போதைப்பொருள் கடத்தல், சுற்றாடல் அழிவு நடவடிக்கைகளுடன் தொடர்புடையவர்கள் எவராக இருந்தாலும் அவர்களது பதவி நிலைகளை பார்க்காது சட்டத்தை நடைமுறைப்படுத்த வேண்டும் என ஜனாதிபதி அவர்கள் வலியுறுத்தினார்.

14ம் திகதி முற்பகல் அநுராதபுரம் சல்காது விளையாட்டரங்கில் இடம்பெற்ற சுற்றாடல் பாதுகாப்பு செயற்திட்டத்தின் ஊடாக ஏற்பாடு செய்யப்பட்டுள்ள அநுராதபுர மாவட்ட விசேட மாநாட்டில் கலந்துகொண்டு உரையாற்றும்போதே ஜனாதிபதி கௌரவ மைத்ரிபால சிறிசேன அவர்கள் மேற்கண்டவாறு தெரிவித்தார்.
சுற்றாடல் பாதுகாப்பின் முக்கியத்துவம் என்பது இன்று ஒரு முக்கிய விடயமாக அறியப்பட்டாலும் இது இன்னும் உரிய முறையில் நடைமுறை ரீதியாக மக்கள் மத்தியில் அமுல்படுத்தப்படவில்லை என்று ஜனாதிபதி அவர்கள் மேலும் தெரிவித்தார்.
சுற்றாடல் பாதுகாப்பு செயற்பாடுகள் ஒருபோதும் எவரும் தட்டிக்கழிக்க முடியாத பொறுப்பாகும் என குறிப்பிட்ட ஜனாதிபதி அவர்கள், காலநிலை மாற்றத்தின் காரணமாக உருவாகியிருக்கும் அனர்த்தங்களின் மூலம் அதிகம் பாதிக்கப்பட்டுள்ள நாடுகளுக்கு மத்தியில் இலங்கை இரண்டாவது இடத்தில் இருப்பதாக புதிய சர்வதேச ஆய்வறிக்கை மூலம் தெரியவந்துள்ளதாகவும் குறிப்பிட்டார்.
பாரிய சுற்றாடல் அழிவுகளுடன் ஏற்பட்டுள்ள இந்த மோசமான நிலைமை பற்றி அனைத்து மக்களும் முக்கிய கவனம் செலுத்த வேண்டியது அவசியமாகும் எனக் குறிப்பிட்ட ஜனாதிபதி அவர்கள், மனிதன் உள்ளிட்ட அனைத்து உயிரினங்களுக்கும் வாழும் உரிமையான சுற்றாடலை பாதுகாப்பதற்கு அரசாங்கம் முன்னெடுத்துள்ள சுற்றாடல் பாதுகாப்பு நிகழ்ச்சி திட்டங்களுடன் தாமதிக்காது அனைவரும் கைகோர்க்க வேண்டும் என்றும் குறிப்பிட்டார்.
இன்று பாதுகாக்கப்பட்ட வனப்பிரதேசங்களுக்கு ஏற்பட்டுள்ள பாரிய அச்சுறுத்தல் நாட்டின் சுற்றாடல் அழிவுக்கு முக்கிய காரணமாக உள்ளதாக குறிப்பிட்ட ஜனாதிபதி அவர்கள், மரம் வெட்டுவதற்காக பயன்படுத்தும் மின்சார வாள்களை பயன்படுத்துவதற்கு அனுமதிப் பத்திரங்களை கட்டாயமாக்கிய முதலாவது அரசாங்கம் என்ற வகையில் அண்மையில் அது பற்றிய தீர்மானத்தை மேற்கொண்டமை சுற்றாடல் பாதுகாப்பை கருத்திற்கொண்டேயாகும் என்றும் குறிப்பிட்டார்.
எதிர்வரும் மார்ச் மாதம் 01ஆம் திகதிக்கு முன்னர் மின்சார வாள்களை வைத்திருப்பவர்கள் அதுபற்றி பொலிஸாருக்கு தெரியப்படுத்தி, பிரதேச செயலகத்தின் ஊடாக அனுமதிப் பத்திரத்தை பெற்றுக்கொள்ள வேண்டியது கட்டாயமானதாகும் எனக் குறிப்பிட்ட ஜனாதிபதி அவர்கள், பொலிஸாரும் கிராமிய நடவடிக்கைகளில் ஈடுபட்டுள்ள அனைத்து கள அலுவலர்களும் இது பற்றி மக்களுக்கு தெளிவுபடுத்த நடவடிக்கை எடுக்க வேண்டியதன் அவசியத்தையும் சுட்டிக்காட்டினார்.
அனுமதிப் பத்திரமின்றி இந்த மின்சார வாள்களை தம்வசம் வைத்திருந்தால் அவர்களுக்கெதிராக சட்ட நடவடிக்கை எடுக்கப்பட்டு தண்டனை வழங்குவது குறித்து விரைவில் வர்த்தமானி பத்திரம் மூலம் அறிவிக்கப்படவுள்ளதாக குறிப்பிட்ட ஜனாதிபதி அவர்கள், இந்த மின்சார வாள்களை நாட்டுக்கு கொண்டுவரும் வர்த்தக நிறுவனங்களுடன் கலந்துரையாடி அதுபற்றிய தீர்மானமொன்றை மேற்கொள்ள எதிர்பார்ப்பதாகவும் தெரிவித்தார்.
முறையற்ற கழிவு முகாமைத்துவமும் சுற்றாடல் அழிவுகளுக்கு பெரிதும் காரணமாகின்றது என குறிப்பிட்ட ஜனாதிபதி அவர்கள், முறையான கழிவு முகாமைத்துவ நிகழ்ச்சித்திட்டங்களுக்கான அரச திட்டங்களை நடைமுறைப்படுத்தும் போது அதற்கெதிரான மக்கள் எதிர்ப்புகள் பெரும் தடையாக உள்ளதாகவும் குறிப்பிட்டார்.
நவீன தொழிநுட்பத்துடன் நடைமுறைப்படுத்தப்படும் கழிவு முகாமைத்துவ திட்டங்கள் பற்றி மக்கள் மத்தியில் போதுமான தெளிவு இல்லாத காரணத்தினால் இத்தகைய எதிர்ப்புகள் தோன்றுவதாக குறிப்பிட்ட ஜனாதிபதி அவர்கள், ஒரு பகுதியில் கழிவு முகாமைத்துவ திட்டம் நடைமுறைப்படுத்தப்படுமாக இருந்தால் பல இடை உற்பத்திகளுடன் விவசாய துறைக்கான பல நன்மைகளும் அப்பிரதேசத்திற்கு அதன் மூலம் கிடைக்குமென்றும் சுட்டிக்காட்டினார்.
அநுராதபுர மாவட்டத்தில் சுற்றாடல் பிரச்சினைகள் பற்றியும் ஜனாதிபதி அவர்கள் கவனம் செலுத்தியதுடன், மல்வத்து ஓயா அபிவிருத்தி திட்டத்தின் நடவடிக்கைகளையும் விரைவில் ஆரம்பிக்கவுள்ளதாகவும் குறிப்பிட்டார்.
அநுராதபுர வீரசிங்ஹ அரிச்சந்திர விளையாட்டரங்கு வளாகத்தில் ஜனாதிபதி அவர்களினால் மரக்கன்றொன்று நடப்பட்டு அநுராதபுர மாவட்ட சுற்றாடல் நிகழ்ச்சித்திட்டம் ஆரம்பித்து வைக்கப்பட்டது.
அநுராதபுர மாவட்டத்தில் இனங்காணப்பட்டுள்ள சுற்றாடல் பிரச்சினைகள் மற்றும் அவற்றுக்கான தீர்வுகள் உள்ளடங்கிய அறிக்கை மாவட்ட செயலாளர் ஆர்.எம்.வன்னிநாயக்கவினால் ஜனாபதிபதி அவர்களிடம் கையளிக்கப்பட்டது.
அநுராதபுர மாவட்ட பாடசாலை மாணவர்களுக்கு பழக்கன்றுகளை வழங்கும் வேலைத்திட்டம், பழச் செய்கை வேலைத்திட்டங்களுக்கு நிதி உதவி வழங்குதல், மாவட்டத்தில் 1,000 இலுப்பை மரக்கன்றுகளை நடுவதற்கான நிதியுதவியை வழங்குதல், புனித நகரிலிருந்து முறையற்ற கழிவு முகாமைத்துவத்தை தடுப்பதற்கான புதிய வேலைத்திட்டமொன்றுக்கு நிதி வழங்குதல் உள்ளிட்ட பல வேலைத்திட்டங்கள் ஜனாதிபதி அவர்களின் தலைமையில் இடம்பெற்றதுடன், மகாவலி மற்றும் சுற்றாடல் அமைச்சின் பங்களிப்பில் மாவட்ட மக்களுக்கு மழைநீரை சேகரிக்கும் 5,000 தண்ணீர் தொட்டிகள் வழங்கும் வேலைத்திட்டமும் ஆரம்பிக்கப்பட்டது.
மேலும் ஆராய்ச்சி மற்றும் புதிய நிர்மாணத் துறையில் ஈடுபட்டு குள முறைமைகளை சுத்திரகரிப்பதற்காக குளங்களில் காணப்படும் ஜப்பன் ஜபர என்ற தாவரத்தை நீக்கும் இயந்திரத்தை உருவாக்கி சர்வதேச விருதுபெற்ற புத்தாக்குனரான நாமல் உதார பியசிறியை ஜனாதிபதி அவர்கள் பாராட்டினார்.
ருவன்வெலி மகா சேய விகாராதிபதி சங்கைக்குரிய பல்லேகம ஹேமரத்ன நாயக்க தேரர் உள்ளிட்ட மகா சங்கத்தினரும் ஏனைய சமய தலைவர்கள், அமைச்சர்களான பீ.ஹரிசன், சந்திராணி பண்டார, இராஜாங்க அமைச்சர் அஜித் மான்னப்பெரும, பாராளுமன்ற உறுப்பினர் துமிந்த திசாநாயக்க, வடமத்திய மாகாண ஆளுநர் சரத் ஏக்கநாயக்க உள்ளிட்ட மாகாண மக்கள் பிரதிநிதிகள், அரசாங்க அதிகாரிகள், பாதுகாப்பு துறை பிரதானிகள், பாடசாலை மாணவர்கள் உள்ளிட்ட பெரும் எண்ணிக்கையானோர் இந்த நிகழ்வில் கலந்துகொண்டனர்.
சுற்றாடல் மாநாட்டில் கலந்துகொள்வதற்காக அநுராதபுரத்திற்கு விஜயம் செய்த ஜனாதிபதி அவர்கள் முதலில் வரலாற்று சிறப்புமிக்க ஜய ஸ்ரீ மகா போதிக்குச் சென்று ஆசிர்வாதங்களை பெற்றுக்கொண்டார்.
அதனைத்தொடர்ந்து ஜனாதிபதி அவர்கள் அடமஸ்தானாதிபதி சங்கைக்குரிய பல்லேகம சிறினிவாச நாயக்க தேரரை சந்தித்து அவரது சுக துக்கங்களை கேட்டறிந்தார்.

 “ஒருமித்து சிந்திப்போம், ஒருமித்து எழுவோம்” என்ற தொனிப்பொருளின் கீழ் 71ஆவது தேசிய தின கொண்டாட்டங்களுடன் இணைந்ததாக முன்னெடுக்கப்பட்ட “எகடசிடிமு” (ஒன்றுபடுவோம்) தேசிய நிகழ்ச்சித்திட்டத்தின் அங்குரார்ப்பண விழா மற்றும் கலாசார நிகழ்வு ஜனாதிபதி கௌரவ மைத்ரிபால சிறிசேன அவர்களின் தலைமையில் 12ம் திகதி பிற்பகல் கோட்டை உலக வர்த்தக மையத்திற்கு முன்னால் கோலாகலமாக இடம்பெற்றது.

தற்போது ஒரு நாடு என்ற வகையில் முன்நோக்கி செல்வதற்கு அனைத்து பேதங்களையும் மறந்து ஒன்றாக செயற்பட வேண்டும் என்ற நம்பிக்கையோடு நாட்டுக்காக ஒன்றுபடுவோம் நிகழ்ச்சித்திட்டம் ஆரம்பிக்கப்பட்டுள்ளதுடன், எதிர்காலத்தில் சகல அரசியல் சக்திகளையும் ஒன்று திரட்டி நாட்டின் முன்னேற்றத்திற்காக செயற்படுதல் இந்த நிகழ்ச்சித்திட்டத்தின் நோக்கமாகும்.
ஜனாதிபதி செயலகத்தின் விசேட கருத்திட்டப் பிரிவு, பாதுகாப்பு அமைச்சு மற்றும் இலங்கை இராணுவத்தினரின் ஒருங்கிணைப்பில் இந்த நிகழ்ச்சித்திட்டம் முன்னெடுக்கப்படுகின்றது.
மிகச் சிறப்பான முறையில் கலாசார நிகழ்வுகளுடன் இந்த அங்குரார்ப்பண விழா ஆரம்பமானதுடன், இலங்கை இராணுவத்தினர் மற்றும் அங்கவீனமுற்ற இராணுவத்தினரின் கலை நிகழ்வுகள் உள்ளிட்ட பல்வேறு நிகழ்வுகள் இதன்போது இடம்பெற்றன.
ஒன்றுபட்டு மேற்கொள்ளவுள்ள இந்த பயணத்தில் அனைத்து இலங்கையர்களும் ஒன்றாக ஒரே சிந்தனையோடு ஒன்றிணைவோம் என்ற “எகடசிடிமு” (ஒன்றுபடுவோம்) என்ற உறுதிப்பத்திரமும் இதன்போது நாட்டுக்கு கீர்த்தியை பெற்றுக்கொடுத்த பிரபல கார் ஓட்ட வீரர் டிலந்த மாலகமுவ உள்ளிட்ட குழுவினரால் ஜனாதிபதி அவர்களிடம் கையளிக்கப்பட்டது.
“எகடசிடிமு” (ஒன்றுபடுவோம்) நிகழ்ச்சித்திட்டம் முன்னெடுக்கப்படுவதற்கான தொழிநுட்ப உபகரணங்கள் இராணுவ தளபதி லெப்டினன் ஜெனரல் மகேஸ் சேனாநாயக்கவினால் ஜனாதிபதி அவர்களிடம் கையளிக்கப்பட்டது.
பாராளுமன்ற உறுப்பினர் டிலான் பெரேரா, ஜனாதிபதியின் செயலாளர் உதய ஆர்.செனவிரத்ன உள்ளிட்ட அதிதிகளும் இராணுவ தளபதி லெப்டினன் ஜெனரல் மகேஸ் சேனாநாயக்க, வான் படைத் தளபதி எயார் மார்ஷல் கபில ஜயம்பதி மற்றும் பாதுகாப்பு துறை பிரதானிகள் உள்ளோர் இந்த நிகழ்வில் பங்குபற்றினர்.

 கிராமிய மட்டத்தில் உள்ள பாரம்பரிய கலைஞர்களின் அறிவு, ஆற்றல்களை அவர்களது வாழ்க்கைப் பயணத்தின் முடிவோடு முடிவுற இடமளிக்காது அவற்றை எதிர்கால சந்ததியினருக்கு வழங்குவதற்கான வேலைத்திட்டமொன்று அவசியமாகுமென தெரிவித்ததோடு, இவ்விடயம் தொடர்பில் அமைச்சுக்களின் மட்டத்தில் கவனம் செலுத்த வேண்டியதன் முக்கியத்துவத்தையும் ஜனாதிபதி கௌரவ மைத்ரிபால சிறிசேன அவர்கள் சுட்டிக்காட்டினார்.

29ம் திகதி பிற்பகல் கொழும்பு தாமரைத் தடாக கலையரங்கில் இடம்பெற்ற கலாபூஷணம் அரச விருது விழாவில் கலந்துகொண்டு உரையாற்றும்போதே ஜனாதிபதி அவர்கள் இதனைத் தெரிவித்தார்.
நாட்டின் கலைத்துறையின் மேம்பாட்டுக்காக சிறப்பான சேவைகளை ஆற்றிய கலைஞர்கள் 200 பேருக்கு இதன்போது விருது வழங்கி கௌரவிக்கப்பட்டதுடன், விசேட விருதுகளை பெற்றோருக்கு ஜனாதிபதி அவர்கள் விருதுகளை வழங்கிவைத்தார்.
கலாசார அலுவல்கள் திணைக்களத்தினால் வருடாந்தம் ஏற்பாடு செய்யப்படும் இந்த விருது விழா இம்முறை 34வது தடவையாக ஏற்பாடு செய்யப்பட்டுள்ளது.
மனித நேயத்துடன் கூடிய சமூகமொன்றை உருவாக்குவதற்காக கலைஞர்கள் நிறைவேற்றும் செயற்பணிகளை இதன்போது பாராட்டிய ஜனாதிபதி அவர்கள், இவ்வாறான விருது விழாக்களை ஏற்பாடு செய்வதற்கான ஊடாக கலைஞர்கள் தேசத்திற்காக நிறைவேற்றும் விசேட செயற்பணிகளை அனைவரும் அறிந்துகொள்ள முடிகின்றதென தெரிவித்தார்.
உள்நாட்டு திரைப்படத்துறை, மேடை நாடகம், தொலைக்காட்சி நாடகக்கலை உள்ளிட்ட ஆவணக் கலைகளை பாதுகாத்து, மக்கள் மத்தியில் சிறந்த கருத்துக்களை ஏற்படுத்துவதற்காக அன்று தொட்டு இன்று வரை பணியாற்றிவரும் சகல கலைஞர்களுக்கும் ஜனாதிபதி அவர்கள் இதன்போது தனது வாழ்த்துக்களை தெரிவித்தார்.
ஹேமா பிரேமதாச அம்மையார், தபால் சேவைகள் மற்றும் முஸ்லிம் சமய அலுவல்கள் அமைச்சர் அப்துல் ஹலீம் மொஹமட், கலாசார அலுவல்கள் திணைக்களத்தின் பணிப்பாளர் நாயகம் அனுஷா கோகுல, பேராசிரியர் ஆரியரத்ன கலுஆரச்சி, சரத்சந்ர எதிரிசிங்க மற்றும் சிரேஷ்ட கலைஞர்கள் உள்ளிட்ட அதிதிகள் பலரும் இந்த விழாவில் கலந்துகொண்டனர்.

முன்வைக்கப்பட்டுள்ள இச் செயற்றிட்டத்தின் அபிவிருத்தி நோக்கமானது, “நாட்டின் தெரிவு செய்யப்பட்ட சில பிரதேசங்களில் தொற்றா நோய்களால் இலகுவில் பாதிக்கப்படத்தக்க சனத்தொகையினரில் அந்நோய்களைக் கண்டுபிடித்து முகாமைத்துவம் செய்தலை முன்னிலைப்படுத்தி, அடிப்படைச் சுகாதார சேவைகளின் தரத்தையும் பயன்பாட்டையும் அதிகரித்தல்” என்பதாகும்.

இந் நோக்கமானது, இலங்கையின் அடிப்படைச் சுகாதார சேவை முறைமையை மீளச் சீரமைத்தலூடாகவும், பலப்படுத்துவதனூடாகவும் அடையப்படும். விசேடமாக, இச் செயற்றிட்டம், கொள்கைகளையும் தரங்களையும் உருவாக்குவதிலும் அவற்றைப் பரப்புவதிலும் மற்றும் இந்த முறைமைக்குரிய துணை முறைமைகளுக்கும் ஆதரவளிக்கும்.
இச் செயற்றிட்டத்தின் அடிப்படைப் பயனாளர்கள், நாட்டின் தெரிவு செய்யப்பட்ட சில பிரதேசங்களைச் சேர்ந்த, அடிப்படைச் சுகாதார சேவை அரச நிறுவனங்களைப் பயன்படுத்துவோராக இருப்பர். இவ்வாறான பயனாளர்கள் சனத்தொகையின் வறுமைக்கோட்டின் கீழ் வாழ்பவர்களாக இருக்க முடியும். இச் செயற்றிட்டத்தினால் பயன்பெறும் சமூகங்களுள், கடும் பாதிப்பை ஏற்படுத்தும் தொற்றா நோய்களால் பாதிக்கப்பட்டுள்ளவர்கள் அல்லது பாதிக்கப்படத்தக்க அபாயத்திலுள்ளவர்கள் இலக்காகக் கொள்ளப்படுவர். தொற்றா நோய்களுக்கான சேவைகளைப் பலப்படுத்தும் உபாயங்களைத் திட்டமிட்டு நடைமுறைப்படுத்துவதற்கான கிடைக்கத்தக்க வளங்களை உருவாக்குவதிலும், மத்திய மற்றும் மாகாண மட்டங்களில் சுகாதார சேவை ஆளணியினரது திறன்களை மேம்படுத்துவதிலும் இச் செயற்றிட்டம் தலையீடு செய்யும்.
இச் செயற்றிட்டம் பின்வரும் அம்சங்களைக் கொண்டிருக்கும்:
• பொதுச் சுகாதார சேவை முறைமையை மீளச் சீரமைத்துப் பலப்படுத்தும் உபாயங்களை நடைமுறைப்படுத்துதல்
• செயற்றிட்டத்தை நடைமுறைப்படுத்துவதற்கான உதவிகளும் புத்தாக்கத்திற்கான நிதிகளும்
• எதிர்பாரா அவசர தேவைகளுக்கான பகுதி
செயற்றிட்டத்தை இயக்கும் குழுவொன்று தாபிக்கப்படுவதுடன், அது சுகாதார, போஷணை மற்றும் சுதேச வைத்திய அமைச்சு மற்றும் உள்ளக உள்நாட்டலுவல்கள் மற்றும் மாகாண சபைகள் அமைச்சு ஆகியவற்றின் செயலாளர்களது இணைத் தலைமையின் கீழ் செயற்படும். நிதி ஆணைக்குழுவின் செயலாளர், ஒன்பது மாகாணங்களினதும் பிரதம செயலாளர்கள், சுகாதார, போஷணை மற்றும் சுதேச வைத்திய அமைச்சுப் பிரதிநிதிகள் மற்றும் மாகாண சுகாதார அமைச்சுகளின் பிரதிநிதிகள் ஆகியோர் மேலதிக அங்கத்தவர்களாகச் செயற்படுவார்கள்.
மேற்படி செயற்றிட்டத்திற்கான நிதியளிக்கும் ஒப்பந்தமானது, இலங்கை அரசாங்கத்தின் சார்பில் நிதி மற்றும் வெகுசன ஊடக அமைச்சின் செயலாளர் கலாநிதி ஆர்.எச்.எஸ். சமரதுங்க அவர்களாலும், உலக வங்கியின் சார்பில் இலங்கைக்கும் மாலதீவுக்குமான அதன் பணிப்பாளர் திருவாட்டி. இட் இஸட் ஸ்வராயி – றித்திஹூ (Ms. Idah Z Pswarayi – Riddihough) அவர்களாலும், 2019 ஜனவரி 23 இல், நிதி மற்றும் வெகுசன ஊடக அமைச்சில் கைச்சாத்திடப்பட்டது.

 பிலிப்பைன்ஸ் நாட்டுக்கு நான்கு நாள் அரசமுறை பயணம் மேற்கொண்டிருந்த ஜனாதிபதி கௌரவ மைத்ரிபால சிறிசேன அவர்கள் இலங்கைக்கு பல சாதகமான நன்மைகளை பெற்றுக்கொண்டு நேற்றிரவு (19) நாடு திரும்பினார்.

ஜனாதிபதி அவர்களின் பிலிப்பைன்ஸ் நாட்டுக்கான அரசமுறை விஜயம் கடந்த 15ஆம் திகதி ஆரம்பமானது. பிலிப்பைன்ஸுக்கும் இலங்கைக்கும் இடையிலான 58 வருட இராஜதந்திர நட்புறவு வரலாற்றில் இலங்கை ஜனாதிபதி ஒருவருக்கு அரசமுறை சுற்றுப்பயணத்திற்காக அழைப்பு விடுக்கப்பட்ட முதலாவது சந்தர்ப்பம் இதுவேயாகும்.
ஜனாதிபதி கௌரவ மைத்ரிபால சிறிசேன அவர்களின் இந்த அரசமுறை சுற்றுப்பயணத்தின் விசேட அம்சமாக பிலிப்பைன்ஸ் லொஸ் பானோஸில் அமைந்துள்ள சர்வதேச நெல் ஆராய்ச்சி மையத்திற்கும் இலங்கைக்கும் இடையில் கைச்சாத்திடப்பட்ட ஐந்தாண்டு செயற்திட்டம் அமைந்துள்ளது. இலங்கை நெல் உற்பத்தியில் தன்னிறைவு அடைவதில் வானிலை மற்றும் காலநிலை மாற்றங்களால் ஏற்படும் பாதிப்புக்களை குறைத்துக்கொள்வதே இதன் நோக்கமாகும்.
ஜனாதிபதி கௌரவ மைத்ரிபால சிறிசேன அவர்கள் நாட்டுக்கான தனது தலையாய கடமையாக கருதும் போதைப்பொருள் ஒழிப்பினை வெற்றிகொள்வதற்கான உதவிகளை வழங்குவதற்கு பிலிப்பைன்ஸ் அரசாங்கம் இணக்கம் தெரிவித்துள்ளமை இந்த சுற்றுப்பயணத்தில் பெற்றுக்கொண்ட மற்றுமொரு விசேட நன்மையாகும். அதற்கான தொழிநுட்ப ஆலோசனை சேவைகளை வழங்குவது தொடர்பில் கண்டறிவதற்காக பிலிப்பைன்ஸில் இருந்து இலங்கைக்கு விசேட நிபுணர் குழுவொன்று வெகுவிரைவில் வருகை தரவுள்ளதாக பிலிப்பைன்ஸ் போதைபொருள் ஒழிப்பு பணியகத்தை பார்வையிடச் சென்ற ஜனாதிபதி அவர்களுக்கும் பிலிப்பைன்ஸ் நாட்டின் பொலிஸ்மா அதிபர் உள்ளிட்ட சிரேஷ்ட அதிகாரிகளுக்கும் இடையில் இடம்பெற்ற கலந்துரையாடலின்போது தெரிவிக்கப்பட்டது.
கடந்த 15ஆம் திகதி மனிலா நகரில் அமைந்துள்ள நினோய் அகினோ சர்வதேச விமான நிலையத்தை சென்றடைந்த ஜனாதிபதி அவர்கள் உள்ளிட்ட இலங்கை தூதுக்குழுவினரை அந்நாட்டு வர்த்தக கைத்தொழில் அமைச்சர் உள்ளிட்ட விசேட பிரதிநிதிகள் மிகுந்த மரியாதையுடன் வரவேற்றனர்.
தனது சுற்றுப்பயணத்தின் முதலாவது நிகழ்வாக பிலிப்பைன்ஸ் புரட்சியில் ஈடுபட்ட தேசிய வீரர்களை நினைவுகூரும் முகமாக மனிலா நகரின் வரலாற்று சிறிப்புமிக்க ரிஷால் பூங்காவில் நிர்மாணிக்கப்பட்டுள்ள நினைவுத் தூபிக்கு ஜனாதிபதி அவர்கள் மலரஞ்சலி செலுத்தினார்.
அதன்பின்னர் பிலிப்பைன்ஸ் மலக்கன்யங்க் (Malacanang) ஜனாதிபதி மாளிகைக்கு சென்ற ஜனாதிபதி அவர்களுக்கு பிலிப்பைன்ஸ் நாட்டின் ஜனாதிபதி ரொட்ரிகோ டியுடேர்ட் (Rodrigo Duterte) அவர்களினால் உற்சாக வரவேற்பு அளிக்கப்பட்டது. இரு நாடுகளுக்கிடையிலான பொருளாதார, வர்த்தக மற்றும் கலாசார உறவுகளை புதிய வழிகளில் முன்னெடுத்து செல்வது தொடர்பில் இரு நாட்டு அரச தலைவர்களும் கலந்துரையாடல்களில் ஈடுபட்டதுடன், இரு நாடுகளுக்கிடையிலான தொடர்புகளை மேலும் வலுப்படுத்தும் வகையில் ஐந்து புதிய புரிந்துணர்வு உடன்படிக்கைகளும் அரச தலைவர்கள் முன்னிலையில் கைச்சாத்திடப்பட்டன.
பிலிப்பைன்ஸ் ஜனாதிபதி ரொட்ரிகோ டியுடேர்ட் அவர்களால் ஜனாதிபதி கௌரவ மைத்ரிபால சிறிசேன அவர்களுக்கு கடந்த 16ஆம் திகதி மலக்கன்யங்க் (Malacanang) ஜனாதிபதி மாளிகையில் விசேட இராப்போசன விருந்து வழங்கப்பட்டது. இதன்போது கையினால் வரையப்பட்ட ஜனாதிபதி கௌரவ மைத்ரிபால சிறிசேன அவர்களின் உருவப்படம் பிலிப்பைன்ஸ் ஜனாதிபதியினால் வழங்கப்பட்டமை இரு நாட்டு அரச தலைவர்களின் நட்பின் அடையாளமாக அமைந்திருந்தது.
பிலிப்பைன்ஸ் – இலங்கை அரச தலைவர்களுக்கிடையிலான கலந்துரையாடலின் பின்னர் பிலிப்பைன்ஸ் ஜனாதிபதி ரொட்ரிகோ டியுடேர்ட் ஊடகங்களுக்கு கருத்துத் தெரிவிக்கையில் பிலிப்பைன்ஸுக்கும் இலங்கைக்கும் இடையிலான உறவுகளை வலுப்படுத்துவதற்கு தான் அர்ப்பணிப்புடன் செயற்படுவதாக தெரிவித்தார்.
இலங்கைக்கு ஆதரவு தெரிவிக்கும் வகையில் பிலிப்பைன்ஸ் ஜனாதிபதியின் வழிகாட்டலின் கீழ் பிலிப்பைன்ஸ் அரசாங்கம் முன்னெடுக்கும் அனைத்து வேலைத்திட்டங்களுக்கும் பிலிப்பைன்ஸ் பாராளுமன்றத்தின் ஒருமித்த ஆதரவை வழங்குவதாக பிலிப்பைன்ஸ் பாராளுமன்ற சபாநாயகர் ஜனாதிபதி கௌரவ மைத்ரிபால சிறிசேன அவர்களிடம் தெரிவித்தார்.
தனது சுற்றுப்பயணத்தின் போது மனிலா நகரில் அமைந்துள்ள ஆசிய அபிவிருத்தி வங்கியின் தலைமையகத்தை பார்வையிடச் சென்ற ஜனாதிபதி அவர்கள், லொஸ் பானோஸில் அமைந்துள்ள சர்வதேச நெல் ஆராய்ச்சி மையத்தையும் பார்வையிட்டார். இந்த சுற்றுப் பயணத்தின் விசேட அம்சமாக சர்வதேச நெல் ஆராய்ச்சி மைய வளாகத்தின் ஒரு பகுதிக்கு ஜனாதிபதி கௌரவ மைத்ரிபால சிறிசேன அவர்களின் பெயரை சூட்டுவதற்கான நடவடிக்கைகள் மேற்கொள்ளப்பட்டன. விவசாயத்திற்காக அர்ப்பணிப்புடன் செயற்படும் அரச தலைவர் என்பதால் அவருக்கு மதிப்பளிக்கும் முகமாகவே இந்த நடவடிக்கை முன்னெடுக்கப்பட்டிருந்தது.
1961ஆம் ஆண்டு ஆரம்பிக்கப்பட்ட இலங்கை – பிலிப்பைன்ஸ் இராஜதந்திர உறவுகளுக்கு 58 ஆண்டுகள் நிறைவடையும் இந்த சந்தர்ப்பத்தில் இடம்பெற்ற ஜனாதிபதி அவர்களின் பிலிப்பைன்ஸ் சுற்றுப்பயணம் நாட்டுக்கு பல நன்மைகள் பெறப்பட்ட நிலையில் நிறைவுபெற்றது.

 போதைப்பொருள் கடத்தலை தடுப்பதற்கு இலங்கைக்கு தேவையான தொழிநுட்ப உதவியை வழங்குவதற்கு ஆசிய அபிவிருத்தி வங்கி தயார்

காலநிலை மாற்றத்தினால் ஏற்படும் பாதிப்புகளை குறைப்பதற்கான திட்டங்களுக்கும் இலங்கைக்கு உதவி

இலங்கையில் மூன்று முக்கிய திட்டங்களுக்காக 455 மில்லியன் அமெரிக்க டொலர் நிதியுதவியை வழங்குவதற்கு ஆசிய அபிவிருத்தி வங்கியின் தலைவர் ஜனாதிபதி கௌரவ மைத்ரிபால சிறிசேன அவர்களிடம் இணக்கம் தெரிவித்துள்ளார்.
அரச முறை பயணமொன்றை மேற்கொண்டு பிலிப்பைன்ஸுக்கு விஜயம் செய்திருக்கும் ஜனாதிபதி அவர்கள் 17ம் திகதி முற்பகல் பிலிப்பைன்ஸ் மணிலா நகரிலுள்ள ஆசிய அபிவிருத்தி வங்கியின் தலைமையகத்திற்கு விஜயம் செய்து அதன் தலைவர் தகஹிகோ நாகஓ அவர்களை சந்தித்தார். இந்த சந்திப்பின்போதே ஆசிய அபிவிருத்தி வங்கியின் தலைவர் இதற்கான இணக்கப்பாட்டை தெரிவித்தார்.
இந்த தொகையில் 300 மில்லியன் அமெரிக்க டொலர்கள் கொழும்பு துறைமுகத்திற்குள் பிரவேசிப்பதற்கான தூண்களைக்கொண்ட நெடுஞ்சாலை நிர்மாண திட்டத்திற்காக வழங்கப்படவுள்ளது ஆசிய அபிவிருத்தி வங்கியின் தெற்காசிய உப பிராந்தியத்திற்கான பொருளாதார உதவி வழங்கும் கொள்கை சட்டகத்தின் படி இந்த இணக்கப்பாடு தெரிவிக்கப்பட்டுள்ளது.
மேலும் விஞ்ஞான, தொழிநுட்ப, மனித வள அபிவிருத்தி திட்டத்திற்காகவும் இலங்கைக்கு 145 மில்லியன் அமெரிக்க டொலர்களை வழங்க இணக்கம் தெரிவிக்கப்பட்டுள்ளது. நகர அபிவிருத்தி திட்டங்களுக்கான சாத்திய வள ஆய்வுகளுக்கான தொழிநுட்ப உதவி வழங்கும் முன்மொழிவு முறைமைக்காக 10 மில்லியன் அமெரிக்க டொலர் நிதியுதவியை வழங்கவும் இணக்கம் தெரிவிக்கப்பட்டுள்ளது. இந்த இணக்கப்பாடுகளுக்கான உடன்படிக்கைகளில் ஜனாதிபதி கௌரவ மைத்ரிபால சிறிசேன அவர்களும் ஆசிய அபிவிருத்தி வங்கியின் தலைவர் தகஹிகோ நாகஓ அவர்களும் கைச்சாத்திட்டனர்.
இங்கு கருத்துத் தெரிவித்த ஜனாதிபதி அவர்கள், இன்று இலங்கை முக்கியமான இரண்டு சவால்களுக்கு முகங்கொடுத்திருப்பதாக தெரிவித்தார். வறுமையை ஒழித்தல், போதைப்பொருள் கடத்தலை கட்டுப்படுத்தல் என்பனவே அந்த சவால்களாகும் எனக் குறிப்பிட்ட ஜனாதிபதி அவர்கள், அதற்காக முன்னெடுக்கப்பட்டுள்ள செயற்திட்டங்களுக்கு ஆசிய அபிவிருத்தி வங்கியின் உதவியை எதிர்பார்ப்பதாக தெரிவித்தார்.
நாட்டுக்குள் சட்ட விரோத போதைப்பொருட்கள் கொண்டுவரப்படுவதை தடுப்பதற்கு சுங்கத் துறைக்கு தேவையான தொழிநுட்ப மற்றும் நிபுணத்துவ அறிவை வழங்குவதற்கான வழிவகைகள் குறித்து கவனம் செலுத்தவுள்ளதாக ஆசிய அபிவிருத்தி வங்கியின் தலைவர் தெரிவித்தார்.
இலங்கை இன்று வரட்சி மற்றும் வெள்ளம் ஆகிய இரண்டு வகையான பாதிப்புகளுக்கு உட்பட்டு வருவதாக குறிப்பிட்ட ஜனாதிபதி அவர்கள், அவற்றுக்கு முகங்கொடுப்பதற்காக முறையானதொரு நிகழ்ச்சித் திட்டம் அவசியம் என்றும் தெரிவித்தார். அந்த வகையில் காலநிலை மாற்றத்தினால் இலங்கைக்கு ஏற்படும் பாதிப்புகளை குறைக்கும் நிகழ்ச்சித் திட்டத்திற்கான உதவியை வழங்குவதற்கும் ஆசிய அபிவிருத்தி வங்கியின் தலைவர் இணக்கம் தெரிவித்தார்.
பேண்தகு அபிவிருத்தி இலக்குகளை வெற்றி கொள்வதற்காக இலங்கை அரசாங்கத்தினால் முன்னெடுக்கப்படும் வேலைத்திட்டங்கள் தொடர்பாக ஜனாதிபதி அவர்கள் இதன்போது தெளிவுபடுத்தியதுடன், நாட்டில் சிறந்த பொருளாதாரத்தைக் கட்டியெழுப்புவதற்கு அது அத்தியாவசியமாகும் எனவும் குறிப்பிட்டார். இதன்போது கருத்து தெரிவித்த ஆசிய அபிவிருத்தி வங்கியின் தலைவர், எதிர்பார்க்கப்பட்டுள்ள இலக்கினை முழுமையாக அடைய முடியாவிடினும் தற்போது இலங்கை சிறந்த பொருளாதார வளர்ச்சி வேகத்தைப் பெற்றுக்கொள்வதற்கு அவ்வேலைத்திட்டத்தின் மூலம் இயலுமாகியுள்ளது தெரிவித்தார்.
சக்தி வள முகாமைத்துவம், விவசாயம், உட்கட்டமைப்பு வசதிகள், காலநிலை மற்றும் சுற்றாடல் பாதுகாப்பு, வனப் பாதுகாப்பு உள்ளிட்ட பல்வேறு துறைகளில் தற்போது ஆசிய அபிவிருத்தி வங்கி இலங்கைக்கு உதவிகளை வழங்கி வருவதுடன், அவ்வுதவிகளை தொடர்ச்சியாக இலங்கைக்கு பெற்றுக்கொடுக்க நடவடிக்கை எடுப்பதாக ஆசிய அபிவிருத்தி வங்கியின் தலைவர் தெரிவித்தார். அத்துடன் நீர்ப்பாசனம், பெருந்தெருக்கள் மற்றும் டிஜிட்டல் உட்கட்டமைப்பு வசதிகள் போன்ற துறைகளில் புதிய செயற்திட்டங்களுக்கு உதவியளிக்கவும் எதிர்பார்ப்பதாக தெரிவித்தார்.
சிறிய மற்றும் நடுத்தர அளவிலான விவசாயக் கைத்தொழிற்துறையை மேம்படுத்துவதனூடாக நிதி முகாமைத்துவத்தை ஏற்படுத்துவதற்கான வாய்ப்பினை இதன்போது சுட்டிக்காட்டிய ஆசிய அபிவிருத்தி வங்கியின் தலைவர் அதன்பொருட்டு விசேடமாக உதவியளிக்க எதிர்பார்ப்பதாகவும் தெரிவித்தார்.
அத்துடன், சுகாதாரத் துறையில் தற்போது இலங்கை அடைந்துள்ள முன்னேற்றத்தினை பாராட்டியதுடன், இலங்கையில் சுற்றுலாத் துறையினை மேம்படுத்துவதற்கான செயற்திட்டங்கள் தொடர்பாக ஆசிய அபிவிருத்தி வங்கி கவனம் செலுத்துவதாக தலைவர் தெரிவித்தார்.
சுற்றாடல் பாதுகாப்பிற்காக இலங்கையினால் முன்னெடுக்கப்படும் வேலைத்திட்டங்கள் தொடர்பாக ஆசிய அபிவிருத்தி வங்கியின் தலைவரை தெளிவுபடுத்திய ஜனாதிபதி அவர்கள், இலங்கையின் வன அடர்த்தியை 28 – 32 சதவீதம் வரை அதிகரிக்க எதிர்பார்ப்பதாகவும், அது தொடர்பாக சுற்றாடல் அமைச்சர் என்ற வகையில் பாரிஸ் மாநாட்டின் போதும் குறிப்பிட்டதுடன், அவ்விடயம் தொடர்பாக ஆசிய அபிவிருத்தி வங்கியின் தலைவரின் கவனம் செலுத்தப்பட்டது.
இலங்கையில் பயிர்களுக்கு விலங்குகளினால் ஏற்படும் பாதிப்புகளை தவிர்ப்பதற்கு உடனடி நிகழ்ச்சித் திட்டமொன்றின் தேவை பற்றியும் ஜனாதிபதி அவர்கள் ஆசிய அபிவிருத்தி வங்கியின் தலைவருடன் கலந்துரையாடினார்.
அரை நூற்றாண்டுகளுக்கும் மேலாக 1966ஆம் ஆண்டு முதல் இலங்கையுடன் மிகவும் பலமான உறவுகளை கட்டியெழுப்பி ஆசிய அபிவிருத்தி வங்கி இலங்கைக்கு வழங்கிவரும் உதவி குறித்து நன்றி தெரிவித்த ஜனாதிபதி அவர்கள், பிராந்தியத்தின் அபிவிருத்தியடைந்து வரும் நாடுகளுக்காகவும் ஆசிய அபவிருத்தி வங்கி வழங்கிவரும் ஒத்துழைப்புகளையும் பாராட்டினார்.
இங்கு கருத்து தெரிவித்த ஆசிய அபிவிருத்தி வங்கியின் தலைவர் தகஹிகோ நாகஓ அவர்கள் தான் இலங்கைக்கு பல விஜயங்களை மேற்கொண்டிருப்பதை நினைவுகூர்ந்ததுடன், பயங்கரவாத சவாலை வெற்றி கொண்டதன் பின்னர் இதுவரையில் இலங்கை அடைந்துள்ள மாற்றங்கள் குறித்து மகிழ்ச்சி தெரிவித்தார். இன்று ஆசியாவிலேயே சுற்றுலாத் துறைக்கு பொருத்தமான ஓரிரு நாடுகளில் இலங்கையும் ஒன்றாகும் என்றும் ஆசிய அபிவிருத்தி வங்கியின் தலைவர் தகஹிகோ நாகஓ தெரிவித்தார்.

 நிதி மற்றும் வெகுசன ஊடக அமைச்சர் கௌரவ மங்கள சமரவீர, சீனத் தூதர் மேதகு செங் ஸீயுவான் அவர்களையும் அவருடனான தூதுக்குழுவையும் திறைசேரியில் 11ம் திகதி சந்தித்தார். அமைச்சர் அவர்கள், சர்வதேச நாணய நிதியத்துடன் இலங்கை அரசாங்கம் மீளவும் தொடர்புபடுவது குறித்து சீனத் தூதருக்கு விளக்கமளித்ததுடன், சீன அரசாங்கம் இலங்கைக்குத் தொடர்ந்தும் வழங்கும் ஆதரவிற்கு நன்றி தெரிவித்தார்.

சீனத் தூதர் மேதகு செங் ஸீயுவான் அவர்கள் இலங்கையின் பொருளாதார அபிவிருத்திக்கு தனது நாட்டின் ஆதரவை மீள வலியுறுத்திக் கூறியதுடன், சர்வதேச நாணய நிதியத்துடன் இலங்கை அரசாங்கம் மீளவும் தொடர்புபடுவது குறித்த அவர்களது ஆதரவிற்கு உறுதியளித்தார்.
இந்தக் கூட்டத்தில் திறைசேரியின் செயலாளர் கலாநிதி. ஆர்.எச்.எஸ் சமரதுங்க, நிதி மற்றும் வெகுசன ஊடக அமைச்சரின் சிரேஷ்ட ஆலோசகர் திரு. மனோ தித்தவெல மற்றும் நிதி அமைச்சின் அதிகாரிகளும் கலந்துகொண்டனர்.

 பாடசாலை பிள்ளைகளை இலக்காகக்கொண்டு பாடசாலை சூழலில் இடம்பெறும் பல்வேறு வகையான போதைப்பொருள் விற்பனை நடவடிக்கைகளை முற்றாக இல்லாதொழிப்பதற்கு முறையான நிகழ்ச்சித்திட்டமொன்றை அனைத்து தரப்பினர்களினதும் பங்களிப்புடன் நடைமுறைப்படுத்துமாறு ஜனாதிபதி கௌரவ மைத்ரிபால சிறிசேன அவர்கள் சம்பந்தப்பட்ட தரப்பினருக்கு பணிப்புரை விடுத்தார்.

அதற்குத் தேவையான சட்ட திருத்தங்களை விரைவாக மேற்கொண்டு நடைமுறைப்படுத்துமாறும் ஜனாதிபதி அவர்கள் அதிகாரிகளுக்கு தெரிவித்தார்.
போதைப்பொருட்களை கட்டுப்படுத்தல் தொடர்பாக 10ம் திகதி முற்பகல் ஜனாதிபதி அலுவலகத்தில் இடம்பெற்ற கலந்துரையாடல் ஒன்றின்போதே ஜனாதிபதி அவர்கள் இந்த பணிப்புரையை விடுத்தார்.
பாடசாலை சூழலில் இடம்பெறும் பல்வேறு வகையான போதைப்பொருள் வியாபாரம் மற்றும் மாணவர்கள் அவற்றுக்கு அடிமையாவது பற்றிய பல்வேறு தகவல்கள் தமக்கு கிடைத்திருப்பதாக குறிப்பிட்ட ஜனாதிபதி அவர்கள், இந்த நாசகார நடவடிக்கைகள் தலைதூக்குவதற்கு இடமளிக்க வேண்டாமென பொலிசாருக்கு பணிப்புரை விடுத்தார்.
சட்டவிரோத போதைப்பொருட்களை கட்டுப்படுத்துவதற்காக அரசாங்கம் பல்வேறு நடவடிக்கைகளை எடுத்துள்ளதுடன், சுற்றி வளைப்பு நடவடிக்கைகளை மேற்கொள்வதற்கான நிகழ்ச்சித்திட்டங்களை பலப்படுத்தி உரிய சட்டதிட்டங்களை திருத்தும் நடவடிக்கைகளும் தற்போது மேற்கொள்ளப்பட்டு வருகின்றன.
இந்த அனைத்து சட்ட திருத்தங்களையும் விரைவாக மேற்கொண்டு உரிய அதிகாரங்களை வழங்க நடவடிக்கை எடுக்குமாறும் ஜனாதிபதி அவர்கள் அதிகாரிகளுக்கு பணிப்புரை விடுத்தார்.
மேலும் போதைப்பொருள் தொடர்பான விசாரணை நடவடிக்கைகளில் ஏனைய நிறுவனங்களில் உதவியை பெற்றுக்கொள்ளுதல் மற்றும் சிறைச்சாலைகளின் பாதுகாப்பிற்காக எடுக்கப்பட்டுள்ள நடவடிக்கைகள் உள்ளிட்ட விடயங்கள் குறித்தும் இதன்போது கலந்துரையாடப்பட்டது.
பாதுகாப்பு அமைச்சின் செயலாளர் ஹேமசிறி பெர்ணான்டோ உள்ளிட்ட அமைச்சின் செயலாளர்களும், குறித்த நிறுவனங்களின் தலைவர்களும், அரச அதிகாரிகளும், பொலிஸ்மா அதிபர் உள்ளிட்ட பாதுகாப்பு துறை அதிகாரிகளும் இந்த கலந்துரையாடலில் பங்குபற்றினர்.

 பௌத்த சாசனத்தின் அபிவிருத்திக்காக ஜனாதிபதியால் ஆற்றப்பட்ட இப்பணி மகா நாயக்க தேரர்கள் பாராட்டு

புனித திரிபீடகத்தை தேசிய மரபுரிமையாக பிரகடனப்படுத்தியதைப் போன்றே அதை உலக மரபுரிமையாக பிரகடனப்படுத்துவதற்கான நடவடிக்கைகளையும் தான் மேற்கொள்வதாக ஜனாதிபதி அவர்கள் தெரிவித்தார்.
புனித தேரவாத பௌத்த தர்மத்தின் மகத்துவத்தை பல்லாயிரக்கணக்கான ஆண்டுகளுக்கு பேணி பாதுகாக்கும்வண்ணம் புனித திரிபீடகத்தை தேசிய மரபுரிமையாக உத்தியோகபூர்வமாக பிரகடனப்படுத்தும் தேசிய நிகழ்வு சங்கைக்குரிய மகாசங்கத்தினரின் ஆசீர்வாதத்துடன் ஜனாதிபதி கௌரவ மைத்ரிபால சிறிசேன அவர்களின் தலைமையில் 05ம் திகதி முற்பகல் மாத்தளையில் உள்ள வரலாற்று முக்கியத்துவம்வாய்ந்த அலுவிகாரையில் இடம்பெற்றபோதே ஜனாதிபதி அவர்கள் மேற்கண்டவாறு தெரிவித்தார்.
ஆயிரக்கணக்கான வருடங்களாக பாதுகாக்கப்பட்டு வந்த பௌத்த சமயத்தை உலக மக்களும், எதிர்கால தலைமுறையினரும் மிகச் சரியாக பாதுகாத்து பேணும் நோக்குடன் மகா சங்கத்தினரின் ஆலோசனைகள் மற்றும் வழிகாட்டலின் கீழ் ஜனாதிபதி கௌரவ மைத்ரிபால சிறிசேன அவர்களால் இந்த பணி மேற்கொள்ளப்பட்டுள்ளது.
திரிபீடகத்தை தேசிய மரபுரிமையாக பிரகடனப்படுத்தும் வரலாற்று சிறப்புமிக்க நிகழ்விற்காக ஜனாதிபதி அவர்களால் ஆற்றப்பட்ட பணிக்கு மகாசங்கத்தினர் பாராட்டு தெரிவித்தனர்.
விசேட உரையாற்றிய சியாமோபாலி மகா நிக்காயவின் மல்வத்து மகா விகாரையை சேர்ந்த அநுநாயக்கர் வண. நியங்கொட விஜித்த சிறி தேரர் பௌத்த சாசனத்திற்கும் சம்பிரதாயங்களின் முன்னேற்றத்திற்கும் ஜனாதிபதி அவர்களினால் ஆற்றப்பட்ட இந்தப்பணி பாராட்டுக்குரியதெனத் தெரிவித்தார்.
பௌத்த போதனைகள் தவறாக போதிக்கப்படும் இந்த காலகட்டத்தில் அரச தலைவர் என்ற வகையில் இவ் விடயத்தில் ஜனாதிபதி அவர்கள் கவனம் செலுத்தி மேற்கொண்ட இந்த பணி அவரது ஆட்சி காலத்தில் இடம்பெற்ற மிக முக்கியமான நிகழ்வு என இலங்கை அமரபுர மகா நிக்காயவின் மகா நாயக்கர் பண்டிதர் வண. கொட்டுகொட தம்மவாச தேரர் தெரிவித்தார்.
இந்நிகழ்வைப் போன்றே 1818ஆம் ஆண்டு இடம்பெற்ற கலவரத்தின்போது தேசத் துரோகிகள் என அறிவிக்கப்பட்ட எமது தேசிய வீரர்களின் பெயர் பட்டியலை தேசத்தின் வீரர்கள் என்று அறிவிப்பதற்கு ஜனாதிபதி அவர்களினால் மேற்கொள்ளப்பட்ட நடவடிக்கையும் மகா சங்கத்தினரின் பாராட்டை பெற்றுள்ளதாக தேரர் அவர்கள் குறிப்பிட்டார்
நிகழ்வில் கருத்து தெரிவித்த ஜனாதிபதி அவர்கள், இந்த வரலாற்று சிறப்புமிக்க நிகழ்வின் ஊடாக திரிபீடகத்தை தவறான முறையில் விவரிப்பவர்களிடமிருந்து திரிபீடகத்தை பாதுகாப்பதுடன், திரிபீடகத்திற்கு சட்ட ரீதியான பாதுகாப்பு வழங்கக்கூடியதாகவும் இருக்குமென்று தெரிவித்தார். இன்று முதல் அரசாங்கத்தின் அனுமதியின்றி திரிபீடகத்தை திருத்துவதற்கோ, மொழிபெயர்ப்பதற்கோ அனுமதி வழங்கப்படாதென்றும் எதிர்வரும் காலங்களில் திரிபீடகத்தை மொழி பெயர்ப்பதற்கோ திருத்தங்கள் செய்வதற்கோ குறிப்பிட்ட வல்லுனர்கள் குழுவிற்கே அனுமதி வழங்கப்படுமென்றும், திரிபீடகத்திற்கு ஏற்படும் பாதிப்புகளை தவிர்க்கும்வண்ணமே அரசாங்கம் இந்த நடவடிக்கையை மேற்கொண்டுள்ளது எனத் தெரிவித்தார்.
திரிபீடகத்தின் ஊடாக புத்த பெருமானின் போதனைகளை புரிந்துகொள்வதற்கும் அவற்றை ஆராய்வதற்கும் இந்த நிகழ்வு பாரிய பங்காற்றியுள்ளதாக தெரிவித்த ஜனாதிபதி அவர்கள், மகாசங்கத்தினரின் வழிகாட்டலின் கீழ் தனது ஆட்சி காலத்தில் இந்த நடவடிக்கையை மேற்கொள்ள கிடைத்தமையை எண்ணி மகிழ்ச்சி அடைவதாகவும் தெரிவித்தார்.
இன்று முற்பகல் மாத்தளை வரலாற்று சிறப்புமிக்க அலுவிகாரைக்கு விஜயம் செய்த ஜனாதிபதி அவர்கள், புனித திரிபீடகத்தை தேசிய மரபுரிமையாக பிரகடனப்படுத்தும் நிகழ்வை அடையாளப்படுத்தும் வகையில் நினைவுப்பலகையை திரைநீக்கம் செய்துவைத்தார்.
அதனைத் தொடர்ந்து திரிபீடகத்தை தேசிய மரபுரிமையாக அறிவிக்கும் உத்தியோகபூர்வ பிரகடனத்தை ஜனாதிபதி அவர்கள் மகா நாயக்க தேரர்களிடம் கையளித்தார்.
ஆலோக்க விகாராதிபதி வண. கலாநிதி இனாமலுவே நந்தரத்தன தேரரால் விசேட நினைவுச் சின்னமாக “தம்ம சக்க தம்ம” உச்சாடனம் அடங்கிய ஓலை சுவடி ஜனாதிபதி அவர்களிடம் கையளிக்கப்பட்டது.
ஆக்கபூர்வமான அறிக்கை தொகுப்பு ஒன்றும் ஜனாதிபதி அவர்களிடம் இதன்போது கையளிக்கப்பட்டது. இந்த வரலாற்று சிறப்புமிக்க நிகழ்வை நினைவுகூரும் வகையில் நினைவு முத்திரை ஒன்று வெளியிடப்பட்டதுடன், அம்முத்திரை ஜனாதிபதி அவர்களால் மகா நாயக்க தேரர்களிடம் கையளிக்கப்பட்டது.
சியாமோபாலி மகா நிக்காயவின் அஸ்கிரி மகா விகாரையை சேர்ந்த மகா நாயக்கர் வண. வரக்காகொட ஞானரத்தன தேரர், சியாமோபாலி மகா நிக்காயவின் மல்வத்து மகா விகாரையை சேர்ந்த அனுநாயக்கர் வண. நியங்கொட விஜத்தசிறி தேரர், இலங்கை அமரபுர மகா நிக்காயவின் பண்டிதர் வண. கொட்டுகொட தம்மவாச மகா நாயக்க தேரர் உள்ளிட்ட நாடளாவிய ரீதியில் வருகைதந்த ஆயிரத்து ஐநூறுக்கும் மேற்பட்ட மகாசங்கத்தினர், புத்தசாசன அமைச்சர் காமினி ஜயவிக்ரம பெரேரா உள்ளிட்ட அமைச்சர்கள், ஆளுநர்கள், அரச அதிகாரிகள் மற்றும் பெருந்திரளான பக்தர்கள் இந்நிகழ்வில் கலந்துகொண்டனர்.
திரிபீடகத்தை தேசிய மரபுரிமையாக பிரகடனப்படுத்தும் தேசிய நிகழ்வில் ஜனாதிபதி கௌரவ மைத்ரிபால சிறிசேன அவர்கள் ஆற்றிய உரை. 2019.01.05
இன்று இந்த புண்ணிய பூமியில் இடம்பெறும் இந்த நிகழ்வு உலகவாழ் பௌத்த மக்கள் மட்டுமன்றி அனைத்து மக்களும் மதிப்பளிக்கும் தேரவாத போதனைகள் அடங்கிய திரிபீடகத்தை தேசிய மரபுரிமையாக பிரகடனப்படுத்தும் சந்தர்ப்பமாகும். இந்த உன்னத பணியை அரசாங்கம் என்ற வகையில் நிறைவேற்றுவதற்கு கடந்த காலங்களில் மகாசங்கத்தினருடன் பல சந்தர்ப்பங்களில் கலந்துரையாடினோம். அதற்கமைய 2018 செப்டெம்பர் மாதம் 13ஆம் திகதி இடம்பெற்ற அமைச்சரவை கூட்டத்தில் அமைச்சரவை பத்திரம் ஒன்றை முன்வைத்தோம். அதில் நானும் புத்த சாசன அமைச்சரும் அப்போதைய கலாசார அமைச்சருமான கலாநிதி விஜயதாச ராஜபக்ஷ அவர்களும் கையெழுத்திட்டோம். கி.மு. 3ஆம் நூற்றாண்டில் மஹிந்த தேரரின் இலங்கை விஜயத்தால் எமக்கு கிடைக்கப்பெற்ற தேரவாத பௌத்த தர்மத்தை பல நூற்றாண்டுகளாக இலங்கையில் வாழ்ந்த பிக்குகளால் வாய்ப்பாட்டினால் பாதுகாத்து வந்ததோடு வந்து கி.மு. 01ஆம் நூற்றாண்டில் வலகம்பா மன்னனின் ஆட்சி காலத்தில் மாத்தளை அலுவிகாரையில் நூலாக தொகுக்கப்பட்டது.
இலங்கையில் மிக பழமைவாய்ந்த அந்த நூல் கி.பி 1956 ஆம் ஆண்டு இடம்பெற்ற 2500வது சம்புத்தத்து ஜயந்தியின்போது திருத்தங்கள் மேற்கொள்ளப்பட்டு திரிபீடகம் மீண்டும் புத்தகமாக அச்சிடப்பட்டது. வண. ஆனந்தமைத்ரி தேரரின் ஆலோசனைக்கமைய வண. லபுகம லங்கா நந்த தேரரின் தலைமையிலும் மற்றும் பல தேரர்களினாலும் எழுதப்பட்டு அரசாங்கத்தின் உத்தியோகபூர்வ பிரகடனமாக அச்சிடப்பட்டது. உலகளாவிய ரீதியில் திரிபீடகம் முக்கியத்துவம்வாய்ந்த நூலாக கருதப்படுகிறது. இது இலங்கையில் பௌத்த வழிகாட்டலின் அடிப்படை விடயங்கள் பாதுகாக்கப்பட வேண்டியது அவசியமாகும். அதற்கமைய திரிபீடகத்தை தேசிய மரபுரிமையாக அறிவிப்பதற்கு அரசாங்கத்தின் அனுமதியை பெறுவதற்கான அமைச்சரவை பத்திரத்தை அன்று நாம் தாக்கல் செய்ததன் மூலமாகவே எமக்கு இந்த சந்தர்ப்பம் கிடைத்துள்ளது.
சுமார் 2000 வருடங்களுக்கு முன்னர் வலகம்பா மன்னனின் ஆட்சிக் காலத்தில் திரிபீடகம் எழுத்து வடிவம் பெற்றது. அதன் பின்னர் மகாசங்கத்தினரின் வழிகாட்டலுக்கமைய அந்த புனித தர்மத்தை பாதுகாக்கும் செயலை முன்னெடுப்பதற்கான சந்தர்ப்பம் எமக்கு கிடைத்தமையை எண்ணி மகிழ்ச்சியடைகின்றேன். நான் ஜனாதிபதியாக பதவிவகிக்கும் இக்காலகட்டத்தில் இந்நிகழ்வு இடம்பெறுகின்றமை எனது பூர்வஜென்ம புண்ணியமாகவே நான் கருதுகின்றேன்.
முதலாவது பௌத்த மாநாட்டின்போது புத்த பெருமானால் 45 ஆண்டுகளாக போதிக்கப்பட்டு வந்த தர்ம போதனைகள் ஒழுக்கம், சூத்திரம், அபிதர்ம ஆகிய மூன்று பிரிவுகளாக பிரிக்கப்பட்டது. அதன் காரணமாக 2600 ஆண்டுகளாக அந்த தர்மத்தை எம்மால் பாதுகாக்க முடிந்துள்ளது. வாய் வழியாக தர்மத்தை போதித்து அதனை பாதுகாத்து வந்த தேரர்களே திரிபீடகத்தை நூலாக தொகுப்பதற்கு வித்திட்டவர்கள் என்பதை நாம் அறிவோம்.
புத்த பெருமானின் மறைவுக்குப் பின்னர் 236 ஆண்டுகளுக்கு பின் இலங்கைக்கு வருகை தந்த மஹிந்த தேரரால் இரண்டு பெளத்த மாநாடுகளினால் அங்கீகரிக்கப்பட்ட வாய்வழி திரிபீடகம் எமக்கு வழங்கப்பட்டது. திரிபீடகத்திற்கு பல்வேறு பிரச்சினைகள் ஏற்பட்டுள்ள சந்தர்ப்பங்கள் வரலாற்றில் குறிப்பிடப்பட்டுள்ளன. 12 ஆண்டுகளாக மக்களை வாட்டிய ”பெமிநித்யாசாய” எனப்படும் பஞ்ச காலத்தில் பல்வேறு இன்னல்களுக்கு முகங்கொடுத்த போதிலும் திரிபீடகத்தை மனனஞ்செய்து அதனை நினைவில் வைத்துக்கொள்வதற்காக தேரர்கள் பாரிய முயற்சிகளை மெற்கொண்டனர். அந்த காலகட்டத்தில் பல தேரர்கள் இலங்கையைவிட்டு சென்றதுடன், இலங்கையில் தங்கிய பிக்குகள் தாமரைத் தண்டுகளையும் பல்வேறு தாவரங்களையும் உணவாக உட்கொண்டு திரிபீடகத்தை வாய்மொழியாக பாதுகாப்பதற்கு எடுத்த முயற்சிகளானது பாராட்டத்தக்கது. அந்த பஞ்ச காலத்தில் திரிபீடகத்தை மனனஞ்செய்து நினைவில் வைத்திருப்பதன் மூலம் அதனை பாதுகாப்பதில் உள்ள ஆபத்தை தேரர்கள் உணர்ந்தார்கள். எதிர்கால மக்களின் நினைவாற்றல் குறைவடைவதால் ஏற்படக்கூடிய ஆபத்தையும் அவர்கள் உணர்ந்தார்கள். அதனால் திரிபீடகத்திற்கு எழுத்து வடிவம் கொடுக்க வேண்டுமென அவர்கள் தீர்மானித்தார்கள்.
மாத்தளை அலுவிகாரையில் திரிபீடகத்தை நூலில் எழுதியதால் பௌத்த மதத்தில் மறுமலர்ச்சி ஏற்பட்டது. சரியான முறையில் எழுதப்பட்ட திரிபீடக நூல் உலகத்தினருக்கு கிடைப்பதற்கு வழிவகுத்தது. திரிபீடகமானது மத கலாசார உரிமையாகவே கருதப்படுகின்றது. திரிபீடகத்தை தேசிய மரபுரிமையாக பிரகடனப்படுத்துவதன் அர்த்தம் அது சிங்கள மக்களுக்கு மாத்திரம் உரித்தானதல்ல. தேசியம் என்பதின் அர்த்தம் இலங்கையர் என்பதே ஆகும்.
ஆரம்ப காலத்தில் திரிபீடகம் பாளி மொழியில் எழுதப்பட்டுள்ளது. பாளி மொழியில் எழுதப்பட்ட திரிபீடகம், கிழக்காசிய நாடுகளில் பாவனையில் உள்ளது. இலங்கையில் பணியாற்றிய ரீஸ் டேவிட் எனப்படும் வெளிநாட்டவர் இலங்கையில் பணியாற்றிய காலத்தில் பாளி மொழியினை கற்று ஐரோப்பிய நாடுகளில் பௌத்த மதத்தை பிரசாரம் செய்வதற்கு நடவடிக்கை மேற்கொண்டார். தேரவாத பௌத்த திரிபீடகமானது சர்வதேச உரிமையாகும். அது ஒரு இனத்தை சார்ந்ததல்ல.
திரிபீடகத்தை தேசிய மரபுரிமையாக மாற்றியதன் காரணமாக அதற்கு சட்ட பாதுகாப்பையும் வழங்கக்கூடியதாக உள்ளது. சிலர் அவர்களது சுய இலாபத்திற்காக திரிபீடகத்தை தவறான முறையில் விவரித்து புத்தகங்கள் வெளியிட்டுள்ளனர். திரிபீடகத்தில் சில பாளி சொற்களுக்கு தவறான அர்த்தங்களை சூட்டியுள்ளனர். பாளி மொழி தொடர்பில் பாண்டித்தியமற்றவர்கள் திரிபீடகத்தை சிங்களத்திற்கு மொழி பெயர்த்துள்ளனர்.
சமூக வலைதளங்களில் தவறான முறையில் திரிபீடகத்தை பயன்படுத்திய சந்தர்ப்பங்களை நாம் கண்டுள்ளோம். இனிமேல் அரசாங்கத்தின் அனுமதியின்றி திரிபீடகத்தை மொழி பெயர்க்கவோ திருத்தங்கள் மேற்கொள்ளவோ இடமளிக்கப் போவதில்லை என்று நான் உங்கள் முன்னிலையில் தெரிவித்துக்கொள்கின்றேன். வரலாற்றில் பல்வேறு சவாலான காலகட்டங்களில் தேரவாத பௌத்த தர்மத்தை அரசர்களும் அமைச்சர்களும் பேணி பாதுகாத்தனர். தற்போது திரிபீடகத்தை பயன்படுத்தி மேற்கொள்ளப்படும் அனைத்து தவறான நடவடிக்கைகளையும் தவிர்ப்பதற்கே அரசாங்கம் இந்த விடயத்தில் தலையிட்டது. இனிவரும் காலங்களில் பாளி மொழியில் பாண்டித்தியம் பெற்றவர்களுக்கு மாத்திரமே திரிபீடகத்தை திருத்துவதற்கோ மொழி பெயர்ப்பதற்கோ அனுமதி வழங்கப்படும்.
திரிபீடத்தை பாதுகாப்பது நமது கடமையாகும். திரிபீடகத்தின் மூலமாக புத்த பெருமானின் போதனைகளை இலகுவாக புரிந்துகொள்ள முடியும். நான் தர்ம வழியில் பயணிப்பவன் என்ற வகையில் மகாசங்கத்தினரின் விருப்பத்திற்கமைய நான் இந்த முடிவினை மேற்கொண்டேன்.
“தர்ம நெறியில் வாழ்பவனை தர்மமே காக்கும்” நாம் அவ்வழியையே பின்பற்றி வருகிறோம். திரிபீடகத்தை உலக மரபுரிமையாக மாற்றுவதற்கான நடவடிக்கைகளை மேற்கொள்ளுமாறு யுனெஸ்கோ அமைப்பின் ஊடாக ஐக்கிய நாடுகளின் செயலாளர் நாயகத்திடம் கோரிக்கை முன்வைக்கவுள்ளோம்.
இந்த நடவடிக்கைகளை மேற்கொள்வதற்கு எமக்கு வழிகாட்டிய மகாசங்கத்தினருக்கும் இப்பணிக்கு பங்களிப்பினை வழங்கிய அனைவருக்கும் ஜனாதிபதி செயலகம், புத்தசாசன அமைச்சு, கலாசார அலுவல்கள் அமைச்சு மற்றும் ஏனைய நிறுவனங்களுக்கும் எனது நன்றியை தெரிவித்துக்கொள்கின்றேன்.

{jathumbnail off}

 அண்மையில் இடம்பெற்ற பங்களாதேஷ் பொதுத்தேர்தலில் மகத்தான வெற்றியை பெற்றுக்கொண்ட பங்களாதேஷ் பிரதமர் ஷேக் ஹசீனா அம்மையாருக்கு ஜனாதிபதி கௌரவ மைத்ரிபால சிறிசேன அவர்கள் தனது வாழ்த்துக்களை தெரிவித்துள்ளார்.

ஷேக் ஹசீனா அம்மையாருக்கு விசேட வாழ்த்துச் செய்தியொன்றினை அனுப்பி வைத்துள்ள ஜனாதிபதி அவர்கள், பிறந்துள்ள புத்தாண்டில் அவரது சகல செயற்பாடுகளும் வெற்றியடைய வேண்டும் என வாழ்த்து தெரிவித்துள்ளார்.
ஷேக் ஹசீனா அம்மையார் பிரதிநிதித்துவம் செய்யும் அவாமி லீக் கட்சி வெற்றி பெற்றதனூடாக பங்களாதேஷ் மக்கள் ஷேக் ஹசீனா அம்மையார் மீதும் அவரது அரசாங்கத்தினால் முன்னெடுக்கப்பட்டுவரும் நடைமுறைக்கு சாத்தியமான, வெற்றிகரமான கொள்கைகள் தொடர்பில் கொண்டுள்ள நம்பிக்கை மீண்டும் ஒரு முறை உறுதி செய்யப்பட்டுள்ளதென ஜனாதிபதி அவர்கள் தனது வாழ்த்துச் செய்தியில் குறிப்பிட்டுள்ளார்.
பங்களாதேஷுக்கும் இலங்கைக்கும் இடையேயான நீண்டகால தொடர்புகள், பொதுவான அபிலாஷைகள் மற்றும் பரஸ்பர நம்பிக்கை ஆகியவற்றை அடிப்படையாகக் கொண்டு வளர்ச்சியடைந்துள்ளதுடன், அத்தொடர்புகள் பொருளாதார, அரசியல், பாதுகாப்பு மற்றும் கலாசாரம் உள்ளிட்ட துறைகளின் ஊடாக தற்போது விரிவடைந்துள்ளதாகவும் ஜனாதிபதி அவர்கள் சுட்டிக்காட்டியுள்ளார்.
இரு நாடுகளுக்குிடையே காணப்படும் இந்த உறுதியான தொடர்புகளும் நட்புறவும் எதிர்காலத்தில் மென்மேலும் மேம்படுத்தப்படும் என தான் நம்புவதாகவும் ஜனாதிபதி அவர்கள் தனது வாழ்த்துச் செய்தியில் குறிப்பிட்டுள்ளார்.