திய நிலையத்தின் முதலாம் கட்ட கட்டுமானப்பணிகள் தற்போது பூர்த்தியடைந்துள்ளன. குறித்த விசேட பொருளாதார மத்திய நிலையத்தின் நிர்வாக மற்றும் முகாமைத்துவ நிதியத்தை நிறுவுவதற்கும் முறையான பொறிமுறையை பின்பற்றி குறித்த விசேட பொருளாதார மத்திய நிலையத்தின் வியாபார அலகுகளை ஒதுக்கி வழங்குவதற்கும் கமத்தொழில் அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

03. தேயிலை செய்கையை ஊக்குவிப்பதற்காக தற்போது வழங்கப்பட்டு வரும் மானியத் தொகையை திருத்தம் செய்தல்

2019 ஆம் ஆண்டில் மொத்த தேயிலை உற்பத்தி 300 மில்லியன் கிலோகிராம்கள் ஆவதுடன், அவற்றில் 75% வீதமான 225 மில்லியன் கிலோகிராம்கள் சிறிய தேயிலை தோட்ட உரிமையாளர்களால் உற்பத்தி செய்யப்படுகின்றன. தேயிலை உற்பத்தியை உயர் மட்டத்தில் பேணுவதற்காக சிறிய தேயிலை தோட்டக்காணிகளில் உற்பத்திப்பெருக்கை அதிகரிக்க வேண்டிய தேவை கண்டறியப்பட்டுள்ளது. தேயிலையை மீள் பயிரிடல் மூலம் வருமானம் ஈட்டுவதற்காக 04 வருடங்கள் எடுப்பதாலும், அதற்கான செலவு அதிகமானதாலும் மீள் பயிரிடல் மற்றும் புதிய பயிரிடல் போன்றவற்றுக்கு போதுமானளவு ஆர்வம் காட்டாமையால் 2025 ஆம் ஆண்டளவில் 360 மில்லியன் கிலோகிராம்கள் உற்பத்தி இலக்கை அடைவதற்காக போதுமானளவு ஊக்குவிப்புக்கள் வழங்கவேண்டியுள்ளது. அதற்கமைய தேயிலை மீள்பயிரிடல் மானியத் தொகை ஹெக்ரயர் ஒன்றுக்கு புதிய பயிரிடல் மானியத் தொகையாக ஹெக்ரயர் ஒன்றுக்கு 400,000 ரூபாய்களில் இருந்து 500,000 ரூபாய் வரைக்கும் அதிகரிப்பதற்காக பெருந்தோட்டத்துறை அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

04. தேசிய நீர்வழங்கல் மற்றும் வடிகாலமைப்புச் சபையின் 2021-2025 ஒருங்கிணைந்த திட்டத்தின் கருத்திட்டங்களை நடைமுறைப்படுத்துவதற்காக துரித பெறுகைச் செயன்முறையை நடைமுறைப்படுத்தல்

2021-2025 ஒருங்கிணைந்த திட்டத்தில் உள்வாங்கப்பட்டுள்ள நீர்வழங்கல் மற்றும் வடிகாலமைப்பு கருத்திட்டத்தை நடைமுறைப்படுத்துவதற்காக 2021 ஜனவரி மாதம் 11 ஆம் திகதி இடம்பெற்ற அமைச்சரவை கூட்டத்தில் அங்கீகாரம் வழங்கப்பட்டுள்ளது. முன்மொழியப்பட்ட கருத்திட்டத்தை நடைமுறைப்படுத்துவதன் மூலம் 2025 இல் நாடளாவிய ரீதியில் 78.8% வீதமான வீட்டு அலகுகளின் குடிநீர் தேவையை பூர்த்தி செய்வதற்கு திட்டமிடப்பட்டுள்ளது. குறித்த இலக்கை அடைவதற்காக நீர் விநியோகக் குழாய்கள் 40000 கிலோ மீற்றர்கள் வரை இடுவதற்கும் சமகால உற்பத்தி இயலளவு நாளொன்றுக்கு 2.35 மில்லியன் கனமீற்றர்களாக அதிகரிப்பதற்கும் திட்டமிடப்பட்டுள்ளது. நீர் விநியோகத் திட்டங்களில் காணப்படும் சிக்கலான தன்மையால் தேசிய நீர்வழங்கல் மற்றும் வடிகாலமைப்புச் சபையின் பெறுகைச் செயன்முறை ஏனைய நிறுவனங்களை விட அதிக காலம் எடுப்பதாக தெரியவந்துள்ளது. அதனால் நீர்க்குழாய்கள் மற்றும் உபகரணங்களின் பெறுகைச் செயன்முறையை ஒருங்கிணைந்த பொறிமுறையின் கீழ் வழங்குவதற்கும் மற்றும் அதற்கான அலகுக் கட்டண முறையை அறிமுகப்படுத்துவதற்கும் நீர் குழாய்கள் இடப்படும் ஒப்பந்தத்தை வழங்கும் போது அலகுக்கட்டண முறையை அறிமுகப்படுத்துவதற்கும் நீர்வழங்கல் அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

05. 2021/2022 ஆண்டுக்கான சிறைச்சாலைகள் திணைக்களத்துக்கு உணவுப்பொருள் விநியோகத்துக்கான ஒப்பந்தத்தை வழங்கல்

2021/2022 ஆண்டுக்கான சிறைச்சாலைகள் திணைக்களத்துக்கு உணவுப்பொருள் விநியோகத்துக்காக ஒப்பந்தக்காரரை தெரிவுசெய்வதற்காக தேசிய போட்டித்தன்மை விலைமனு கோரப்பட்டுள்ளது. அதற்கமைய அமைச்சரவையால் நியமிக்கப்பட்டுள்ள பெறுகைக் குழுவின் பரிந்துரைக்கமைய 2021 ஏப்ரல் மாதம் 16 ஆம் திகதி தொடக்கம் 2022 ஏப்ரல் மாதம் 15 ஆம் திகதி வரை சிறைச்சாலைகள் திணைக்களத்துக்கு உணவுப்பொருட்கள் விநியோகத்துக்காக தெரிவுசெய்யப்பட்ட விநியோகத்தர்களுக்கு ஒப்பந்தங்களை வழங்குவதற்காக நீதி அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

06. 2005 ஆம் ஆண்டு 38 ஆம் இலக்க சுற்றுலா நடவடிக்கை சட்டத்தை முடிவுறுத்தி புதிய சுற்றுலா நடவடிக்கை சட்டத்தை கொண்டுவரல்

2005 ஆம் ஆண்டு 38 ஆம் இலக்க சுற்றுலா நடவடிக்கை சட்டத்தின் ஏற்பாடுகளுக்கமைய ஒட்டுமொத்த சுற்றுலாத்துறையை 04 முக்கிய நிறுவனங்களாக பிரித்து இலங்கை சுற்றுலா அபிவிருத்தி அதிகார சபை, இலங்கை சுற்றுலா மேம்பாட்டு பணியகம், இலங்கை சம்மேளனப் பணியகம் மற்றும் இலங்கை சுற்றுலாத்துறை மற்றும் ஹோட்டல் முகாமைத்துவ நிறுவனம் போன்றன நிறுவப்பட்டுள்ளன. ஆனாலும் ஒட்டுமொத்த சுற்றுலாத்துறையும் 04 நிறுவனங்களுக்கு பிரிந்து உள்ளமையால் ஒருங்கிணைப்பு நடவடிக்கைகளில் பிரச்சினை மேலெழுதல் மற்றும் வளங்கள் வீண்விரயம் போன்றன இடம்பெறுவதாக தெரியவந்துள்ளது. அதற்கமைய சுற்றுலாத்துறையின் நிலைபேறான அபிவிருத்தியை உறுதிப்படுத்துவதற்காக 2005 ஆம் ஆண்டு 38 ஆம் இலக்க சுற்றுலா நடவடிக்கை சட்டத்தை முடிவுறுத்தி புதிய சுற்றுலா நடவடிக்கை சட்டத்தின் சட்டமூலத்தை தயாரிப்பதற்கும் அதன்மூலம் இலங்கை சுற்றுலா அபிவிருத்தி அதிகார சபை, இலங்கை சுற்றுலா மேம்பாட்டு பணியகம், இலங்கை சம்மேளனப் பணியகம் போன்றவற்றை இணைத்து 'இலங்கை சுற்றுலாத்துறை அதிகார சபை' எனும் பெயரில் புதிய அதிகாரசபையை நிறுவுவதற்கு தேவையான நடவடிக்கைகளை எடுப்பதற்கு சுற்றுலாத்துறை அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

07. 2017 ஆம் ஆண்டு 12 ஆம் இலக்க அந்நிய செலாவணி சட்டத்தின் கீழ் 'விசேட வைப்புக் கணக்கு' திறப்பதற்காக வழங்கப்பட்டுள்ள கால எல்லையை நீடித்தல்

அந்நிய செலாவணியை எமது நாட்டுக்கு அனுப்புவதை ஊக்குவிப்பதற்காக 2020 ஏப்ரல் மாதம் தொடக்கம் நடைமுறையிலுள்ள விசேட வைப்புக் கணக்குக்கான ஏற்பாடுகள் 2017 ஆம் ஆண்டு 12 ஆம் இலக்க அந்நிய செலாவணி சட்டத்தின் கீழ் குறித்த கட்டளைகள் வெளியிடப்பட்டுள்ளன. அவ்வாறே குறித்த கணக்குகளில் காணப்படும் வைப்புக்களை தொடர்ந்து பேணும் நோக்கில் மேலதிக வட்டியை வழங்குவதற்காக அமைச்சரவை அங்கீகாரம் வழங்கப்பட்டுள்ளது. 2021 மார்ச் மாதம் வரையில் குறித்த வைப்புக் கணக்குகளில் 360.3 மில்லியன் அமெரிக்க டொலர்கள் வைப்பிலிடப்பட்டுள்ளது. குறித்த விசேட வைப்புக் கணக்குகளை திறப்பத்தற்கான கால எல்லை 2021 ஏப்ரல் மாதம் 07 ஆம் திகதியுடன் முடிவடைய இருப்பதால் தொடர்ந்து பணத்தை வைப்பிலிடுவதற்கு விருப்பம் தெரிவிக்கும் தரப்பினர்களை ஊக்குவிக்கும் வகையில் குறித்த காலவரையறையை தொடர்ந்து நீடிப்பதற்காகவும், அதற்காக அந்நிய செலாவணி சட்டத்தின் ஏற்பாடுகளின் கீழ் கட்டளைகளை பிறப்பிப்பதற்கும் நிதி அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

08. கொவிட் 19 பரவலைத் தடுப்பதற்காக 06 மில்லியன் 'ஸ்புட்னிக் v' தடுப்பூசிகளை கொள்வனவு செய்தல்

அமைச்சரவையால் நியமிக்கப்பட்ட பேச்சுவார்த்தை மற்றும் உடன்படிக்கை குழுவின் பரிந்துரைக்கமைய 07 மில்லியன் 'ஸ்புட்னிக் v ' தடுப்பூசிகளை, ஒரு தடுப்பூசி 9.95 அமெரிக்க டொலர்கள் வீதம் 69.65 மில்லியன் அமெரிக்க டொலர்களுக்கு கொள்வனவு செய்வதற்காக 2021 மார்ச் மாதம் 23 ஆம் திகதி இடம்பெற்ற அமைச்சரவை கூட்டத்தில் அங்கீகாரம் வழங்கப்பட்டுள்ளது. குறித்த தடுப்பூசியின் அளவுக்கு மேலதிகமாக 06 மில்லியன் 'ஸ்புட்னிக் v' தடுப்பூசிகளை கொள்வனவு செய்வதற்காகவும் சுகாதார அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

“கிராமத்துடன் கலந்துரையாடல்” ஜனாதிபதி வடக்கிற்கு விஜயம்…

: ஞாயிற்றுக்கிழமை, 04 ஏப்ரல் 2021

வவுனியா நீர் பிரச்சினைக்கு ஒரு வருடத்தில் தீர்வு.…
பிரதேச பாடசாலைகளின் பல பிரச்சினைகளுக்கு தீர்வு…
சாசனத்திற்கு பிள்ளைகளை வழங்கிய குடும்பங்களுக்கு தேவையின் அடிப்படையில் ஒரு இலட்சம் வேலைவாய்ப்பு திட்டத்தின் கீழ் தொழில்…

நான் முக்கியமல்ல, என்னை ஆட்சிக்கு கொண்டு வந்த கொள்கையே முக்கியமானது…

தற்போதைய எதிர்ப்புகள் அந்த கொள்கைக்கு எதிரானவையே.…

இறக்குமதி செய்யப்படும் நுகர்வு பொருட்களின் தரம் தொடர்பில் தொடர்ச்சியாக பரிசீலனை….

வெள்ளை வேன், முதலைகள், சுறாக்கள் பற்றி போலிப் பிரச்சாரங்களை முன்னெடுத்தவர்கள் இன்று சுற்றாடல் பற்றி பேசுகின்றனர்..

“கோட்டாபய ராஜபக்ஷ முக்கியமல்ல, என்னை இந்த இடத்திற்கு கொண்டு வந்த கொள்கையும் பலமுமே முக்கியமானதாகுமென்று நான் எப்போதும் கூறி வருகின்றேன். நாம் அதனையே பாதுகாக்க வேண்டும். எதிர்சக்திகள் முன்னெடுத்துவரும் போலிப் பிரச்சாரங்களின் நோக்கம் இந்த கொள்கையை தோல்வியுறச் செய்வதாகும். மக்களுக்கு வழங்கிய உறுதிமொழிகளையே நான் நிறைவேற்றி வருகிறேன்” என்று ஜனாதிபதி கோட்டாபய ராஜபக்ஷ அவர்கள் குறிப்பிட்டார்.

தான் அதிகாரத்திற்கு வரும்போது வீழ்ச்சியுற்றிருந்த பொருளாதாரம், கொவிட் நோய்த் தொற்றுக்கு மத்தியலும்கூட தேசிய பசுமைப் பொருளாதாரமாக கட்டியெழுப்பப்பட்டிருப்பதாக ஜனாதிபதி அவர்கள் தெரிவித்தார். தனது பதவிக்காலத்தில் மக்களின் பிரச்சினைகளை தீர்க்க முடியாமல் போகுமானால் தன்மீது குற்றம் சுமத்துமாறு ஜனாதிபதி அவர்கள் மக்களிடம் கேட்டுக்கொண்டார்.

இன்று (03) முற்பகல் வட மாகாணத்தின் வவுனியா மாவட்டத்தில் வவுனியா வடக்கு பிரதேச செயலகத்திற்குட்பட்ட வெடிவைத்தகல்லு கிராம சேவகர் பிரிவின் போகஸ்வெவ மகா வித்தியாலய வளாகத்தில் இடம்பெற்ற “கிராமத்துடன் கலந்துரையாடல்” 17வது நிகழ்ச்சித்திட்டத்தில் கலந்துகொண்டு உரையாற்றும்போதே ஜனாதிபதி அவர்கள் இதனை தெரிவித்தார்.

தற்போது பேசுபொருளாக உள்ள விடயம் குறித்து கவனத்திற்கு கொண்டு வந்த ஜனாதிபதி அவர்கள், நுகர்வுக்காக இறக்குமதி செய்யப்படும் அனைத்து பொருட்களினதும் தரம் தொடர்பில் தொடர்ச்சியாக பரிசீலனைக்குட்படுத்தப்படுவதாக தெரிவித்தார். இறக்குமதி செய்யப்பட்ட ஒருதொகை தேங்காய் எண்ணெய் நுகர்வுக்கு பொருத்தமானதல்ல என அண்மையில் கண்டறியப்பட்டிருப்பது இந்த பரிசீலனையின் பெறுபேறாகவே ஆகும். பரிசீலனையை தொடர்ச்சியாக மேற்கொண்டு நுகர்வு பொருட்களின் தரத்தை உறுதிப்படுத்துவது சம்பந்தப்பட்ட நிறுவனங்களின் பொறுப்பாகுமென்றும் ஜனாதிபதி அவர்கள் சுட்டிக்காட்டினார்.

தான் அதிகாரத்திற்கு வந்து குறுகிய காலப்பகுதியில் மேற்கொண்டுள்ள பணிகள் பற்றி விளக்கிய ஜனாதிபதி அவர்கள், சுற்றாடலுக்கு பாரிய அழிவை ஏற்படுத்திவந்த செம்பனை அல்லது முள்தேங்காய் பயிர்ச் செய்கையை முழுமையாக தடை செய்துள்ளதாக குறிப்பிட்டார். தேங்காய் எண்ணெய் நுகர்வில் சாதகமான பெறுபேறுகளை அறிந்து பாம் ஒயில் இறக்குமதி செய்வது தடை செய்யப்பட்டது. நாட்டினுள் போதைப்பொருள் கொண்டு வரப்படுவதற்கான வழிகளும் மூடப்பட்டுள்ளன. சுற்றி வளைப்புகளின் மூலம் போதைப்பொருள் மற்றும் நுகர்வுக்கு பொருத்தமற்ற பொருட்களை கைப்பற்றுவதற்கு முடிந்துள்ளது.

தான் அதிகாரத்திற்கு வரும்போது வெள்ளைவேன், முதலைகள், சுறா மீன்கள் பற்றி எல்லாம் போலிப் பிரச்சாரங்களை சமூகமயப்படுத்திய குழுக்கள் தமது போலிப் பிரச்சாரங்கள் வெற்றியளிக்காத நிலையில் தற்போது சுற்றாடல் பற்றி போலியான மற்றும் மோசமான கருத்துக்களை சமூகமயப்படுத்தி வருகின்றனர். நிறுவனமயப்பட்ட உள்நாட்டு, வெளிநாட்டு சக்திகள் அரசாங்கத்திற்கும் தனக்கும் எதிராக முன்னெடுத்துவரும் போலிப் பிரச்சாரங்களை தோல்வியுறச் செய்து தன்னை ஜனாதிபதி பதவிக்கு கொண்டு வந்த கொள்கையை பாதுகாக்க வேண்டுமெனவும் ஜனாதிபதி அவர்கள் குறிப்பிட்டார்.

தமது பெற்றோர்களை கவனித்துக்கொள்ள வேண்டியிருக்கின்ற காரணத்தினால் சில பிக்குகளுக்கு சாசனப் பணியை மேற்கொள்வது சிரமமாக உள்ளது. எனவே சாசனத்திற்காக பிள்ளைகளை வழங்கியுள்ள குடும்பங்களுக்கு தேவையின் அடிப்படையில் ஒரு இலட்சம் வேலைவாய்ப்புகள் திட்டத்தின் கீழ் தொழில் ஒன்றை வழங்க தீர்மானிக்கப்பட்டிருப்பதாகவும் ஜனாதிபதி அவர்கள் தெரிவித்தார்.

வவுனியா மாவட்டத்தில் நீர் பற்றாக்குறை குறித்து பொதுமக்கள் முன்வைத்த கருத்துக்களை செவிமடுத்த ஜனாதிபதி அவர்கள், பல தசாப்தங்களாக இருந்துவரும் குடிநீர்ப் பிரச்சினைக்கு ஒரு வருடத்திற்குள் தீர்வை வழங்க நடவடிக்கை எடுக்குமாறு அதிகாரிகளுக்கு பணிப்புரை விடுத்தார்.

மாவட்டத்தின் சனத்தொகையில் 92 வீதமானவர்கள் குடிநீர்ப் பிரச்சினையினால் பாதிக்கப்பட்டுள்ளனர். துரித கருத்திட்டமாக நடைமுறைப்படுத்தப்படும் நீர்வழங்கல் முன்மொழிவு முறைக்காக 60 பில்லியன் ரூபா ஒதுக்கப்பட்டுள்ளது. பிரதேசத்தின் அனைத்து குழாய் கிணறுகளையும் புனரமைத்தல், பல சமூக நீர்த்திட்டங்களை ஆரம்பித்தல் ஆகியவற்றை உடனடி தீர்வாக நடைமுறைப்படுத்துவதற்கு தீர்மானிக்கப்பட்டது.

மாவட்ட பாடசாலைகளின் ஆசிரியர் பற்றாக்குறை, கட்டிடங்கள் மற்றும் கதிரை, மேசைகள் பற்றாக்குறை விரைவாக தீர்க்கப்பட வேண்டிய முக்கியமான பிரச்சினையாக மக்கள் சுட்டிக்காட்டினர். இது பற்றிய தகவல்கள் மற்றும் புள்ளி விபரங்களை பெற்று தேவைக்கேற்ப நிதி ஒதுக்குமாறு ஜனாதிபதி அவர்கள் கல்வி அமைச்சுக்கு பணிப்புரை வழங்கினார்.

“கிராமத்துடன் கலந்துரையாடல்” திட்டம் 2020 செப்டம்பர் 25 அன்று பதுளை மாவட்டத்தில் ஆரம்பிக்கப்பட்டது. மாத்தளை, இரத்தினபுரி, அனுராதபுரம், அம்பாறை, பொலன்னறுவை, களுத்துறை, மொனராகலை, கேகாலை, கண்டி, புத்தளம், திருகோணமலை, குருணாகல், காலி, நுவரெலியா மற்றும் மாத்தறை மாவட்டங்களை உள்ளடக்கி கடந்த நிகழ்ச்சிகள் ஏற்பாடு செய்யப்பட்டன. இதுவரை சரியான கவனம் செலுத்தப்படாத நகரத்திற்கு வெளியே உள்ள தொலைதூர கிராமங்களைச் சேர்ந்த மக்களை சந்தித்து, அவர்களின் பிரச்சினைகளை விசாரித்து, அச்சந்தர்ப்பத்திலேயே அதிகாரிகளின் கவனத்திற்குக் கொண்டு வந்து தீர்வுகளை வழங்குவதே ஜனாதிபதியின் நோக்கமாகும். தீர்ப்பதற்கு காலம் செல்லும் பிரச்சினைகள் பின்னர் நடவடிக்கை எடுக்கப்படுவதற்காக குறித்துக்கொள்ளப்படும். கிராம மக்களிடம் சென்று, அவர்களின் பிரச்சினைகளைக் கேட்டறிந்து, அவர்களின் முன்மொழிவுகளில் இருந்து தீர்வுகளைக் காண்பதும் இந்த திட்டத்தின் நோக்கமாகும்.

வவுனியா நகரில் இருந்து 38 கிலோ மீற்றர் தூரத்தில் கிழக்கு மற்றும் தெற்கில் அனுராதபுர மாவட்டத்தின் பதவிய, கெப்பித்திகொல்லாவ பிரதேச செயலகப் பிரிவிற்கும் மேற்கில் நந்திமித்திர கிராமத்தையும் எல்லையாகக் கொண்டு வெடிவைத்தகல்லு கிராம சேவகர் பிரிவு அமைந்துள்ளது. போகஸ்வெவ 1, போகஸ்வெவ 2, கம்பிலிவெவ, வெடிவைத்தகல்லு, கோவில்புளியங்குளம் மற்றும் வெஹரதென்ன ஆகிய கிராமங்கள் இதில் அடங்குகின்றன. 478 குடும்பங்கள் வசிக்கின்ற வெடிவைத்தகல்லு கிராமத்தின் சனத்தொகை 1520 ஆகும். நெல், சேனைப் பயிர்ச் செய்கை இம்மக்களின் பிரதான வாழ்வாதாரமாகும்.

கிராமத்துடன் உரையாடல் நிகழ்ச்சித்திட்டத்தில் பங்குபற்றுவதற்காக போகஸ்வெவ கிராமத்திற்கு வருகை தந்த ஜனாதிபதி அவர்கள், அங்கிருந்து போகஸ்வெவ மகா வித்தியாலயம் வரையில் செல்லும் வீதியின் இருபுறங்களிலும் திரண்டிருந்த மக்களுடன் உரையாடி பிரதேசத்தின் தகவல்கள் மற்றும் பிரச்சினைகள் பற்றி கேட்டறிந்தார்.

மொபிடல் நிறுவனம் போகஸ்வெவ மகா வித்தியாலயத்திற்கும் நெடுங்கேணி மகா வித்தியாலயத்திற்கும் அன்பளிப்பாக வழங்கிய 02 மடிக் கனணிகள் மற்றும் டயலொக் நிறுவனம் அன்பளிப்பாக வழங்கிய தொலைக்காட்சி மற்றும் இணைப்பு ஆகியவற்றை ஜனாதிபதி அவர்கள் அதிகாரிகளிடம் கையளித்தார்.

“கிராமத்துடன் கலந்துரையாடல்” நிகழ்ச்சி நடைபெறும் அனைத்து பகுதிகளிலும் பாடசாலை நூலக வசதிகளை மேம்படுத்துவது ஜனாதிபதி அவர்களின் மற்றொரு நோக்கமாகும். “அறிவுப் பலம் கொண்ட சிறுவர் தலைமுறை’ என்ற தலைப்பில் ஜனாதிபதி அவர்கள் பாடசாலைகளுக்கு புத்தகங்களை வழங்கினார். ஒரு பாடசாலைக்கு பல்வேறு பாடத் துறைகளில் 500 புத்தகங்கள் வழங்கப்படுகின்றன.

உரிமை இன்றி இதுவரை அரச காணிகளை பயன்படுத்தி வந்த குடும்பங்களுக்கு உரிமைப் பத்திரங்களை வழங்கும் திட்டம் அண்மையில் ஆரம்பித்து வைக்கப்பட்டது. இன்று ஜனாதிபதி அவர்கள் வவுனியா வடக்கு பிரதேச செயலாளர் பிரிவுக்கு சொந்தமான 5 குடும்பங்களுக்கு உரிமைப் பத்திரங்களை வழங்கி வைத்தார்.

இலங்கை தொழிற்பயிற்சி அதிகார சபையின் பாடநெறிகளை பயில்வதற்காக ஜனாதிபதி அவர்களினால் 03 புலமைப்பரிசில்கள் வழங்கப்பட்டன.

போகஸ்வெவ மற்றும் சுற்றியுள்ள கிராமங்களின் 37 கிலோமீற்றர் வீதி மற்றும் பிரதேசத்தின் இரண்டு முக்கிய பாலங்களை அபிவிருத்தி செய்யும் பணி வீதி அபிவிருத்தி அதிகார சபையிடம் ஒப்படைக்கப்பட்டது.

போகஸ்வெவ கிராமத்தில் 16 குளங்கள், கிவுல் ஓய திட்டம் உள்ளிட்ட 17 குளங்களை புனர்நிர்மாணம் செய்வதற்கு ஜனாதிபதி அவர்கள் பணிப்புரை விடுத்தார்.

தொல்பொருள் மரபுரிமைகள் பாதுகாக்கப்படும் வகையில் கிராமத்தின் விகாரைகள் அபிவிருத்தி செய்யப்பட வேண்டுமென்று ஜனாதிபதி அவர்கள் குறிப்பிட்டார்.

காட்டு யானைகளின் அச்சுறுத்தலுக்கு முகங்கொடுத்துள்ள கிராமங்களை பாதுகாப்பதற்காக மின்சார வேலிகளை அமைக்கவும் தீர்மானிக்கப்பட்டது.

போகஸ்வெவ ஆரம்ப சுகாதார மத்திய நிலையத்தை தங்கியிருந்து சிகிச்சை பெறக்கூடிய வகையில் அபிவிருத்தி செய்ய வேண்டியதன் தேவையும் வலியுறுத்தப்பட்டது.

பிரதேச வைத்தியசாலைகளில் நிலவும் வைத்தியர், தாதியர் மற்றும் ஏனைய ஊழியர் பற்றாக்குறையை நிவர்த்தி செய்வதற்கும் உட்கட்டமைப்பு வசதிகள் மற்றும் தேவைகளை நிறைவேற்றுவதற்கும் ஜனாதிபதி அவர்கள் பணிப்புரை விடுத்தார்.

நீண்டகாலமாக இருந்துவரும் காணி உரிமைகள் பற்றிய பிரச்சினைகளை விரைவாக தீர்த்து, விவசாய நடவடிக்கைகளில் ஈடுபடுவதற்கு கிராமவாசிகளுக்கு வசதிகளை செய்துகொடுப்பது பற்றியும் விரிவாக கலந்துரையாடப்பட்டது.

வட மாகாண ஆளுநர் திருமதி. பீ.எஸ்.எம். சார்ல்ஸ், வவுனியா மாவட்ட பாராளுமன்ற உறுப்பினர்களான காதர் மஸ்தான், குலசிங்கம் திலீபன், மாவட்ட மக்கள் பிரதிநிதிகள், ஜனாதிபதியின் தலைமை ஆலோசகர் லலித் வீரதுங்க, அமைச்சுக்களின் செயலாளர்கள், பாதுகாப்பு பிரதானிகள் உள்ளிட்டோர் இந்நிகழ்வில் கலந்துகொண்டனர்.

வவுனியா மாவட்டத்தில் போகஸ்வெவ மகா வித்தியாலய வளாகத்தில் இடம்பெற்ற “கிராமத்துடன் கலந்துரையாடல்” நிகழ்ச்சித்திட்டத்தில் கலந்துகொண்டு ஜனாதிபதி கோட்டாபய ராஜபக்ஷ அவர்கள் ஆற்றிய உரை. (03.04.2021)

நேற்று மாலை நான் பேராசிரியர் சங்கைக்குரிய இந்துராகாரே தம்மரத்தன தேரரை சந்திப்பதற்காக விகாரைக்குச் சென்றிருந்தேன். தேரர் அவர்கள் என்னிடம் “நீங்கள் நாளை ஒரு பின்தங்கிய கிராமத்திற்கு செல்கிறீர்கள் அல்லவா. நான் உங்களிடம் ஒரு கோரிக்கையை முன்வைக்க விரும்புகின்றேன். எமது தேரர்கள் குறிப்பாக இளம் பிக்குகள் அவர்களது பெற்றோர்களை கவனித்துக்கொள்ள வேண்டிய பொறுப்பு உள்ளது. சிலபோது அவர்கள் மிகுந்த கஷ்டங்களுக்குள்ளாகிறார்கள். அவர்களது பெற்றோர்களுக்காக அந்த குடும்பங்களுக்கு ஒரு இலட்சம் வேலை வாய்ப்பு நிகழ்ச்சித்திட்டத்தின் கீழ் தொழில் ஒன்றை வழங்குங்கள் என உங்களிடம் கேட்டுக்கொள்கிறேன்” எனக் குறிப்பிட்டார். அந்த கோரிக்கையை நிறைவேற்றுவதாக நான் தேரரிடம் உறுதியளித்தேன். நாம் அதனை நிறைவேற்றுவதற்கு தயாராக உள்ளோம். அதேபோன்று குறிப்பாக இதுபோன்ற பின்தங்கிய பகுதிகளில் உள்ள விகாரைகளை முன்னேற்றுவதற்கும் விசேட கவனம் செலுத்தப்பட்டுள்ளது.

எமது அரசாங்கத்தின் முக்கிய கொள்கை வறுமையை ஒழிப்பதாகும். அதனால்தான் வறிய கிராமங்களுக்கு செல்கின்றோம். நாட்டின் சுமார் 75 வீதமானவர்கள் கிராமிய மக்கள். அவர்களில் பெரும்பாலானவர்கள் மாவட்ட செயலாளர் குறிப்பிட்டதைப்போன்று இப்பிரதேசத்தில் சுமார் 85 வீதமானவர்கள் விவசாயத்தில் ஈடுபடுகின்றனர். அவர்களது வாழ்வாதாரத்தை மேம்படுத்துவதற்காக நாம் கொள்கைகளை வகுத்துள்ளோம். நாம் எல்லா சந்தர்ப்பங்களிலும் விவசாயத்திற்கு முன்னுரிமையளித்து செயற்படுகின்றோம். நாம் உர மானியத்தை இலவசமாக வழங்கியுள்ளோம். நெல்லுக்கு உத்தரவாத விலையை 50 ரூபா வரை அதிகரித்துள்ளோம். வெளிநாடுகளில் இருந்து இறக்குமதி செய்யப்படும் 16 வகையான பயிர்களை உள்நாட்டில் உற்பத்தி செய்வதற்கு தீர்மானித்து அவற்றின் இறக்குமதியை முற்றாக தடை செய்துள்ளோம். இந்த நிதி முன்னர் வெளிநாடுகளுக்கே சென்றது. நாம் இப்போது அவற்றை முழுமையாக தடை செய்துள்ளோம். சோளம், பயறு, கௌப்பி போன்ற தானியங்கள் இப்போது பெருமளவில் உள்நாட்டில் உற்பத்தி செய்யப்படுகின்றன. கிராமிய மக்கள் இந்த வாய்ப்பை பயன்படுத்திக்கொள்ள வேண்டும். இன்று நெல்லுக்கு சிறந்த விலை கிடைக்கிறது. அதேபோன்று ஏனைய பயிர்களுக்கும் நல்ல விலை கிடைக்கிறது. இந்த பயிர்ச் செய்கையின் மூலம் எமது இளைஞர், யுவதிகளுக்கும் சிறந்த வருமானத்தை ஈட்ட முடியும். குறைபாடுகள் உள்ளன. நீர் முகாமைத்துவம் அதுபோன்று நவீன தொழிநுட்பம் அவற்றை நாம் சரி செய்து வருகின்றோம். குறைந்த வருமானம் பெறும் குடும்பங்களுக்கு நிவாரணம் வழைங்குவதற்காகத்தான் வறிய குடும்பங்களுக்கு தகைமைகள், திறமைகள் இல்லாதவர்களுக்கு அரச தொழில் வாய்ப்பை வழங்க நாங்கள் தீர்மானித்தோம்.

மஹிந்த ராஜபக்ஷ ஜனாதிபதி அவர்களின் ஆட்சிக்காலத்தில் யுத்தத்தை முடிவுக்கு கொண்டு வந்து அமைதி ஏற்படுத்தப்பட்டதன் பின்னர் வீதிகள், மின்சாரம் நீர் வசதிகள் போன்ற உட்கட்டமைப்பு வசதிகளை நான்கு வருட குறுகிய காலத்தில் நாம் பாரியளவில் அபிவிருத்தி செய்தோம். அவரது ஆட்சிக்காலத்திலேயே நெடுஞ்சாலைகள் அபிவிருத்தி செய்யப்பட்டன. அந்த அபிவிருத்தி வேலைத்திட்டங்களை முன்கொண்டு சென்று ஒரு இலட்சம் கிலோ மீற்றர் வீதிகளை நிர்மாணிக்கும் பணியினை நாம் முன்னெடுத்து வருகின்றோம்.

அடுத்ததாக 5,000 குளங்களை புனர்நிர்மாணம் செய்யும் வேலைத்திட்டத்தை நாம் ஆரம்பித்திருக்கிறோம். குளக்கட்டமைப்பை புனர்நிர்மாணம் செய்வது விவசாயத்துறைக்கு மிகவும் முக்கியமானதாகும். நீர்ப்பாசனத்துறையை அபிவிருத்தி செய்வதற்கு நாம் பாரிய நிதியை முதலீடு செய்துள்ளோம். பாரிய நீர்ப்பாசனத் திட்டங்கள், சிறிய நீர்ப்பாசனத் திட்டங்களை புனரமைப்பதுடன், கிராமிய மக்களுக்குத் தேவையான உட்கட்டமைப்பு வசதிகளை அபிவிருத்தி செய்வதற்கும் நாம் பாரிய பணிகளை செய்து வருகிறோம்.

குறிப்பாக கிராமிய பாடசாலைகளின் பிள்ளைகளின் கல்வி குறித்து விசேட கவனம் செலுத்தப்பட்டது. இந்த பாடசாலையிலும் சுமார் 30, 40 ஆசிரியர்கள் பற்றாக்குறையாக இருப்பதாக அதிபர் குறிப்பிட்டார். நாம் அதனை துரிதமாக தீர்த்து வைப்போம்.

நாம் 60,000 பட்டதாரிகளுக்கு தொழில்வாய்ப்பை வழங்கினோம். அந்த பட்டதாரிகளை இந்த வெற்றிடங்களுக்கு நியமிக்க வேண்டும். கணிதம், ஆங்கிலம், விஞ்ஞானம் போன்ற பாடங்களை கற்பிப்பதற்கு ஆசிரியர்கள் இல்லை. எனவே வேறு தகைமைகள் உள்ளவர்களுக்கு டிப்ளோமா பட்டதாரிகள், உயர்தர விஞ்ஞானம், ஆங்கிலம் ஆகிய பாடங்களை சித்தியடைந்துள்ளவர்களுக்கு இந்த பாடங்களுக்காக ஆட்சேர்ப்பு செய்வதற்கு கல்வி அமைச்சு கொள்கை ரீதியாக தீர்மானித்துள்ளது. நாட்டின் ஆசிரியர் பற்றாக்குறையை நாம் விரைவாக தீர்த்து வைப்போம்.

எமது அரசாங்கத்தின் கொள்கை சுதேச விவசாயிகள், சுதேச கைத்தொழிலாளர்களை முன்னேற்றுவதாகும். யாழ்ப்பாணத்தில் பெருமளவு சிறிய வெங்காயம் அறுவடை செய்யப்பட்டுள்ளதாக நேற்று என்னிடம் அமைச்சர் டக்ளஸ் தேவானந்தா கூறினார். இந்த வருமானம் கிராமிய விவசாயிகளுக்கு கிடைக்கின்றது. நாங்கள் சிங்களவர்களா, தமிழர்களா, முஸ்லிம்களா என்று பார்ப்பதில்லை. விவசாய சமூகத்திற்கு நிவாரணம் ஒன்றை வழங்கும்போது அது எல்லோருக்கும் கிடைக்கிறது. அவர்களுக்கு உரம் இலவசமாக கிடைக்கிறது. நெல்லுக்கு உத்தரவாத விலை கிடைக்கிறது.

சுமார் 800 குடும்பங்களுக்கு விவசாயம் செய்வதற்கு காணிகள் இல்லை என மாவட்ட செயலாளர் இன்று கூறினார். அந்த பிரச்சினையை ஆராய்ந்து அதற்கு உடனடித் தீர்வை வழங்குவதற்காகவே ஜனாதிபதி என்ற வகையில் நான் கிராமங்களுக்கு வருகின்றேன். சிலருக்கு மக்களின் இந்த பிரச்சினைகள் பற்றி தெரியாது. அது அவர்களுக்கு விளங்குவதும் இல்லை. அவர்கள் இதுபோன்ற பகுதிகளுக்கு வருவதும் இல்லை. நான் காணிகளை வழங்குமாறு கூறினால் நாளை நான் காடுகளை வெட்ட சொன்னதாக கூறுவார்கள். சிலபோது வனப் பாதுகாப்புத்துறை அதிகாரிகளுக்கு கூட இதுபற்றிய தெளிவு இல்லை. வனப்பாதுகாப்பு, வன சீவராசிகள் திணைக்களம், விவசாயம், சுற்றாடல் இந்த அனைத்து அதிகாரிகளும் மக்களுக்காகவே உள்ளனர். இவர்கள் ஒன்றாக இணைந்து தெளிவுடன் மக்களின் பிரச்சினைகளை பார்க்க வேண்டும்.

மஹிந்த ராஜபக்ஷ ஜனாதிபதி அவர்களின் காலத்தில் சுற்றாடலை பாதுகாப்பதற்காக என்னைப்போன்று எவரும் செயற்பட்டது கிடையாது. யுத்தத்தின் பின்னர் கொங்கிரீட் காடுகளாகவும் குப்பை மேடுகளாகவும் இருந்த கொழும்பு நகரத்தை பசுமை நகரமாக மாற்றினோம். சுற்றாடல் என்பது மரம் நடுவது மட்டுமல்ல. தாழ் நிலங்கள், ஈர நிலங்கள் எதனையும் நிரப்புவதற்கு நாங்கள் இடமளிக்கவில்லை. இவைதான் சுற்றாடல். ஆனால் கடந்த 5 வருட காலப் பகுதியில் அத்தகைய நிலங்கள் நிரப்பப்பட்டுள்ளன. இது குறித்து சூழலியலாளர்கள் பேசுவதில்லை. இப்போது சூழலியலாளர்கள் அதிகம் உள்ளனர். அவர்கள் அக்காலத்தில் இருக்கவில்லை. நாங்கள் வந்ததும் ஊடகங்களும் எங்கள் மீது தாக்குதல் தொடுக்கின்றனர். இவை உள்நாட்டு வெளிநாட்டு சக்திகளாகும். அக்காலத்தில் எமக்கு அதோ வெள்ளை வேன் வருகிறது. அதோ முதலைகளுக்கு உணவாக கொடுக்கின்றனர், மனிதர்களை தூக்கிச் சென்று மீன் தொட்டியில் உள்ள சுறாக்களுக்கு உணவாக கொடுக்கின்றனர் எனக் கூறினர் இப்போது பாருங்கள் எங்கே வெள்ளை வேன்களும் இல்லை முதலைகள், சுறாக்களும் இல்லை. அப்டியென்றால் வேறு யாரோதான் இவற்றை செய்திருக்கிறார்கள். இப்போது வேறு ஒன்றை பிடித்துக்கொண்டு இருக்கிறார்கள். இப்போது சுற்றாடல் பற்றி கதைகளை கட்டிக் கூறுகிறார்கள்.

இந்த நாட்களில் தேங்காய் எண்ணெய் பற்றி பேசப்படுகின்றது. நாங்கள் செம்பனை செய்கையை தடை செய்தோம். களுத்துறை, காலி, மாத்தறை மாவட்டங்களில் செம்பனை யயிரிடப்படுகின்றது. இதன் மூலம் தான் பாம் ஒயில் தயாரிக்கப்படுகின்றது. இந்த பயிர்ச் செய்கையினால் நீர் வளங்கள் வற்றிப் போவதாக இதற்கு மக்களின் பெரும் எதிர்ப்பு இருந்தது. எனவே நாம் செம்பனைச் செய்கையை தடை செய்தோம். சுற்றாடலை பாதுகாப்பதற்காக. நான் அதிகாரிகளுக்கு இவற்றை படிப்படியாக அகற்றி இறப்பர் அல்லது வேறு பயிர்களை செய்கை செய்யுமாறு கூறினேன்.

இது சிறந்ததல்ல என சுகாதார அமைச்சும் தெரிவித்தது. எமது தேங்காய் எண்ணெய்யே சிறந்ததாகும். நாம் பாம் ஒயில் இறக்குமதியையும் தடை செய்தோம். தேங்காய் எண்ணெய்க்கு இன்று உலகில் அதிக கேள்வி உள்ளது. நாம் அந்தளவுக்கு தென்னையை பயிர்ச் செய்யவில்லை. கடந்த ஆட்சிக்காலத்தில் தென்னை மரங்கள் வெட்டப்பட்டன. அதனால் எமக்கு வெளிநாடுகளிலிருந்து தேங்காய் எண்ணெய்யை இறக்குமதி செய்யவேண்டி ஏற்பட்டது. இவற்றை ஒவ்வொரு வியாபாரிகளும் கொண்டு வருகிறார்கள். எனினும் இவற்றை இறக்குமதி செய்யும்போது. அதன் தரத்தை பரிசீலனை செய்வதற்கு அரச நிறுவனங்கள் உள்ளன.

போதைப்பொருட்கள் சட்ட விரோதமாக கடத்திக் கொண்டு வரப்படுவதை பிடிப்பதற்கு நிறுவனங்கள் உள்ளன. அதேபோன்று தேங்காய் எண்ணெய் மற்றும் பல்வேறு உணவு வகைகள் கொண்டு வரப்படும்போது அவற்றின் தரம் தொடர்பாக கண்காணிப்பதற்கு நிறுவனங்கள் உள்ளன. அந்த நிறுவனங்களின் கடமை அவற்றை பரிசீலனை செய்து உரிய தரத்தை கொண்டிருக்காதவற்றுக்கு எதிராக நடவடிக்கை எடுப்பதாகும். ஆனால் இப்போது அவ்வாறானவை கண்டுபிடிக்கப்படும்போது தரமற்ற நச்சுத் தன்மை கொண்ட தேங்காய் எண்ணெய் கொண்டுவரப்படுவதாக அரசாங்கத்தின் மீது குற்றம் சுமத்தப்படுகின்றது. அவற்றை கொண்டு வருவது நாங்கள் அல்ல.

மஹிந்த ராஜபக்ஷ ஜனாதிபதி அவர்களை 2015ஆம் ஆண்டு தோல்வியுறச் செய்வதற்கான ஒரு காரணமாக அமைந்தது எத்தனோல் ஆகும். சென்ற இடங்களில் எல்லாம் எத்தனோல் என சுவரொட்டிகள் ஒட்டப்பட்டன. அது உங்களுக்கு நினைவு இருக்கும் நாங்கள் எத்தனோலை முற்றாக தடை செய்துள்ளோம். தேவையான எத்தனோலை இலங்கையிலேயே உற்பத்தி செய்வோம். ஆனால் அவை திருட்டுத்தனமாக நாட்டுக்குள் கொண்டு வரப்படுகின்றன. நாங்கள் மக்கள் மத்தியில் உலப்பாங்கு மாற்றத்தை ஏற்படுத்த வேண்டும். வர்த்தகர்கள் அவற்றை திருட்டுத்தனமாக கொண்டு வருகிறார்கள். போதைப்பொருட்கள் திருட்டுத்தனமாக கொண்டு

வரப்படுகின்றது. போதைப்பொருள்கள் கொண்டு வரப்படும்போது அவை கண்டுகொள்ளப்படாதிருந்த ஒரு காலம் இருந்தது. இப்போது போதைப்பொருட்களை கைப்பற்றும்போது போதைப்பொருள் கொண்டு வருவதாக சொல்கிறார்கள். போதைப்பொருட்களை கைப்பற்றாவிட்டால் அவை கொண்டு வரப்படுவது பற்றி, அவை விநியோகிப்படுவது பற்றி எவருக்கும் தெரியாது. திருட்டுத் தனமாக கொண்டு வரப்படுவதை கண்டு பிடிப்பதற்காகவே அரச நிறுவனங்கள் உள்ளன. அவற்றை கைப்பற்றாவிட்டால் அவை மக்களிடம் செல்லும்.

அரசாங்கத்தின் மற்றுமொரு கொள்கைதான் ஊழலை ஒழிப்பதாகும். நாம் திருடர்களை பிடிக்க வேண்டும். எமது மக்கள்தான் இவ்வாறு செய்கிறார்கள். அவர்கள் மத்தியில் மனப்பாங்கு மாற்றத்தை ஏற்படுத்த வேண்டும். பொலிஸ் அதிகாரிகள் தொடர்பில் நல்ல விடயங்கள் பற்றி கூற நான் கேட்டதில்லை. அவர்கள் மீது ஏச்சு, பேச்சுக்கள் தான் அதிகம். போதைப்பொருட்களை பிடிப்பதில்லை என்றும் திருடர்களை பிடிப்பதில்லை என்றும் கூறுகின்றனர். அண்மையில் போதைப்பொருட்களை பிடிக்கும் ஒரு நல்ல பொலிஸ் அதிகாரியை இடமாற்றம் செய்துள்ளதாக சமூக ஊடகங்களில் தெரிவிக்கப்படுகின்றது. இடமாற்றம் செய்யும்போதுதான் ஒரு நல்ல அதிகாரியை இடமாற்றி விட்டதாக கூறப்படுகின்றது. எனவே சில ஊடகங்கள், சமூக ஊடகங்கள் கருத்துருவாக்கம் செய்யும் முறை பற்றி நீங்கள் இப்போது விளங்கிக்கொள்ள முடியும். அந்த அதிகாரி ஒரு நல்ல அதிகாரியாக இருக்க முடியும். ஆனால் அப்படி ஒரு அதிகாரி இருக்கும்போது எங்களது பிரதேசத்தில் ஒரு சிறந்த அதிகாரி இருக்கிறார். அவர் போதைப்பொருட்களை பிடிக்கிறார். அவர் மிகவும் நல்லவர் என்று ஏன் ஆரம்பத்திலேயே கூறப்படுவதில்லை. ஏன் அத்தகைய அதிகாரிகள் மதிக்கப்படுவதில்லை. அப்படியானால் இந்தப் பகுதியில் நல்ல அதிகாரிகள் இருப்பதை நாங்கள் அறிந்துகொள்ள முடியும்.

நான் அதிகாரத்திற்கு வந்து ஒன்றரை வருடங்கள் ஆகின்றன. நாம் பல்வேறு நிறுவனங்களுக்கு தலைவர்களை நியமித்தோம். அது குறித்து என்மீது குற்றச்சாட்டுக்கள் முன்வைக்கப்படுகின்றன. நாம் இவர்களை விசேட தொழில்வல்லுனர்கள் குழுவொன்றின் மூலமே நியமித்தோம். இப்போது என்னைத் தூற்றுகிறார்கள். வியத்மக அமைப்பையும் தூற்றுகிறார்கள். தொழில்வல்லுனர்களையும் தூற்றுகின்றனர். இவர்களுக்கு வேலை செய்ய முடியாது. இவர்களுக்கு மக்களின் பிரச்சினைகள் பற்றி தெரியாது. அதிகாரிகளுடன் செயற்படத் தெரியாது போன்ற பாரிய குற்றச்சாட்டுக்கள் முன்வைக்கப்படுகின்றன. அப்படியானால் இவர்களை படிப்படியாக மாற்றுவதற்கு நான் தீர்மானித்தேன். அப்படி மாற்றம்போது எனக்கு கடிதங்களும் குறுஞ் செய்திகளும் வருகின்றன இவர் ஒரு சிறந்த அதிகாரி. இவர் மிகவும் நல்லவர். ஏன் இவரை மாற்றுகின்றீர்கள் என கேட்கின்றனர். ஆனால் இருக்கும் வரையில் அவரைத் தூற்றுகின்றார்கள். மாற்றும்போது நல்லவர் எனக் கூறப்படுகின்றது. இந்த அரசாங்கத்திற்கும் எனக்கும் எதிராக நிறுவனமயப்பட்ட ரீதியில் இந்த போலி கருத்துக்கள் முன்னெடுக்கப்படுகின்றன.

மஹிந்த ராஜபக்ஷ ஜனாதிபதி அவர்கள், நாட்டில் இருந்த யுத்தத்தை நிறைவு செய்து, பாரிய அபிவிருத்தியை செய்தார். இவை அனைத்தையும் செய்ததன் பின்னர் திருடர் திருடர் எனக் கூறி அவரை தோல்வியுறச் செய்து நல்லாட்சி என்ற ஒரு அரசாங்கத்தை கொண்டு வந்து எமது படை வீரர்களை சிறையில் தள்ளினர். சர்வதேச நீதிமன்றங்களுக்கு கொண்டு செல்ல முயற்சிகள் மேற்கொள்ளப்பட்டன. எமது கலாசாரம் சீரழிக்கப்பட்டு தேரர்களையும் சிறையில் தள்ளி இவையனைத்தையும் அழிவுக்குள்ளாக்கினர். பெரஹராக்களுக்கு யானைகள் கொண்டு செல்லப்படுவதை தடை செய்வது எமது பாரம்பரியத்தை, தேசியத்தை இல்லாமல் ஆக்குவதாகும். விவசாயத்துறைக்கு உரிய இடம் வழங்காது மிளகு போன்றவற்றை வெளிநாடுகளில் இருந்து கொண்டு வந்து மீள்ஏற்றுமதி செய்து எமது பெருந்தோட்டக் கைத்தொழில் துறையை அழிவுக்குள்ளாக்கியது எமது தேசிய கலாசாரத்தை இல்லாமல் செய்து வெளிநாட்டு சக்திகளை நாட்டுக்குள் கொண்டு வருவதற்காகும். அமெரிக்காவுடன் எம்சிசி ஒப்பந்தம் செய்யப்பட்டிருந்தது. நாம் வந்து அதனை நிறுத்தினோம். அப்போது அதிகளவு கோசங்கள் எழுப்பப்பட்டன. ஜெனிவாவில் வேறு நாடுகளுடன் இணைந்து படை வீரர்களுக்கு எதிரான முன்மொழிவில் கைச்சாத்திடப்பட்டது. பின்னர் நாம் அதிலிருந்து விலகிக்கொண்டோம். இது பற்றி பேசப்படுவதில்லை. நான் எப்போதும் சொல்லக்கூடிய விடயம் கோட்டாபய ராஜபக்ஷ என்ற நபர் முக்கியமல்ல. என்னை இந்த இடத்திற்கு கொண்டு வந்த கொள்கையும் பலமுமே முக்கியமானதாகும். அதனை நாம் பாதுகாக்க வேண்டும். அதற்கு எதிராகவே இன்று எதிர்சக்திகள் போலிப் பிரச்சாரங்களை முன்னெடுத்துள்ளன. மக்களுக்கு உறுதியளித்த விடயங்களையே நான் செய்து வருகின்றேன். இந்த குறுகிய காலப்பகுதியில் அதனை நான் செய்திருக்கிறேன்..

இன்று சர்வதேச செய்திகளை பார்த்தால் பல நாடுகளில் கொரோனா நோய்த் தொற்றினால் அதிகளவானோர் மரணிக்கின்றனர். மூன்றாவது அலையும் வந்து அந்த நாடுகள் மூடப்பட்டுள்ளன. நாம் எமது நாட்டை முன்கொண்டு செல்கிறோம். மீண்டும் சுற்றுலா பயணிகளை கொண்டு வருவதற்கு நடவடிக்கை எடுத்துள்ளோம். பெரும் எண்ணிக்கையான நாடுகள் தமது மக்களுக்கு தடுப்பூசிகளை இன்னும் வழங்கவில்லை. நாங்கள் தடுப்பூசிகளை உற்பத்தி செய்வதும் இல்லை. எனினும் நாம் ஏனைய நாடுகளுடன் பேசி தடுப்பூசிகளை கொண்டு வந்து மக்களுக்கு வழங்குகிறோம். முழு உலகமும் கொவிட் நோய் தொற்றின் காரணமாக பொருளாதார கஷ்டங்களுக்கு முகங்கொடுத்துள்ளன. வீழ்ச்சியுற்றிருந்த பொருளாதாரத்தையே நான் பொறுப்பேற்றேன். அதுபற்றி நான் அறிந்திருந்தேன். அதற்கு மேலதிகமாக இந்த கொவிட் சவாலுக்கு மத்தியில் சுற்றுலா பயணிகளிடம் இருந்து கிடைத்த சுமார் 5 பில்லியன் டொலர் வருமானம் சுமார் 03 மில்லியன் தொழில்வாய்ப்புகள் இழக்கப்பட்டுள்ளன. நாங்கள் சரியான பொருளாதார கொள்கையொன்றை பின்பற்றிய காரணத்தினால் நாங்கள் உணவில் தன்னிறைவு அடைய வேண்டுமென்ற கொள்கையை கொண்டுவந்த காரணத்தினால், நாங்கள் பசுமை கலாசார தேசிய பொருளாதாரத்தை கட்டியெழுப்பிய காரணத்தினால்தான் நாம் இன்று முன்னோக்கிச் செல்ல முடியுமாக உள்ளது,

வெளிநாடுகளிலிருந்து பொருட்கள் இறக்குமதி செய்வதை கட்டுப்படுத்தும்போது பொருட்களின் விலைகள் அதிகரிக்கின்றன. உலக சந்தையின் விலையுடன்தான் எமது விலை தீர்மானிக்கப்படுகின்றது. ஏனெனில் நாங்கள் உணவுகளுக்கு வரி அறவிடுவதில்லை. சீனிக்கு மட்டுமே வரி அறவிடப்பட்டிருந்தது. நாம் அதனையும் நீ்க்கினோம். எமது நாட்டில் உற்பத்தி செய்ய முடியுமானவற்றை நாங்கள் வெளிநாடுகளிலிருந்து கொண்டு வராமல் உள்நாட்டிலேயே பயிரிடும்போது அந்த வருமானம் எமது விவசாயிகளுக்கு செல்லும் அதேபோன்று நாங்கள் நுகர்வோர் பற்றியும் சிந்திக்க வேண்டும்.

இதனால்தான் நாங்கள் நெல்லுக்கு நிர்ணய விலையை வழங்கி இருக்கிறோம். அந்த விலைக்கு அதிகமாக கொடுத்தால் அரிசியின் விலை கட்டாயம் அதிகரிக்கும். அந்த பணமும் எங்களது விவசாயிக்கே செல்கிறது. இடைத்தரகர்களுக்கு செல்வதை நாம் முடியுமானவரை நிறுத்தப் பார்க்க வேண்டும். அதுதான் அரசாங்கத்தின் கடமை. அதனையே நாம் செய்ய வேண்டும்.

நாம் பயிர்ச் செய்கையின் வினைத்திறனை அதிகரிக்க வேண்டும். அதற்காகவே நாம் தொழிநுட்பத்தை கொண்டுவர முயற்சிக்கிறோம். நீங்கள் இப்போது எமக்கு ஒரு ஏக்கர் மட்டுமே வயல் காணி உள்ளது. எங்களுக்கு இப்போது இருக்கின்ற முறைமைக்கு ஒரு ஏக்கர் போதாது என்று குறிப்பிட்டீர்கள். இப்போது நாங்கள் ஒரு ஏக்கரில் அதிக அறுவடையை எப்படி பெற்றுக்கொள்வது என்று பார்க்க வேண்டும். தொழிநுட்பத்தை பயன்படுத்தி அதிக வருமானத்தைப் பெற்றுக்கொள்ளும் முறை பற்றி பார்க்க வேண்டும். புதிய முறைமைகளை அறிமுகப்படுத்த வேண்டும். இந்த அனைத்துக்கும் எமது அதிகாரிகள் இருக்கின்றனர். எனவே தான் நான் அதிகாரிகளுடன் உங்களிடம் வருகின்றேன். இல்லாவிட்டால் அதற்கான சந்தர்ப்பம் கிடைப்பதில்லை. மத்திய அரசாங்கத்தின் தலைமைச் செயலாளர்கள் அந்த அமைச்சுக்களின் பிரதான அதிகாரிகள் அந்த அதிகாரிகளுடன் வருவது இந்த பிரச்சினைகளுக்கு நேரடியாக தீர்வுகளை கண்டறிந்து கொள்கை ரீதியான மாற்றங்களை செய்வதற்காகும்.

இதற்கும் சிலர் என்னை தூற்றுகின்றனர். எனக்கும் கொழும்பில் இருந்து கொண்டு இது பற்றி பேச முடியும். என்றாலும் உங்களிடம் வந்து இது பற்றி கண்டறிந்து சரியான முறையில் பிரச்சினைகளை தீர்க்கவே நான் விரும்புகிறேன். இங்கு மட்டுமல்ல வரும் வழியில் உள்ளவர்களுடனும் நான் பேசுகிறேன். அவர்களுடைய விபரங்களையும் பெற்றுக்கொண்டு இந்த அதிகாரிகளுக்கு அந்தப் பிரச்சினைகளுக்கு நேரடியாக பதிலளிக்கும் வாய்ப்பு அவர்களுக்கு கிடைக்கும். அது போலவே கொள்கை ரீதியான தீர்மானங்களை மேற்கொள்ளவும் முடியும். தனிப்பட்ட பிரச்சினைகள் ஏராளம் உள்ளன என்பது எனக்குத் தெரியும். அவற்றை இங்கு பகிரங்கமாக பேச முடியாது. அவற்றை எழுதித் தாருங்கள். எனது அதிகாரிகள் இங்கு வந்து இருக்கிறார்கள். அவர்களிடம் கையளியுங்கள். நாம் சென்றதன் பின்னர் தனிப்பட்ட பிரச்சினைகளில் தீர்க்கக்கூடியவற்றை தீர்ப்பதற்கு நாம் நடவடிக்கை எடுப்போம்.

நான் வரும் வழியில் ஆரம்ப சுகாதார மத்திய நிலையம் ஒன்றை பார்த்தேன். நான் அவர்களுடன் உரையாடினேன். மாலை வேளைகளில் ஏதேனும் ஒரு பிரச்சினை ஏற்பட்டால் நோயாளியை அதிக தூரம் கொண்டு செல்ல வேண்டும். வவுனியாவிற்கு அல்லது பதவியவுக்கு செல்ல வேண்டும். இதுபோன்ற சுகாதார பிரச்சினைகள் உள்ளன. இங்கு வந்திருக்கும் அதிகாரிகளுக்கு அவற்றுக்கான நேரடியான பதில்களை வழங்க முடியும்.

கிராமத்துடன் கலந்துரையாடல் நிகழ்ச்சித்திட்டத்திற்காக நான் வருகை தந்திருக்கும் 17 வது மாவட்டம் இதுவாகும். ஏனைய மாவட்டங்களுக்கும் பின்தங்கிய கிராமங்களுக்கும் செல்லும்போது பெரும்பாலும் அதே பிரதேசத்தில் உள்ளவர்கள் வருகிறார்கள். இந்த முதல் சுற்று முடிவடைந்ததும் மீண்டும் ஆரம்பத்திலிருந்து அந்த மாவட்டங்களுக்கு செல்ல வேண்டுமென்பது எனது எதிர்பார்ப்பாகும். ஒரு வருடத்தில் நாங்கள் மூன்று முறையாவது மாவட்டத்தில் உள்ள பின்தங்கிய கிராமங்களுக்கு செல்வோம். இந்த கிராமங்களை முன்னேற்றி பிரச்சினைகளை தீர்த்ததன் பின்னர் எமக்கு மாவட்டத்தின் பிரச்சினைகளை தீர்க்க முடியும்.

தேசிய புத்தரிசி விழா ஜனாதிபதி தலைமையில்…

: ஞாயிற்றுக்கிழமை, 04 ஏப்ரல் 2021

அறுவடை செய்யப்பட்ட நெல்லின் முதற் பகுதியை ஜய ஸ்ரீ மகா போதிக்கு காணிக்கையாக செலுத்தும் வருடாந்த புத்தரிசி விழா ஜனாதிபதி கோட்டாபய ராஜபக்ஷ அவர்களின் தலைமையில் இன்று (04) முற்பகல் அனுராதபுரம் வரலாற்று முக்கியத்துவமிக்க ஜய ஸ்ரீ மகாபோதி வளாகத்தில் இடம்பெற்றது.

விவசாயிகள் தாம் பெற்றுக்கொண்ட அறுவடையின் முதற் பகுதியை காணிக்கையாக வழங்குவது பாரம்பரியமாக இடம்பெற்றுவரும் வருடாந்த சம்பிரதாயமாகும். 54வது தடவையாக இடம்பெற்ற தேசிய புத்தரிசி விழா அட்டமஸ்தானாதிபதி கலாநிதி சங்கைக்குரிய பல்லேகம ஸ்ரீநிவாச நாயக்க தேரரின் ஆலோசனையின் பேரில் விவசாயத்துறை அமைச்சும் கமநல சேவைகள் திணைக்களமும் இணைந்து ஏற்பாடு செய்திருந்தன.

உரிய பருவ காலத்தில் மழை கிடைக்கப்பெற்று தமது பயிர் நிலங்கள் செழிப்புற்று விளங்க இயற்கையின் பலமும் ஆசிர்வாதமும் கிடைக்க வேண்டுமென்ற எதிர்பார்ப்புடன் நாலா திசைகளிலும் இருந்து வருகை தந்திருந்த விவசாய சமூகத்தினர் புத்தரிசி விழா சம்பிரதாயங்களில் பங்குபற்றினர்.

பாரம்பரிய சம்பிரதாயங்களின்படி புத்தரிசி விழா ஊர்வலமானது மங்கள வாத்தியங்களுடன் கிழக்கு வாசலின் ஊடாக ஜய ஸ்ரீ மகா போதியை வலம்வந்து, அங்கு பிரத்தியேகமாக வைக்கப்பட்டிருந்த தங்க முலாம் பூசப்பட்ட பாத்திரத்தில் மிகுந்த கௌரவத்துடனும் பக்தியுடனும் புத்தரிசி நிரப்பப்பட்டது.

சங்கைக்குரிய பல்லேகம ஸ்ரீநிவாச தேரர் உள்ளிட்ட மகா சங்கத்தினரின் பிரித் பாராயணத்திற்கு மத்தியில் ஜனாதிபதி கோட்டாபய ராஜபக்ஷ அவர்கள் பாத்திரத்தில் புத்தரிசியை நிரப்பும் சம்பிரதாயத்தை நிறைவேற்றினார்.

அமைச்சர்கள், மக்கள் பிரதிநிதிகள் மற்றும் நாடளாவிய ரீதியில் இருந்து வருகை தந்திருந்த விவசாயிகள் பாத்திரத்தில் புத்திரிசியை நிரப்பும் சம்பிரதாயத்தில் இணைந்து கொண்டனர்.

புத்திரிசி விழாவிற்காக கமநல அபிவிருத்தி திணைக்களத்தினால் வெளியிடப்பட்ட சஞ்சிகையின் முதல் பிரதி கமநல அபிவிருத்தி ஆணையாளர் நாயகம் ஏ.எச்.எம்.எல்.அபேரத்ன அவர்களினால் ஜனாதிபதி அவர்களுக்கு வழங்கிவைக்கப்பட்டது.

சமன் தேவாலயத்தின் பஸ்நாயக்க நிலமே நிகார ஜயசுந்தர பண்டாரவினால் ஜய ஸ்ரீ மகா போதிக்கு காணிக்கையாக வழங்கப்பட்ட நெய் பாத்திரம் ஜனாதிபதி அவர்களிடம் கையளிக்கப்பட்டது.

புத்திரிசி விழாவுடன் இணைந்ததாக ஆதிவாசிகளினால் சம்பிரதாயபூர்வமாக ஜய ஸ்ரீ மகா போதிக்கு காணிக்கையாக வழங்கப்பட்ட தேன் பாத்திரம் ஆதிவாசிகளின் தலைவர் வன்னில எத்தோவின் சார்பில் பிரதித் தலைவர் உருவரிகே குணபண்டாவினால் ஜனாதிபதி அவர்களிடம் கையளிக்கப்பட்டது. ஒன்பது மாகாணங்களை பிரதிநிதித்துவப்படுத்தி வருகை தந்திருந்த விவசாய சங்க பிரதிநிதிகளுக்கும் பிக்குகளினால் பிரித் பாராயணம் செய்யப்பட்டு விதை நெல்கள் பகிர்ந்தளிக்கும் நிகழ்வை ஜனாதிபதி அவர்கள் ஆரம்பித்து வைத்தார். புத்திரிசி விழா நிகழ்வினைத் தொடர்ந்து ஜனாதிபதி அவர்கள், ஜய ஸ்ரீ மகாபோதிக்கு மலர்கள், வெள்ளி நாணயங்களை பூஜை செய்து ஆசிர்வாதங்களைப் பெற்றுக்கொண்டார்.

அதனைத் தொடர்ந்து ஜனாதிபதி அவர்களும் அயோமா ராஜபக்ஷ அம்மையாரும் அட்டமஸ்தானாதிபதி கலாநிதி சங்கைக்குரிய பல்லேகம ஸ்ரீநிவாச நாயக்கத் தேரரை சந்தித்து அவரது சுகதுக்கங்களை கேட்டறிந்தனர்.

மகாசங்கத்தினர், விவசாயத்துறை அமைச்சர் மஹிந்தானந்த அழுத்கமகே, அமைச்சர் எஸ்.எம்.சந்திரசேன, வட மத்திய மாகாண ஆளுநர் மஹிபால ஹேரத், இராஜாங்க அமைச்சர்களான துமிந்த திசாநாயக்க, சஷிந்திர ராஜபக்ஷ, ஷெகான் சேமசிங்க, சன்ன ஜயசுமன, பாராளுமன்ற உறுப்பினர் கே.பி.எஸ்.குமாரசிறி ஆகியோரும் அரசாங்க அதிகாரிகள் மற்றும் விவசாயிகள் உள்ளிட்டோர் இந்நிகழ்வில் கலந்துகொண்டனர்.

ஜனாதிபதி அவர்களிள் உயிர்த்த நாள் வாழ்த்துச் செய்தி

: ஞாயிற்றுக்கிழமை, 04 ஏப்ரல் 2021

உயிர்ப்பு விழா உலக வாழ் கிறிஸ்தவ மக்களின் உன்னதமான பண்டிகையாகும். உயிர்ப்பு விழாவின் பொருள் பாவத்திலிருந்து இரட்சிப்பு பெறுவதாகும். பாவத்திலிருந்து விடுபட்டு, செய்த பாவத்திற்காக மனம் வருந்தி புதியதோர் வாழ்க்கையை ஆரம்பிப்பதையும் இது குறித்து நிற்கிறது.

உலகெங்கிலும் உள்ள கிறிஸ்தவர்கள் திருநீற்றுப் புதன் தொடங்கி 40 நாள் தவக் காலத்தில் கிறிஸ்துவின் துன்பம், மரணம் மற்றும் இறப்பை நினைவுகூரும் ஆன்மீக கிரியைகளில் ஈடுபடுகிறார்கள். உயிர்த்த ஞாயிறன்று இயேசு பிரானின் உயிர்த்தெழுதலின் வெற்றிகரமான தருணத்தை அவர்கள் மிகுந்த மகிழ்ச்சியுடன் கொண்டாடுகிறார்கள்.

இக்காலப் பகுதியில் கிறிஸ்தவ மக்கள் மனிதகுலத்தை பாவத்திலிருந்து மீட்கும் நோக்கத்துடன் இயேசு நாதர் சிலுவையில் துன்பப்பட்டு மரணத்தை வென்று மீண்டும் உயிர்த்தெழுந்து விடுதலையைப் பெற்றுத் தந்ததை நினைவு கூர்கின்றனர்.

இரண்டு வருடங்களுக்கு முன்னர் இலங்கை வாழ் கிறிஸ்தவ மக்கள் மிகுந்த பக்தியுடனும் கௌரவத்துடனும் உயிர்த்த நாளை கொண்டாடிக் கொண்டிருந்த தருணத்தில் காட்டுமிராண்டித்தனமான தீவிரவாத தாக்குதலுக்கு இலக்காக நேர்ந்தது. இந்த துன்பியல் சம்பவத்தினால் பாதிக்கப்பட்ட இதயங்களின் வலி இன்னும் ஆறவில்லை. அந்த பாவச் செயலை புரிந்த குற்றவாளிகளான தனிநபர்களுக்கோ குழுக்களுக்கோ சட்டத்திலிருந்து தப்பிக்க இடமளிக்கப்பட மாட்டாது. அதே சமயம் சமூகத்தில் இதுபோன்ற அனர்த்தங்கள் மீண்டும் இடம்பெறாத வகையில் தேசிய பாதுகாப்பை உறுதி செய்வதற்கு அரசாங்கம் உறுதிபூண்டுள்ளது.

இயேசு நாதர் அன்று போதித்த மனித விடுதலை பற்றிய செய்தி சமூகத்திற்கு ஒரு பலமான அடித்தளமாக விளங்குகிறது. இன்று உலகம் எதிர்கொள்ளும் பல்வேறு சிக்கல்கள் பிரச்சினைகளில் இருந்து விடுபடவும் அன்பும் இரக்கமும் கொண்ட ஒரு மனிதாபிமான சமூகத்தில் வாழவும் இந்த உயிர்த்த நாளில் நாம் உறுதிகொள்வோம்.

உங்கள் அனைவருக்கும் இனிய உயிர்த்த நாள் வாழ்த்துக்கள்!

மகா சிவராத்திரி தின வாழ்த்துச் செய்தி..

: வியாழக்கிழமை, 11 மார்ச் 2021

இலங்கையிலும் உலகெங்கிலும் உள்ள இந்து பக்தர்கள் சிவபெருமானின் அருள் ஒளி கொண்டு அறியாமை இருள் அகற்றி, ஞானத்தின் மகிமையை அடைவதற்கான பிரார்த்தனையுடன், பழங்காலத்திலிருந்தே மகா சிவராத்திரி தினத்தில் மிகுந்த பக்தியுடன் சமயக் கிரியைகளில் ஈடுபட்டு வருகின்றனர்.

உலகின் சக்திவாய்ந்த தெய்வமாக அவர்கள் கருதும் சிவபெருமானின் ஆசீர்வாதம் சமூக, பொருளாதார சுபீட்சத்திற்கும் சிறந்த ஆரோக்கியத்திற்கும் மற்றும் ஆன்மீக வளர்ச்சிக்கும் ஒரு பலமான உந்துசக்தி என்பது இந்துக்களின் நம்பிக்கையாகும்.

இந்து சமய பக்தர்களினால் அனுஷ்டிக்கப்படும் ஒரு மகத்தான நாளான மகா சிவராத்திரி தினத்தில், அவர்கள் கண் விழித்து பல்வேறு கலாச்சார பெறுமானங்களுடன் கூடிய செயல்களில் ஈடுபட்டு சிவபெருமானுக்கு பூஜை செய்கிறார்கள். இதன் மூலம் நித்திய ஆசீர்வாதங்களை அவர்கள் எதிர்பார்க்கிறார்கள். மனதை ஒருநிலைப்படுத்தி பக்தி சிரத்தையுடன் சிவ வழிபாட்டில் ஈடுபடுவதன் மூலம் ஆன்மீக உயர்வை அடைய முடியம் என்று இந்து பக்தர்கள் நம்புகிறார்கள்.

பழங்காலத்திலிருந்தே இலங்கை வாழ் இந்துக்களின் இந்த அற்புதமான கலாச்சார விழா எமது சமூகத்திற்கு அளவிடற்கரிய பெறுமதியை சேர்த்துள்ளது. இந்த சமய நடைமுறைகள் பல்வகை கலை இலக்கிய அம்சங்களைப் போன்றே சிறந்த நடனப் பாரம்பரியத்திற்கும் வழிவகுத்துள்ளது.

கடந்த ஆண்டு கோவிட் தொற்றுநோய் பரவலின் காரணமாக, இந்து பக்தர்கள் சுகாதார விதிமுறைகளை பின்பற்றி மகா சிவராத்திரி கிரியைகளில் ஈடுபட வேண்டியிருந்தது. அந்த கட்டுப்பாடுகளில் இம்முறை சிறிது தளர்வு இருந்தாலும், கடந்த வருடத்தைப் போன்றே இவ்வருடமும் சுகாதார ஆலோசனைகளைப் பின்பற்றி மகா சிவராத்திரி தினத்தை அனுஷ்டிப்பார்கள் என்று நாம் நம்புகிறோம்.
மகா சிவராத்திரி தின தீப ஒளி இந்து மக்களின் ஆன்மீகத்தை ஒளியூட்டுவதைப் போன்றே சமூகத்தில் அமைதி, நல்லிணக்கம் மற்றும் மகிழ்ச்சியை அடைந்துகொள்வதற்கும் சிவபெருமான் அருள்புரிய வேண்டும் என்று பிரார்த்திக்கின்றேன்

காணி உறுதி இன்றி அரசு நிலங்களை பயன்படுத்தி வரும் குடும்பங்களுக்கு காணி உறுதி

: செவ்வாய்க்கிழமை, 09 மார்ச் 2021

தெளிவான காணி உறுதி இன்றி அரசு நிலங்களை பயன்படுத்தி வரும் குடும்பங்களுக்கு காணி உறுதி வழங்கும் நிகழ்வு ஜனாதிபதி கோட்டாபய ராஜபக்‌ஷவின் தலைமையில் ஜனாதிபதி செயலகத்தில் நடைபெற்றது. பெண் ஒருவருக்கு காணி உறுதி வழங்குவதைக் காணலாம்.

உயிர்த்த ஞாயிறு ஆணைக்குழு அறிக்கையை மறைக்க வேண்டிய தேவையில்லை…

: திங்கட்கிழமை, 08 மார்ச் 2021

எந்த விட்டுக்கொடுப்பும் செய்யப்பட மாட்டாது, எவரையும் மகிழ்ச்சிப்படுத்த வேண்டிய அவசியமும் இல்லை…

தேசிய பிரச்சினைகளில் அரசியல் வேண்டாம்…

தாக்குதல் நடந்தபோது அமைதியாக இருந்த அரசியல்வாதிகள்

இன்று கருப்பு கொடிகள் ஏற்றுகின்றனர்…

உயிர்த்த ஞாயிறு தாக்குதலை விற்று ஆட்சிக்கு வரவில்லை …
வெற்றிப் பயணம் தாக்குதலுக்கு நீண்ட காலத்திற்கு முன்பே ஆரம்பமானது …
பேராயர் அவர்களின் வேதனை நியாயமானது …
தமிழ் பயங்கரவாதமோ அல்லது இஸ்லாமிய தீவிரவாதமோ தலை தூக்க ஒருபோதும் இடமில்லை …

“கிராமத்துடன் உரையாடலில்” ஜனாதிபதி தெரிவிப்பு…

உயிர்த்த ஞாயிறு தாக்குதல் தொடர்பான ஜனாதிபதி ஆணைக் குழுவின் அறிக்கையை மறைக்க தனது அரசாங்கத்திற்கு எந்தவிதமான தேவையும் இல்லை என்று ஜனாதிபதி கோட்டாபய ராஜபக்ஷ அவர்கள் வலியுறுத்தி கூறினார். அது சம்பந்தமாக எந்தவொரு நபருடனோ அல்லது தரப்பினருடனோ உடன்பாடுகளை ஏற்படுத்திக் கொள்ளவோ எவரையும் மகிழ்விக்கவோ வேண்டிய தேவையும் இல்லை என்றும் ஜனாதிபதி அவர்கள் தெரிவித்தார்.

உயிர்த்த ஞாயிறு தாக்குதல் ஒரு தேசிய பிரச்சினை. அதனை ஒரு அரசியல் கருப்பொருளாக எடுத்துக் கொள்ளக்கூடாது. இந்த அனர்த்தம் தொடர்பில் சரியான முறையில் செயல்படுவது தாக்குதலால் பாதிக்கப்பட்ட மக்களுக்காக செய்ய வேண்டிய ஒரு பொறுப்பாகும். தாக்குதல் குறித்து பேராயருக்கு இருக்கும் வேதனை நியாயமானது. அவர் அதைப் பற்றி பேசுவது சரியானது. தாக்குதல் நடந்த நேரத்தில் அமைதியாக இருந்த அப்போதைய அரசாங்கத்தின் அரசியல்வாதிகள் இப்போது கருப்புக் கொடிகளை ஏற்றுவது கேலிக்குரியதாகும் என்றும் ஜனாதிபதி அவர்கள் சுட்டிக்காட்டினார்.

உயிர்த்த ஞாயிறு தாக்குதல் கடந்த அரசாங்கம் ஆட்சியில் இருந்தபோது 2019 ஆம் ஆண்டு இடம்பெற்றது. அப்போதைய அரசாங்கத்தின் தவறான கொள்கைகளால் ஏமாற்றமடைந்த மக்கள், கூட்டுறவு சங்க தேர்தல்களிலும், 2018 பெப்ரவரியில் நடந்த உள்ளூராட்சித் தேர்தல்களிலும் அரசாங்கத்திற்கு தங்கள் கடுமையான எதிர்ப்பை வெளிப்படுத்தினர். உயிர்த்த ஞாயிறு தாக்குதலை காட்டி தான் ஆட்சிக்கு வரவில்லை என்று ஜனாதிபதி அவர்கள் தெரிவித்தார்.

2015 க்கு முன்பு இருந்த அரசாங்கம் தேசிய பாதுகாப்புக்கு அதிக முன்னுரிமை அளித்தது. 2015 ல் ஆட்சிக்கு வந்தவர்கள் தேசிய பாதுகாப்பை மறந்துவிட்டார்கள். எத்தகைய மனித உரிமை குற்றச்சாட்டுகள் எழுப்பப்பட்டாலும், 2015 க்கு முன்பிருந்த பாதுகாப்பு கொள்கை மீண்டும் செயற்படுத்தப்பட்டுள்ளது.

நாட்டின் தேசிய பாதுகாப்புக்கு அரசாங்கமே பொறுப்பு என்பதை ஜனாதிபதி அவர்கள் வலியுறுத்தினார். தமிழ் பிரிவினைவாத பயங்கரவாதத்துக்கோ அல்லது இஸ்லாமிய தீவிரவாதத்துக்கோ எந்த வகையிலும் இடமளிக்கப்பட மாட்டாது என்றும் அடிப்படையற்ற அனைத்து குற்றச்சாட்டுகளையும் முற்றாக நிராகரிப்பதாகவும் ஜனாதிபதி அவர்கள் தெரிவித்தார்.

இன்று (06) முற்பகல் குருணாகல் மாவட்டத்தில் கிரிபாவ பிரதேச செயலக பிரிவில் உள்ள வேரகல கிராம அதிகாரி பிரிவில் உள்ள மதுராகம விளையாட்டு மைதானத்தில் நடைபெற்ற 13 வது ‘கிராமத்துடன் உரையாடல்’ நிகழ்ச்சியில் பங்கேற்றபோதே ஜனாதிபதி அவர்கள் இதனை தெரிவித்தார்.

“கிராமத்துடன் உரையாடல்” திட்டம் 2020 செப்டம்பர் 25 அன்று பதுளை மாவட்டத்தில் ஆரம்பிக்கப்பட்டது. மாத்தளை, இரத்தினபுரி, அனுராதபுரம், அம்பாறை , பொலன்னறுவை, களுத்துறை, மொனராகலை, கேகாலை, கண்டி, புத்தளம் மற்றும் திருகோணமலை மாவட்டங்களை உள்ளடக்கி கடந்த நிகழ்ச்சிகள் ஏற்பாடு செய்யப்பட்டன. இதுவரை சரியான கவனம் செலுத்தப்படாத நகரத்திற்கு வெளியே உள்ள தொலைதூர கிராமங்களைச் சேர்ந்த மக்களை சந்தித்து, அவர்களின் பிரச்சினைகளை விசாரித்து, அச்சந்தர்ப்பத்திலேயே அதிகாரிகளின் கவனத்திற்குக் கொண்டு வந்து தீர்வுகளை வழங்குவதே ஜனாதிபதியின் நோக்கமாகும். தீர்ப்பதற்கு காலம் செல்லும் பிரச்சினைகள் பின்னர் நடவடிக்கை எடுக்கப்படுவதற்காக குறித்துக்கொள்ளப்படும். கிராம மக்களிடம் சென்று, அவர்களின் பிரச்சினைகளைக் கேட்டறிந்து, அவர்களின் முன்மொழிவுகளில் இருந்து தீர்வுகளைக் காண்பதும் இந்த திட்டத்தின் நோக்கம்.

கிரிபாவ பிரதேச செயலகம் கல்கமுவ நகரிலிருந்து 27 கி.மீ தொலைவில் அமைந்துள்ளது, இது வடக்கே அனுராதபுரா மாவட்டம் மற்றும் மேற்கே புத்தளம் மாவட்டத்தை எல்லையாக கொண்டுள்ளது. கிரிபாவ நகர மையத்திலிருந்து வேரகல கிராமத்துக்கான தூரம் 03 கி.மீ. கிரிபாவ பிரதேச செயலக பிரிவில் உள்ள 35 கிராம அதிகாரி பிரிவுகளில் வேரகல மிக வறிய மற்றும் மிகவும் பின்தங்கிய கிராம அதிகாரி பிரிவாக கருதப்படுகிறது.

வேரகல மற்றும் மதுராகம கிராமங்கள் கிராம சேவகர் பிரிவைச் சேர்ந்தவை. இளவரசர் சாலிய அசோக மாலாவுடன் வந்து மறைந்திருந்த கிராமம் ஹெங்கோகமவாகவும் பின்னர் அது மதுராகமவாக மாறியது என்று தெரிவிக்கப்படுகிறது. வேரகல ரஜ மகா விஹாரயவின் வரலாறு வலகம்பா மன்னனின் காலம் வரை நீண்டு செல்கிறது. 149 குடும்பங்களைக் கொண்ட வேரகல மற்றும் மதுராகம ஆகிய இரண்டு கிராமங்களின் மக்கள் தொகை 449 ஆகும். நெல், எள்ளு, சோளம், கௌபி, பயறு மற்றும் உளுந்து செய்கை மக்களின் முக்கிய வாழ்வாதாரமாகும்.

‘கிராமத்துடன் உரையாடல்’ நிகழ்ச்சியில் பங்கேற்க கிரிபாவ பொது மைதானத்தில் இருந்து மதுராகம மைதானத்திற்கு வருகைதந்த ஜனாதிபதி அவர்கள், வீதியின் இருபுறமும் கூடியிருந்த மக்களுடன் உரையாடி அப்பிரதேசத்தின் விபரங்கள் மற்றும் பிரச்சினைகள் குறித்து கேட்டறிந்தார்.

சுபீட்சத்தின் நோக்கு கொள்கைத் திட்டத்தின் படி மின்சார வசதி இல்லாத அனைத்து கிராமப்புற வீடுகளுக்கும் மின்சாரம் வழங்கும் ‘தெயட்ட எலிய’ மின்சார திட்டத்தை இன்று (06) முற்பகல் ஜனாதிபதி கோட்டாபய ராஜபக்ஷ அவர்கள் கிரிபாவ வேரகல கிராமத்தில் ‘கிராமத்துடன் உரையாடல்’ நிகழ்ச்சித்திட்டத்துடன் இணைந்ததாக ஆரம்பித்து வைத்தார்.

‘தெயட்ட எலிய’ திட்டத்தின் ஊடாக மின்சாரம் இல்லாத அனைத்து சமுர்தி பெறுநர்களுக்கும் மற்றும் சமுர்தி உதவிக்கான காத்திருப்பு பட்டியலில் உள்ள குறைந்த வருமானம் ஈட்டுபவர்களுக்கும் மின்சாரம் வழங்கப்படும்.

மின்சார சபை இலவச மின்சார இணைப்பை வழங்கும். வீட்டிற்கு வயரிங் செய்வதற்காக சமூர்த்தி வங்கி சலுகை வட்டி கடன் வசதிகளை வழங்க திட்டமிட்டுள்ளது. இந்த ஆண்டு இறுதிக்குள் அடையாளம் காணப்பட்ட அனைத்து வீடுகளுக்கும் மின்சாரம் வழங்க அரசாங்கம் எதிர்பார்க்கின்றது.

கல்கமுவ யு.பி. வன்னிநாயக வித்தியாலயத்தின் 7 ஆம் வகுப்பு மாணவி திவ்யஞ்சலி எல்வலதெனிய தான் எழுதிய ‘கிரி அத்தாகே சிஹினய’ என்ற நூலை ஜனாதிபதியிடம் வழங்கினார்.

“கிராமத்துடன் உரையாடல்” நிகழ்ச்சி நடைபெறும் அனைத்து பகுதிகளிலும் பாடசாலை நூலக வசதிகளை மேம்படுத்து ஜனாதிபதி அவர்களின் மற்றொரு நோக்கமாகும். “அறிவுப் பலம் கொண்ட சிறுவர் தலைமுறை’ என்ற தலைப்பில் பாடசாலைகளுக்கு ஜனாதிபதி அவர்களினால் புத்தகங்கள் வழங்கப்பட்டன. ஒரு பாடசாலைக்கு பல்வேறு பாடத்துறைகளில் 500 புத்தகங்கள் வழங்கப்படுகின்றன.

கிரிபாவ கனிஷ்ட வித்தியாலயம் மற்றும் கம்பள கனிஷ்ட வித்யாலயம் ஆகியவற்றுக்கு மொபிடெல் நிறுவனம் நன்கொடையாக வழங்கிய இரண்டு மடிக்கணினிகளையும், டயலொக் நிறுவனம் நன்கொடையாக வழங்கிய தொலைக்காட்சி தொகுதியையும் ஜனாதிபதி அவர்கள் அதிபர்களிடம் ஒப்படைத்தார்.

ராஜங்கனய நீர்த்தேக்கம் மற்றும் உஸ்கல, சியம்பலங்கமுவ குளங்களின் நீரின் மூலம் பிரதேச குளக்கட்டமைப்பை வளப்படுத்துவதற்கான சாத்தியக்கூறுகள் குறித்து மக்கள் அதிகாரிகளின் கவனத்திற்கு கொண்டுவந்தனர்.

விவசாயத்திற்காக குளம் முறையில் விவசாய கிணறுகளை அமைக்கவும், மதுராகம நீர் திட்டத்திற்கு நீர் சுத்திகரிப்பு இயந்திரமொன்றை வழங்கவும் முடிவு செய்யப்பட்டது. சோலே வெவ, சோலேபுர, வீ பொகுன, நிகவெவ, கதுருவெவ மற்றும் மக அந்தரவெவ உள்ளிட்ட அனைத்து குளங்களையும் புதுப்பிக்க உடனடியாக நடவடிக்கை எடுக்குமாறு அதிகாரிகளுக்கு ஜனாதிபதி அவர்கள் அறிவுறுத்தினார். கிரிபாவ பகுதியில் குடிநீர் தேவைகளுக்காக 16 நனோ சுத்திகரிப்பு இயந்திரங்களை நிறுவுமாறு நீர் வழங்கல் மற்றும் வடிகால் அமைச்சுக்கு உத்தரவிடப்பட்டுள்ளது.

பிரதேச மக்களுக்கு பிரச்சினையாகவுள்ள காட்டு யானைகள் கிராமத்திற்குள் வரும் பிரச்சினைக்கு தீர்வாக மின்சார யானை வேலியை செயற்படுத்தவும் அறிவுறுத்தப்பட்டது.

கிரிபாவ கிராம மருத்துவமனை, ராஜங்கனய பெரகும்புர கிராம மருத்துவமனை மற்றும் கல்கமுவ தள வைத்தியசாலை ஆகியவற்றில் மருத்துவர்கள், தாதியர்கள் மற்றும் ஏனைய ஊழியர்களின் பற்றாக்குறையை நிவர்த்தி செய்யவும் உட்கட்டமைப்பு வசதிகளை அபிவிருத்தி செய்ய நடவடிக்கை எடுக்குமாறும் ஜனாதிபதி அவர்கள் அதிகாரிகளிடம் கூறினார்.

கிரிபாவ பிரதேச செயலக பிரிவில் 33 வீதிகளில் 105 கி.மீ வீதி வலையமைப்பை விரைவாக அபிவிருத்தி செய்யவும் முடிவு செய்யப்பட்டது.

பஹல கிரிபாவ மகா வித்தியாலயம், பொத்தானேகம விஜய கனிஷ்ட வித்தியாலயம், இஹல மரதன்கடவல ஆரம்பப் பாடசாலை, கம்பள கனிஷ்ட வித்தியாலயம், ராஜாங்கனைய அசோகா மாலா நவோதய பாடசாலை, சமுத்ரா மகா வித்தியாலயம் மற்றும் மயிலேவ மகா வித்தியாலயம் உள்ளிட்ட பிரதேச பாடசாலைகளின் ஆசிரியர் பற்றாக்குறையை நிவர்த்திக்கவும், உட்கட்டமைப்பு வசதிகளை அபிவிருத்தி செய்யவும் நடவடிக்கை எடுக்குமாறு ஜனாதிபதி அவர்கள் கல்வி அதிகாரிகளுக்கு அறிவுறுத்தினார்.

கிரிபாவ பிரதேச சபை விளையாட்டரங்கு மற்றும் கிரிபாவ மகா வித்தியாலய விளையாட்டரங்கு ஆகியவற்றின் அபிவிருத்தி பணிகளை நாளை (07) ஆரம்பிக்கவும், பிரதேச பாடசாலைகளின் விளையாட்டு மைதானங்கள், பாதுகாப்பு வேலிகள் அமைத்தல் மற்றும் சுகாதார வசதிகளை வழங்குவதற்கான பணி இராணுவ பொறியியல் சேவைகள் பிரிவுக்கு ஒப்படைக்கப்பட்டுள்ளது.

வேரகல விகாரையிலிருந்து பொத்தானேகமவிற்கு சிசு செரிய பஸ் வண்டியொன்றை திங்கள்கிழமை (08) முதல் சேவையில் ஈடுபடுத்துமாறு ஜனாதிபதி அவர்கள் அறிவுறுத்தியுள்ளார்.

பண்ணை விவசாயிகள் எதிர்கொள்ளும் பிரச்சினைகள் குறித்து விரிவாக கலந்துரையாடப்பட்டது. ஆய்வுகூட வசதிகளுடன் கால்நடை மருத்துவ அலுவலகமொன்றை நிறுவ வேண்டியதன் அவசியத்தை ஜனாதிபதி அவர்கள் வலியுறுத்தினார். இப்பகுதியில் மேய்ச்சல் நிலங்களின் அபிவிருத்தியையும் விரைவுபடுத்த நடவடிக்கை எடுக்குமாறு ஜனாதிபதி அவர்கள் அறிவுறுத்தினார்.

பிரதேசத்தின் மின்சாரம், தகவல் தொடர்பு மற்றும் சுகாதாரம் உள்ளிட்ட அத்தியாவசிய வசதிகளை விரைவுபடுத்தவும் முடிவு செய்யப்பட்டது.

அமைச்சர் ஜோன்ஸ்டன் பெர்னாண்டோ, வடமேல் மாகாண ஆளுநர் ராஜா கொலுரே, இராஜாங்க அமைச்சர்களான தயாசிறி ஜயசேக்கர, டி.பி. ஹேரத், பாராளுமன்ற உறுப்பினர்களான அனுர பிரியதர்ஷன யாப்பா, சரித ஹேரத், ஜயரத்ன ஹேரத், சாந்த பண்டார, குணபால ரத்னசேகர, அசங்க நவரத்ன, யு.கே சுமித் உடுகும்புர, சமன்பிரிய ஹேரத், மஞ்சூலா திசானாயக்க, ஜனாதிபதியின் தலைமை ஆலோசகர் லலித் வீரதுங்க, மாவட்ட மக்கள் பிரதிநிதிகள், அமைச்சுக்களின் செயலாளர்கள், அரச நிறுவனங்களின் தலைவர்கள் உள்ளிட்டோர் இந்த நிகழ்வில் கலந்துகொண்டனர்.

2021.02.22 அன்று இடம்பெற்ற அமைச்சரவைக் கூட்டத்தில் எட்டப்பட்ட தீர்மானங்கள்

: செவ்வாய்க்கிழமை, 23 பிப்ரவரி 2021

அரசாங்க தகவல் திணைக்களத்தின் பிரச்சார பிரிவினால் சிங்கள மொழியிலான அமைச்சரவை தீர்மான ஆவணம் தமிழ் மொழியில் மொழிபெயர்க்கப்பட்டுள்ளது.

2021.02.22 அன்று இடம்பெற்ற அமைச்சரவைக் கூட்டத்தில் எட்டப்பட்ட தீர்மானங்கள் பின்வருமாறு:

01. 2021 நிதியாண்டுக்கான நிதி ஆணைக்குழுவின் பரிந்துரைகள்

இலங்கையின் அரசியலமைப்பு, 154G அரசியலமைப்பின் பிரகாரம் நிறுவப்பட்டுள்ள நிதி ஆணைக்குழு மாகாண சபைகளுக்கான வருடாந்த வரவு செலவுத்திட்டத்தின் மூலம் செலவிடல்களின் போது கடைப்பிடிக்க வேண்டிய கொள்கைகள் பற்றி மேன்மைதங்கிய ஜனாதிபதி அவர்களுக்கு சமர்ப்பிக்க வேண்டும். அதற்கமைய, நிதி ஆணைக்குழு 2021 நிதியாண்டுக்கான பரிந்துரைகள் மேன்மைதங்கிய ஜனாதிபதி அவர்களுக்கு சமர்ப்பித்துள்ளது. நிதி ஆணைக்குழுவால் சமர்ப்பிக்கப்பட்டுள்ள குறித்த பரிந்துரைகளை நடைமுறைப்படுத்தவும், அரசியலமைப்பின் 154G(7) அரசியலமைப்பின் பிரகாரம் குறித்த பரிந்துரைகளைப் பாராளுமன்றத்திற்குச் சமர்ப்பிதற்கும் மேன்மைதங்கிய ஜனாதிபதி அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

02. 1969 ஆம் ஆண்டு 01 ஆம் இலக்க ஏற்றுமதி இறக்குமதி (கட்டுப்பாடு) சட்டத்தின் கீழ் வெளியிடப்பட்டுள்ள ஒழுங்குவிதிகள் பாராளுமன்ற அங்கீகாரத்திற்காக சமர்ப்பித்தல்

உள்ளூர் நெசவு மற்றும் பத்திக் ஆடைகள் இறக்குமதி ஒழுங்குபடுத்தல், கடற்றொழில் கலன்கள், பயணிகள் போக்குவரத்துக் கடல் கலன்கள் இறக்குமதி ஒழுங்குபடுத்தல் மற்றும் உள்ளூர் கைத்தொழில்களின் தேவைகளுக்காக உள்ளூரில் தயாரிக்கப்படாத தெரிவு செய்யப்பட்ட பொருட்களின் இறக்குமதிக் கட்டுப்பாடுகளைத் தளர்த்துவதற்காக 1969 ஆம் ஆண்டு 01 ஆம் இலக்க ஏற்றுமதி இறக்குமதி (கட்டுப்பாடு) சட்டத்தின் கீழ் காணப்படும் ஒழுங்குவிதிகள் அடங்கலாக 2020 திசம்பர் மாதம் 14 ஆம் திகதி 2206ஃ5 இலக்கம் மற்றும் 2020 திசம்பர் மாதம் 24 2207/15 இலக்க அதி விசேட வர்த்தமானி மூலம் வெளியிடப்பட்டுள்ளது. அதற்கமைய, குறித்த ஒழுங்குவிதிகளின் அங்கீகாரத்திற்காக பாராளுமன்றத்திற்குச் சமர்ப்பிதற்காக நிதி அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

03. முதலீடுகளை துரிதப்படுத்தல்

அண்மையில் சர்வதேச ரீதியாக அங்கீகரிக்கப்பட்டுள்ள முதலீட்டாளர்கள் சிலர் இலங்கையில் முதலிடுவதற்காக தங்களின் ஆர்வத்தை வெளிப்படுத்தியுள்ளனர். ஆனாலும் அவ்வாறான முதலீட்டாளர்களுக்கு வசதியளிப்பதற்காக தற்போது நடைமுறையிலுள்ள பொறிமுறை நீண்ட செயன்முறையைக் கொண்டுள்ளதால், முதலீட்டாளரின் ஆர்வத்திற்கமைய இலங்கையில் முதலீடுகள் தொடர்பான அதிகாரிகள் கருத்திட்டங்களை மேற்கொள்வதற்கு முயற்சி எடுக்க நேரிட்டுள்ளது. இந்நிலையின் கீழ் அவ்வாறான முதலீடுகளை ஊக்குவிப்பதற்காக மிகவும் முறைசார் பொறிமுறையை நிறுவுவதற்கான துரித தேவையுள்ளமையை அரசாங்கம் அடையாளங் கண்டுள்ளது. அதனால், 'அமைச்சரவையால் நியமிக்கப்பட்டுள்ள முதலீட்டு முகாமைத்துவ குழு' எனும் பெயரில் திறைசேரி செயலாளரின் தலைமையில் ஏற்புடைய அமைச்சுக்களின் செயலாளர்கள் மற்றும் முதலீட்டு சபையின் தலைவரின் பங்குபற்றலுடன் குழுவொன்றை நியமிப்பதற்கும், முதலீட்டு யோசனைகளுக்கு துரிதமான அனுமதிகளை வழங்குவதற்காக தேவையான நடவடிக்கைகளை மேற்கொள்ளல் குறித்த குழுவிடம் ஒப்படைப்பதற்கும் நித அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

04. முன்மொழியப்பட்டுள்ள அம்பாந்தோட்டை காட்டு யானைகள் முகாமைத்துவ வனத்தை பிரகடனம் செய்தல்

அம்பாந்தோட்டை மாவட்டத்தில் இடம்பெற்று வரும் துரித அபிவிருத்தி கருத்திட்டங்களால் காட்டு யானைகள் உள்ளிட்ட ஏனைய வன விலங்குகளின் வாழிடங்கள் மற்றும் இடமாறும் நடைபாதைகள் மிகவும் பாதிப்புக்குள்ளாகி வருகின்றன. இந்நிலைமையால் குறித்த பிரதேசங்களில் நாளாந்தம் யானை மனித மோதல்கள் அதிகரித்து வருவதுடன், அதற்குத் தீர்வாக, காட்டு யானைகள் இடமாறும் நடைபாதைகள் அமைந்துள்ள விதங்களை ஆய்வுகள் மூலம் உறுதிப்படுத்தி காட்டு யானைகள் மற்றும் ஏனைய வன விலங்குகளுக்கான காட்டு யானைகள் முகாமைத்துவ வனத்தை பிரகடனப்படுத்துவதற்கு தேவையான ஆரம்பப் படிமுறைகள் மேற்கொள்ளப்பட்டுள்ளன. அதற்கமைய, வனப் பாதுகாப்புத் திணைக்களம் மற்றும் மகாவலி அதிகார சபைக்குச் சொந்தமான 23,746.55 ஹெக்ரயார் நிலப்பரப்பில் முன்மொழியப்பட்டுள்ள வனம் அடையாளங் காணப்பட்டுள்ளது. அதற்குத் தேவையான வழிகாட்டல்கள் மற்றும் ஒழுங்குவிதிகள் உள்ளடங்கிய வர்த்தமானி அறிவித்தல் வனப் பாதுகாப்புத் திணைக்களம் மற்றும் மகாவலி அதிகார சபையின் உடன்பாட்டுடன் தயாரிக்கப்பட்டுள்ளது. குறித்த வர்த்தமானி அறிவித்தலுக்கான சட்ட வரைஞரின் உடன்பாட்டு எட்டப்பட்ட பின்னர், அரச வர்த்தமானியில் அறிவிப்பதற்கு நீர்ப்பாசன அமைச்சர் மற்றும் வன சீவராசிகள் மற்றும் வனப் பாதுகாப்பு அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

05. கைத்தொழில் அமைச்சின் காரியாலய வளாகத்தை நகர அபிவிருத்தி அதிகாரசபைக்கு ஒப்படைத்து புதிய காரியாலய வளாகத்தை நிறுவுதல்

கைத்தொழில் அமைச்சு தற்போது இயங்கி வரும் காணி 01 ஏக்கர் 07 பேர்சர்ஸ் இனைக் கொண்டுள்ளதுடன், குறித்த காணி பொருளாதார மற்றும் வர்த்தக ரீதியான பெறுமதியைக் கொண்ட இடத்தில் அமைந்துள்ளது. குறித்த காணியின் சமகாலப் பெறுமதி 2.32 பில்லியன் ரூபாய்கள் என அரச மதிப்பீட்டாளரால் மதிப்பீடு செய்யப்பட்டுள்ளது. பொருளாதார ரீதியாக மிகவும் பயனுள்ள செயற்பாட்டுக்கு ஏற்புடைய வகையில் குறித்த காணித்துண்டை நகர அபிவிருத்தி அதிகார சபைக்கு மாற்றி வழங்குவதற்கும், அதற்குப் பதிலாக தேவையான தளபாடங்கள் மற்றும் ஏனைய வசதிகளுடன் கூடிய 50,000 சதுர அடிகளைக் கொண்ட தேவையான உட்கட்டமைப்பு வசதிகளுடன் கூடியதும் 75 வாகன தரிப்பிட வசதிகளை கொண்டதுமான கட்டடிடமொன்றை கைத்தொழில் அமைச்சுக்கு நகர அபிவிருத்தி அதிகாரசபை மூலம் பெற்றுக் கொள்வதற்கும் கைத்தொழில் அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

06. களுத்துறை கைத்தொழில் பேட்டையை விரிவாக்கம் செய்தல்

களுத்துறை பிரதேச செயலகப் பிரிவில் 'புலர்டன் தோட்டம்' காணியில் 50 ஏக்கர் காணியில் களுத்துறை கைத்தொழில் பேட்டை அமைந்துள்ளதுடன், தற்போது 33 முதலீட்டாளர்கள் தமது தொழிற்சாலைகளை ஆரம்பித்து வர்த்தக உற்பத்தி நடவடிக்கைகளை மேற்கொண்டு வருகின்றனர். குறித்த முதலீட்டாளர்கள் 837 மில்லியன் ரூபாய்கள் முதலிட்டுள்ளதுடன், 775 தொழில் வாய்ப்புக்களும் வழங்கப்பட்டுள்ளது. மேல் மாகாணத்தில் தொழிற்சாலைகளை ஆரம்பிப்பதற்கான காணித்துண்டுகளை வழங்குவதற்கு மேல்மாகாணத்தில் அமைந்துள்ள 08 கைத்தொழில் பேட்டைகளிலும் காணிகள் இல்லை. குறித்த விடயத்தை கருத்தில் கொண்டு, களுத்துறை கைத்தொழில் பேட்டைக்கு அருகாமையில் அமைந்துள்ள 1.946 ஹெக்ரயார் அரச காணித்துண்டை கைத்தொழில் பேட்டையை விரிவாக்கம் செய்வதற்காக ஒதுக்குவதற்கும், தேவையான உட்கட்டமைப்பு வசதிகளை மேற்கொண்ட பின்னர் பிரதேச கைத்தொழில் பேட்டைகள் அபிவிருத்தி நிகழ்ச்சித்திட்டத்தின் கீழ் கைத்தொழிலாளர்களுக்கு வழங்குவதற்கும் கைத்தொழில் அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

07. அரச உடமையாக்கப்பட்ட மண் மற்றும் மரங்களை விடுவிப்பதற்கான செயன்முறை

நாடளாவிய ரீதியில் அமைந்துள்ள நீதிமன்றங்களால் அரச உடமையாக்கப்பட்ட மண் மற்றும் மரங்களை வணக்கத் தலங்களை அமைப்பதற்கும் செப்பனிடுவதற்கும் மானிய விலையில் பெற்றுக் கொடுப்பதற்கு அமைச்சரவை அங்கீகாரம் கிடைத்துள்ளதுடன், குறித்த அங்கீகாரம் 2020 திசம்பர் மாதம் 31 ஆம் திகதியுடன் முடிவடைந்துள்ளது. குறித்த நிகழ்ச்சித்திட்டத்தின் கீழ் தற்போது கடைப்பிடிக்கப்பட்டு வரும் பொறிமுறையை திருத்தம் செய்து தொடர்ந்து அமுலாக்கம் செய்வதற்கு நீதி அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

08. மனித வியாபாரம் தொடர்பாகக் கண்காணித்தல் மற்றும் தடுத்தலுக்கான தேசிய செயற்பாட்டுத் திட்டம் 2021 – 2025

மனித வியாபாரம் தொடர்பாகக் கண்காணித்தல் மற்றும் தடுத்தலுக்கு 2015 – 2019 வரை நடைமுறையில் காணப்பட்ட செயற்பாட்டுத் திட்டத்தை மீளாய்வுக்குட்படுத்தி குறித்த திட்டத்தை நடைமுறைப்படுத்தும் போது பெற்றுக் கொண்ட அனுபவங்கள் மற்றும் கருத்துக்களை கருத்தில் கொண்டு, 2021-2025 ஆம் ஆண்டில் நடைமுறைப்படுத்துவதற்கு திட்டமிடப்பட்டுள்ள செயற்பாட்டுத் திட்டம் தயாரிக்கப்பட்டுள்ளது. அதற்கமைய, 2021-2025 ஆண்டுக்கான மனித வியாபாரம் தொடர்பாகக் கண்காணித்தல் மற்றும் தடுத்தலுக்கான தேசிய செயற்பாட்டுத் திட்டத்தை நடைமுறைப்படுத்துவதற்காக நீதி அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

09. கொவிட் 19 தடுப்பூசி நிகழ்ச்சித்திட்டம்

கொவிட் 19 வைரசில் இருந்து பாதுகாப்புப் பெறுவதற்காக நாட்டின் மொத்த சனத்தொகையில் 14 மில்லியன் பேருக்கு கொவிட் 19 தடுப்பூசி வழங்குவதற்கும் சுகாதார அமைச்சு திட்டமிட்டுள்ளது. அதற்கமைய, பதில் சுகாதார அமைச்சர் அவர்கள் சமர்ப்பித்த கீழ்க்காணும் யோசனைகளுக்கு அமைச்சரவை அங்கீகாரம் வழங்கியுள்ளது.

• COVAX வசதியளிப்பின் கீழ் கொவிட் 19 தடுப்பூசியை பெற்றுக் கொள்வதைத் துரிதப்படுத்துவதற்காக COVAX பொறிமுறை மூலம் சமர்ப்பிக்கப்பட்டுள்ள தரநியம இழப்பீடு ஒப்பந்தத்தில் (Standardized Indemnification Agreement) கையொப்பமிடுவதற்கும்

• இந்தியாவின் The Serum Institute Life Sciences Private Limited இற்கு நேரடி விலைமனுக் கோரலின் அடிப்படையில் Oxford AstraZeneca தடுப்பூசி 10 மில்லியன்களை 52.5 அமெரிக்க டொலர்களுக்கு இலங்கை அரச மருந்துகள் கூட்டுத்தாபனத்தின் மூலம் கொள்வனவு செய்வதற்கும்

• பிரித்தானியாவின் AstraZeneca நிறுவனத்தின் மூலம் தயாரிக்கப்பட்டுள்ள கொவிட் 19 தடுப்பூசிகள் 3.5 மில்லியன்களை கொள்வனவு செய்வதற்கும் அரச மருந்துகள் கூட்டுத்தாபனமும் குறித்த நிறுவனமும் ஒப்பந்தமொன்று எட்டுவதற்கும்

10. சுற்றாடல் நேய சேதனப் பசளைகள் விநியோக முன்னோடிக் கருத்திட்டம் - நெற் செய்கைக்கான 2021 சிறுபோக விநியோகம்

2020 சிறுபோகம் மற்றும் 2020/21 பெரும்போக செய்கையில் சுற்றாடல் நேயமிகுந்த சேதனப் பசளைப் பயன்பாட்டை ஊக்குவிப்பதற்காக தெரிவு செய்யப்பட்ட மாவட்டங்களில் விவசாயிகளுக்கு சேதனப் பசளை மற்றும் திரவ சேதனப் பசளைகளை இலவசமாகப் பெற்றுக் கொடுப்பதற்கான முன்னோடி கருத்திட்டம் நடைமுறைப்படுத்தப்பட்டுள்ளது. குறித்த கருத்திட்டத்தின் பயன்களைப் பெறுவதற்கு குறைந்தது 04 போகங்களாவது தொடர்ந்து செய்கை மேற்கொள்ளப்பட வேண்டும். அதற்கமைய, குறித்த முன்னோடிக் கருத்திட்டம் மேலும் 2021 இல் சிறுபோகத்தில் மேற்கொள்வதற்கும், அதற்குத் தேவையான சேதனப் பசளை மற்றும் திரவ சேதனப் பசளை போன்றவற்றை பசளைகள் தொடர்பான ஆலோசனைக் குழுவால் அங்கீகரிக்கப்பட்டுள்ள பரிந்துரைகளை அடிப்படையாகக் கொண்டு அனுமதியளிக்கப்பட்ட பசளை உற்பத்தியாளர்களிடமிருந்து கொள்வனவு செய்வதற்கு பேச்சுவார்த்தை உடன்பாட்டுக் குழுவொன்றை நியமிப்பதற்கும், குறித்த குழுவின் பரிந்துரைகளை அடிப்படையாகக் கொண்டு குறித்த மாவட்டங்களில் தெரிவு செய்யப்பட்ட விவசாயிகளுக்கு பசளை வழங்குவதற்கும் கமத்தொழில் அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

11. இலங்கை பொலீசுக்கு 2,000 முச்சக்கர ஊர்திகளை கொள்வனவு செய்தல்

நாடளாவிய ரீதியில் சட்ட அமுலாக்கல் மற்றும் சட்ட ஒழுங்குகளைப் பாதுகாப்பதற்கான பொறுப்பு ஒப்படைக்கப்பட்டுள்ள பிரதான நிறுவனமான இலங்கை பொலிசுக்கு ஒப்படைக்கப்படும் கடமைகளைச் சரியான வகையில் மேற்கொள்வதற்கு போதுமானளவு வாகனங்கள் இன்மையால், அதற்கு துரித தீர்வாக 2,000 முச்சக்கர ஊர்திகளை கொள்வனவு செய்வதற்காக பொதுமக்கள் பாதுகாப்பு அமைச்சர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

12. பாகிஸ்தான் இஸ்லாமாபாத் கொம்சட்ஸ் (COMSATS) பல்கலைக்கழகம் மற்றும் கைத்தொழில் தொழிநுட்ப நிறுவனத்திற்கு (ITT) இடையிலான ஒத்துழைப்பு நோக்கு கூற்று

பாகிஸ்தான் இஸ்லாமாபாத் கொம்சட்ஸ் (COMSATS) பல்கலைக்கழகம் மற்றும் தொழிற்சாலை தொழிநுட்ப நிறுவனத்திற்கு (ITT) இடையிலான கல்வி மற்றும் ஆராய்ச்சி நடவடிக்கைகள் தொடர்பான ஒத்துழைப்பு நோக்கு கூற்று கையொப்பமிடுவதற்கு யோசனை தெரிவிக்கப்பட்டுள்ளது. அதற்கமைய, குறித்த நோக்கு கூற்றில் கையொப்பமிடுவதற்காக தொழிநுட்ப அமைச்சராக மேன்மைதங்கிய ஜனாதிபதி அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

13. பாகிஸ்தான கராச்சி பல்கலைக் கழகத்தில் இரசாயன மற்றும் உயிரியல் விஞ்ஞானம் தொடர்பான சர்வதேச நிலையம் மற்றும் கைத்தொழில் தொழிநுட்ப நிறுவனத்திற்கும் இடையில் புரிந்துணர்வு ஒப்பந்தம்

பாகிஸ்தான் கராச்சி பல்கலைக் கழகத்தில் இரசாயன மற்றும் உயிரியல் விஞ்ஞானம் தொடர்பான சர்வதேச நிலையம் மற்றும் கைத்தொழில் தொழிநுட்ப நிறுவனத்திற்கும் இடையில் ஆராய்ச்சி மற்றும் கற்கை நடவடிக்கைகள் தொடர்பான புரிந்துணர்வு ஒப்பந்தத்திற்கு எட்டுவதற்கு யோசனை தெரிவிக்கப்பட்டுள்ளது. அதற்கமைய, குறித்த புரிந்துணர்வு ஒப்பந்தத்தில் கையொப்பமிடுவதற்காக தொழிநுட்ப அமைச்சராக மேன்மைதங்கிய ஜனாதிபதி அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

14. இலங்கை ஜனநாயக சோசலிச குடியரசின் முதலீட்டு சபை மற்றும் பாகிஸ்தான் இஸ்லாமிய குடியரசின் முதலீட்டுச் சபைக்கும் இடையிலான ஒத்துழைப்புக்கள் தொடர்பான புரிந்துணர்வு ஒப்பந்தம்

இலங்கை ஜனநாயக சோசலிச குடியரசின் முதலீட்டு சபை மற்றும் பாகிஸ்தான் இஸ்லாமிய குடியரசின் முதலீட்டுச் சபைக்கும் இடையிலான முதலீட்டு ஒத்துழைப்புக்களை மேம்படுத்துவதற்காக புரிந்துணர்வு ஒப்பந்தத்தை மேற்கொள்வதற்கு யோசனை தெரிவிக்கப்பட்டுள்ளது. அதற்கமைய, குறித்த புரிந்துணர்வு ஒப்பந்தத்தை மேற்கொள்வதற்காக நிதி அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

15. வரவு செலவு திட்டத்தை நடைமுறைப்படுத்தல் மற்றும் வரிச் சட்டத்தை திருத்தம் செய்தல்

2021 ஆம் ஆண்டு சமர்ப்பிக்கப்பட்ட வரவு செலவுத் திட்டத்தின் மூலம் அனைத்து பங்குதாரர்களுக்கான இலகுவானதும், வெளிப்படைத் தன்மையுடன் கூடியதுமான, வினைத்திறனான வரி முறைமை அறிமுகப்படுத்தப்பட்டுள்ளது. அதற்கமைய, குறித்த வரி யோசனைகளை நடைமுறைப்படுத்துவதற்காக சட்டமூலத்தை தயாரிப்பதற்கும் அதற்கு ஏற்புடைய ஏனைய நடவடிக்கைகளை மேற்கொள்வதற்காகவும் நிதி அமைச்சராக கௌரவ பிரதமர் அவர்கள் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

16. 2020/21 பெரும்போக நெல் கொள்வனவு நிகழ்ச்சித்திட்டம்

2020/21 பெரும்போக நெல் கொள்வனவு நிகழ்ச்சித்திட்டத்தின் பெறுபேறுகள் அமைச்சரவையால் மீளாய்வு செய்யப்பட்டுள்ளது. குறித்த நிகழ்ச்சித்திட்டத்தின் கீழ் விவசாயிகளுக்கு உயர்ந்தபட்ச விலை கிடைக்கும் வகையில் தனியார் துறையினருடன் போட்டித் தன்மையில் நெல் கொள்வனவுக்கு அமைச்சரவை அங்கீகாரம் வழங்கியுள்ளது. அவ்வாறு, உயர்ந்தபட்ச விலையின் கீழ் நெல் கொள்வனவு செய்யப்பட்டாலும் எதிர்வரும் காலங்களில் நாட்டரிசியின் விலையை 98 ரூபாவுக்கு யாதொரு மாற்றமுமின்றி பேணுவதற்கு அமைச்சரவை தீர்மானித்துள்ளது.

கிராமத்தைப் போலவே கிராம வாழ்க்கையும் அழகாக இருக்க வேண்டும் – மீமுரே “கிராமத்துடன் உரையாடல்“ நிகழ்ச்சியில் ஜனாதிபதி தெரிவிப்பு

: ஞாயிற்றுக்கிழமை, 14 பிப்ரவரி 2021

கிராமவாசிகளினால் சூழலுக்கு எந்தத் தீங்கும் இல்லை…

“கிராமம் அழகானது. அது போலவே கிராம வாழ்க்கையும் அழகாக இருக்க வேண்டும் ”என்று ஜனாதிபதி கோட்டாபய ராஜபக்ஷ அவர்கள் தெரிவித்தார்.

கிராமவாசிகளினால் கிராமப்புற சூழலுக்கு எந்தத் தீங்கும் ஏற்படுவது இல்லை. கிராமவாசிகள்தான் இதுவரை கிராமச் சூழலைப் பாதுகாத்துள்ளதாகவும் அவர் தெரிவித்தார். நமது மூதாதையர்களின் காலத்திலிருந்து பாரம்பரியமாக மேற்கொள்ளப்பட்டுவரும் விவசாய நடவடிக்கைகளை சூழலுக்கு தீங்கு விளைவிப்பவையாக நான் காணவில்லை என்றும் ஜனாதிபதி அவர்கள் தெரிவித்தார்.

இன்று (13) முற்பகல் கண்டி மாவட்டத்தில் உள்ள உடுதும்பர பிரதேச செயலக பிரிவில் உள்ள மீமுரே கணிஷ்ட வித்தியாலயத்தில் இடம்பெற்ற ‘கிராமத்துடன் உரையாடல்’ 10 வது நிகழ்ச்சியில் பங்கேற்ற போதே ஜனாதிபதி அவர்கள் இந்த கருத்துக்களை தெரிவித்தார்.

மக்கள் சந்திப்பில் கலந்து கொள்வதற்காக கைகாவல கணிஷ்ட வித்தியாலயத்திற்கு வருகை தந்த ஜனாதிபதி அவர்கள், பாடசாலை மாணவர்கள், ஆசிரியர்கள் மற்றும் பெற்றோர்களுடன் சுமுகமாக கலந்துரையாடி, பாடசாலையின் குறைபாடுகள் குறித்து கேட்டறிந்தார்.

கைகாவல கணிஷ்ட வித்தியாலயத்திற்கு மொபிடெல் நிறுவனம் நன்கொடை அளித்த ஸ்மார்ட் வகுப்பறை, மீமூரே ஆரம்பப் பாடசாலைக்கு வழங்கிய மடிக்கணினி, அதிவேக இணைய வசதிகள் மற்றும் டயலொக் நிறுவனம் வழங்கிய தொலைக்காட்சி மற்றும் இணைப்பு ஆகியவற்றை ஜனாதிபதி அவர்கள் அதிபரிடம் கையளித்தார்.

மீமூரே-உடுதும்பர வீதியில் இலங்கை போக்குவரத்து சபையினால் புதிதாக சேவையில் ஈடுபடுத்தப்பட்ட பஸ் வண்டியின் முதலாவது பயணமும் ஜனாதிபதி அவ்களின் பங்கேற்புடன் இடம்பெற்றது.

“கிராமத்துடன் உரையாடல்” திட்டம் 2020 செப்டம்பர் 25 அன்று பதுளை மாவட்டத்தில் ஆரம்பிக்கப்பட்டது. மாத்தளை, இரத்தினபுரி, அனுராதபுரம், அம்பாறை , பொலன்னறுவை, களுத்துறை, மொனராகலை மற்றும் கேகாலை மாவட்டங்களை உள்ளடக்கி கடந்த நிகழ்ச்சிகள் ஏற்பாடு செய்யப்பட்டன. இதுவரை சரியான கவனம் செலுத்தப்படாத நகரத்திற்கு வெளியே உள்ள தொலைதூர கிராமங்களைச் சேர்ந்த மக்களை சந்தித்து, அவர்களின் பிரச்சினைகளை விசாரித்து, அச்சந்தர்ப்பத்திலேயே அதிகாரிகளின் கவனத்திற்குக் கொண்டு வந்து தீர்வுகளை வழங்குவதே ஜனாதிபதியின் நோக்கமாகும். தீர்ப்பதற்கு காலம் செல்லும் பிரச்சினைகள் பின்னர் நடவடிக்கை எடுக்கப்படுவதற்காக குறித்துக்கொள்ளப்படும். கிராம மக்களிடம் சென்று, அவர்களின் பிரச்சினைகளைக் கேட்டறிந்து, அவர்களின் முன்மொழிவுகளில் இருந்து தீர்வுகளைக் காண்பதும் இந்த திட்டத்தின் நோக்கம்.

பழைமை வாய்ந்த மீமுரே கிராமம் கண்டி-மஹியங்கன வீதியில் 40 கி.மீ தொலைவில் ஹுன்னஸ்கிரியவுக்கும் அங்கிருந்து 35 கி.மீ தூரத்தில் பதுளை மற்றும் மாத்தளை மாவட்டங்களுக்கும் எல்லையில் கண்டி மாவட்டத்தின் ஒரு முனையில் அமைந்துள்ளது.

மீமுரே கிராமம் உலக மரபுரிமையான பாதுகாக்கப்பட்ட நக்கீல்ஸ் வனப்பகுதியின் இதயமாகவும் கருதப்படுகிறது. கரம்பகெட்டிய, கும்புக்கொல்ல, புஸ்ஸேஎல, கைகாவல மற்றும் மீமுரே கிராம சேவகர் பிரிவுகள் உடுதும்பரை பிரதேச செயலகப் பிரிவைச் சேர்ந்தவையாகும்.

378 குடும்பங்களைக் கொண்ட இந்த கிராமங்களின் மக்கள் தொகை1127 ஆகும். நெற் பயிர்ச்செய்கை இந்த கிராம மக்களின் முக்கிய வாழ்வாதாரமாகும். இன்னும் சிலர் மிளகு உள்ளிட்ட சிறு ஏற்றுமதி பயிர்களை பயிரிடுவதிலும், கித்துல் சார்ந்த கைத்தொழில்களிலும் ஈடுபட்டுள்ளனர்.

வீதிகள் அபிவிருத்தி செய்யப்படாதிருப்பதும், விவசாய நிலங்களின் தெளிவான உரிமையில்லாதிருப்பதும் தாம் எதிர்கொள்ளும் முக்கிய பிரச்சினைகள் என்று மக்கள் ஜனாதிபதி அவர்களிடம் தெரிவித்தனர்.

வீதிப் பிரச்சினைகள் தொடர்பாக முன்வைக்கப்பட்ட முறைப்பாடுகளுக்கு பதிலளித்த ஜனாதிபதி அவர்கள் மீமுரே – ஹுன்னஸ்கிரிய வீதியில் உள்ள இரண்டு பாலங்களையும் திருத்தியமைத்து, வீதியின் அபிவிருத்தியை விரைவில் நிறைவுசெய்யுமாறு அமைச்சின் செயலாளருக்கு அறிவுறுத்தினார்.

மெதிவக்கவிலிருந்து பல்லேவெல வரையிலான வீதி, தொம்பகஹபிட்டியவிலிருந்து 35ஆம் கட்டை வரையிலும், கரம்பகெட்டியவிலிருந்து ஹுலுகெட்டதெகஹ வரையிலும் உள்ள வீதிகள் உள்ளிட்ட வீதிகளை புனரமைக்கும் பணிகளை விரைவுபடுத்தவும் முடிவு செய்யப்பட்டது.

கைகாவல மத்திய மருந்தகத்திற்கு மருத்துவரொருவரை நியமிக்கவும், அம்புலன்ஸ் வண்டியொன்றை வழங்கவும், உடுதும்பர மருத்துவமனையில் மருத்துவர் வெற்றிடங்களை நிரப்பவும், ஏனைய உட்கட்டமைப்பு வசதிகளை மேம்படுத்தவும் நடவடிக்கை எடுக்குமாறு ஜனாதிபதி அவர்கள் அதிகாரிகளுக்கு அறிவுறுத்தினார்.

சுற்றுலா துறையை மேம்படுத்துவதற்காக மீமூரே பிரதேசத்தின் சாத்தியங்கள் குறித்து கவனம் செலுத்திய ஜனாதிபதி அவர்கள், நீர் சாகச விளையாட்டு மற்றும் சுற்றுலா துறைக்கான வசதிகளை மேம்படுத்த வேண்டியதன் அவசியத்தையும் சுட்டிக்காட்டினார். மலையேறுதல் உள்ளிட்ட சுற்றுலா செயற்பாடுகள் மற்றும் சுற்றுலா பயணிகளை ஈர்க்கும் இடங்களை அடையாளம் காணவும், சுற்றுலாத்துறையில் ஈடுபடுவதற்கு உள்ளூர் மக்களுக்கு பயிற்சியளிக்கவும் மீமூரே கிராமத்தில் அரச வங்கியொன்றின் மூலம் ஏடிஎம் வசதிகளை வழங்குவதற்கு நடவடிக்கை எடுப்பது குறித்தும் ஜனாதிபதி அவர்கள் அதிகாரிகளின் கவனத்திற்கு கொண்டு வந்தார்.

காய்கறிகள் மற்றும் பழங்களை பயிரிடுவதில் சேதன உரங்களைப் பயன்படுத்த விவசாயிகளை ஊக்குவிப்பதன் மூலம் மீமூரே கிராமத்திற்கு சுற்றுலாப் பயணிகளின் கவனத்தை ஈர்க்க முடியும் என்று விவசாயத் துறை அமைச்சர் மஹிந்தானந்த அலுத்கமகே சுட்டிக்காட்டினார்.

இப்பகுதியில் ஏலக்காய் செய்கை பற்றி கலந்துரையாடப்பட்டதுடன், இந்த விடயத்தை ஆராய்ந்து முறையான நடவடிக்கை எடுக்க ஒரு குழுவை நியமிக்கும் பொறுப்பு விவசாய அமைச்சரிடம் வழங்கப்பட்டது. மிளகு விளைச்சல் குறைவடைந்திருப்பது குறித்து ஆராயவும் முடிவு செய்யப்பட்டது.

இப்பகுதியில் காணிப் பிரச்சினைகளுக்கு விரைவான தீர்வை வழங்கவும் மின்சார வேலியை புனரமைத்து செயல்படுத்தவும் உடனடியாக நடவடிக்கை எடுக்க வேண்டும் என்று ஜனாதிபதி அவர்கள் உத்தரவிட்டார்.

மீமுரே – கும்புக்கொல்ல – கைகாவல பாடசாலைகளின் ஆசிரியர் பற்றாக்குறையை நிரப்பவும், கணினி அறைகள், நூலகங்கள் உள்ளிட்ட உட்கட்டமைப்பு வசதிகளை மேம்படுத்தவும் அறிவுறுத்தப்பட்டது. இப்பகுதியில் உள்ள முன்பள்ளிகள் மற்றும் அறநெறிப் பாடசாலைகளின் குறைபாடுகளை நிவர்த்தி செய்யவும் முடிவு செய்யப்பட்டது. மூன்று பாடசாலைகளுக்கும் பொதுவான ஒரு ஆசிரியர் இல்லத்தை நிர்மாணிப்பது குறித்தும் ஜனாதிபதி அவர்கள் விசேட கவனம் செலுத்தினார்.

கிராமங்களில் கால்வாய்களை புனரமைத்தல் மற்றும் குடிநீர் பிரச்சினைக்கு தீர்வு காண்பது இப்பகுதியின் மற்ற இரண்டு அடிப்படை தேவைகளாக அடையாளம் காணப்பட்டுள்ளன. தகவல் தொடர்பு மற்றும் இணைய வசதிகளை மேம்படுத்துவதை விரைவுபடுத்தவும் முடிவு செய்யப்பட்டது.

உடுதும்பர பகுதியில் உள்ள புஸ்ஸேஎல- கைகாவல- ஹசலக – வேரகம உள்ளிட்ட பல கிராமங்களில் குடிநீர் பிரச்சினை குறித்து கவனம் செலுத்தி முறையான தீர்வுகளை வழங்குமாறு அமைச்சின் செயலாளருக்கு ஜனாதிபதி அவர்கள் அறிவுறுத்தினார்.

நாட்டின் அனைத்து பாடசாலைகளினதும் குடிநீர் தேவைகளையும் விரைவாக பூர்த்தி செய்ய வேண்டும் என்றும் ஜனாதிபதி அவர்கள் குறிப்பிட்டார்.

ஹுலுகெட்டதெலகஹ, மடகும்புர, நாஎல, கொடயங்கலே மற்றும் பெகிரிமான அணைக்கட்டுக்கள் மற்றும் 06 குளங்களை புனரமைக்குமாறும் ஜனாதிபதி அவர்கள் அறிவுறுத்தினார்.

அமைச்சர்களான மஹிந்தானந்த அலுத்கமகே மற்றும் கெஹெலிய ரம்புக்வெல்ல, ஆளுநர் லலித் யு. கமகே, இராஜாங்க அமைச்சர்களான திலும் அமுனுகம, லொஹான் ரத்வத்த, அநுராத ஜயரத்ன, பாராளுமன்ற உறுப்பினர்களான வசந்த யாப்பா பண்டார, குணதிலக ராஜபக்ஷ, உதய சமிந்த கிரிந்திகொட, ஜனாதிபதியின் தலைமை ஆலோசகர் லலித் வீரதுங்க, முன்னாள் மாகாண முதலமைச்சர் சரத் ஏக்கநாயக்க, மவாட்டத்தின் மக்கள் பிரதிநிதிகள், அமைச்சுக்களின் செயலாளர்கள், அரச நிறுவனங்கள் மற்றும் பாதுகாப்புத் துறை முக்கியஸ்தர்கள் உள்ளிட்டோர் இந்த ‘கிராமத்துடன் உரையாடல்’ நிகழ்ச்சியில் பங்கேற்றனர்.

எல்லா கருத்துக்களுக்கும் பதிலளிக்கச் செல்வதால் வேலை செய்வதற்கான காலம் விரயமாகிறது – விமர்சனங்கள் சகஜமானவை என கருதி நாட்டை வழிநடத்துங்கள்

: வெள்ளிக்கிழமை, 12 பிப்ரவரி 2021

நாம் வைத்துள்ள நம்பிக்கையில் எவ்வித குறைவும் இல்லை, எப்போதும் எமது ஆசீர்வாதம் உள்ளது…

பௌத்த ஆலோசனை சபை ஜனாதிபதியிடம் தெரிவிப்பு…

எல்லோருடையவும் எல்லா கருத்துக்களுக்கும் பதிலளிக்கச் செல்வதன் மூலம் வேலை செய்வதற்கான பெறுமதியான நேரம் விரயமாகிறது. விமர்சனங்களை நியாயமாகக் கருதி சுய சிந்தனையுடன் நாட்டை வழிநடத்துவதே தேவை என பௌத்த ஆலோசனை சபை ஜனாதிபதி கோட்டாபய ராஜபக்ஷ அவர்களிடம் தெரிவித்துள்ளது.

பட்டம் பதவிகள் கிடைக்காத சிலர் என்ன சொன்னாலும், மகா சங்கத்தினரும் மக்களும் ஜனாதிபதி அவர்கள் மீது மிகுந்த நம்பிக்கை வைத்துள்ளனர் என்றும் மகாசங்கத்தினர் தெரிவித்தனர்.

இன்று (12) பிற்பகல் 8 வது தடவையாக ஜனாதிபதி அலுவலகத்தில் இடம்பெற்ற பௌத்த ஆலோசனை சபை கூட்டத்தின் போதே மகாசங்கத்தினர் இதனை தெரிவித்தனர்.

சிலரின் வெறுக்கத்தக்க கருத்துக்களால் மக்கள் பாதிக்கப்பட்டுள்ளார்கள். அரசாங்கம் குறித்து பல்வேறு தரப்பினர் முன்வைக்கும் ஆதாரமற்ற குற்றச்சாட்டுகள் மற்றும் கலங்கப்படுத்தும் நடவடிக்கைகளால் நாம் சோர்வடைந்து விடக்கூடாது. எஞ்சியுள்ள மூன்றரை வருடங்களுக்கும் மேற்பட்ட காலத்தில் நாட்டை கொள்கை ரீதியாக ஆட்சி செய்யுமாறு மகா சங்கத்தினர் ஜனாதிபதி அவர்களிடம் தெரிவித்தனர்.

அடிப்படைவாதிகளின் தற்போதைய செயற்பாடுகள் பௌத்த ஆலோசனை சபையின் விசேட கவனத்தைப் பெற்றது. அன்று ஏழைகள்தான் அவர்களது பிடியில் சிக்கினர். இன்று பணக்காரர்கள், சக்திவாய்ந்த, புகழ்பெற்ற கலைஞர்கள் மற்றும் அரசியல் தலைவர்கள் கூட அடிப்படைவாதிகளுக்கு பலியாகியிருப்பது மிகுந்த கவலையளிப்பதாக உள்ளது என்று மகா சங்கத்தினர் தெரிவித்தனர். குருணாகலையில் உள்ள பிரபல பெண்கள் பாடசாலையொன்றின் பிரதி அதிபர் ஒருவர் மாணவிகள், பெற்றோர்கள் உள்ளிட்டோரை நிர்ப்பந்தமாக அவர்களது பிடிக்குள் கொண்டுவரும் முயற்சியில் ஈடுப்பட்டுள்ளதாக சுட்டிக்காட்டப்பட்டது.

தூதரக சேவை உள்ளிட்ட பதவிகளுக்கு நியமனங்களை செய்யும் போது ஜனாதிபதி அவர்கள் மேற்கொள்ளும் நடைமுறைகளை மகா சங்கத்தினர் பாராட்டியதோடு, தூதரக சேவை பணி ஓய்வு பெறுபவர்களுக்கான ஓய்வு இடமாக மாறக்கூடாது என்றும் சுட்டிக்காட்டினர். மியான்மர், தாய்லாந்து போன்ற நாடுகளுக்கான தூதுவர்கள் பஞ்சசீலத்தை பேணுபவர்களாகவும் கொள்கையுடையவர்களாகவும் இருக்க வேண்டும் என்றும் அவர்கள் தெரிவித்தனர்.

பௌத்த தத்துவம், தொல்பொருள் மற்றும் பண்டைய தளங்கள் பற்றிய தவறான வியாக்கியானங்களை நிறுத்த வேண்டியதன் அவசியத்தையும் மகா சங்கம் வலியுறுத்தியது. அதற்காக பௌத்த நூல்கள் மற்றும் வெளியீடுகள் ஒழுங்குமுறைச் சட்டம் செயல்படுத்தப்பட வேண்டும். திரிபீடக பாதுகாப்பு சபையை செயல்படுத்த வேண்டியதன் அவசியமும் சுட்டிக்காட்டப்பட்டது.

பௌத்த ஆலோசனை சபையின் உறுப்பினர்களான மகா சங்கத்தினர், இராஜாங்க அமைச்சர் விதுர விக்ரமநாயக்க, ஜனாதிபதியின் தலைமை ஆலோசகர் லலித் வீரதுங்க உள்ளிட்ட அதிகாரிகள் இந்த கலந்துரையாடலில் பங்குபற்றினர்.

பக்கம் 14 / 40